1Ua sauni atu pea foi e Iopu lana lauga, ua faapea atu,
2O loo soifua le Atua, o le ua aveesea lo‘u faamasinoga; o Le e ona le malosi uma lava o le ua faatiga mai ia te au.
3O aso uma ua i ai ia te au lo‘u ola, ua i ai foi i o‘u pogaiisu le mānava mai le Atua,
4e le tautala ai lava o‘u laugutu i se mea le tonu, e le tautala foi lo‘u laulaufaiva i se mea pepelo.
5Ia mamao lava ia te au ona ou ta‘ua outou ua tonu; seia oo lava i lo‘u oti ou te le faateaina lava la‘u amio sao.
6Ou te taofimauina la‘u amiotonu, ou te le tuua lava; e le faaleagaina a‘u i lo‘u loto i o‘u aso uma.
7O lē ua fai a‘u mona fili, ia avea o ia e pei o se tagata amio leaga; o lē ua tulai mai foi ia te au, ia pei o le ua amioletonu.
8Auā e ui lava ina ua mau mea le tagata faalematau, se a lona faamoemoe pe a avea e le Atua lona agaga?
9E faafofogaina ea e le Atua lana alaga, pe a oo ia te ia le puapuaga?
10E fiafia ea o ia i Le e ona le malosi uma lava? E valaau ea o ia i le Atua i aso uma?
11Ou te a‘oa‘o atu ia te outou i le aao o le Atua; ou te le natia mea ua i ai i Le e ona le malosi uma lava.
12Faauta, ua outou iloa e outou uma lava; o lenei, se a le mea ua outou fai mai ai upu matuā faatauvaa?
13O lenei le tofi o le tagata amio leaga mai le Atua, o le tofi foi o e faasaua latou te maua mai i Le e ona le malosi uma lava.
14Afai e faatoateleina ona atalii e fai i latou mo le pelu; e le maoona foi ana fanau i mea e ‘ai.
15E tanumia e le oti e o totoe ia te ia; e le fetagisi foi ona fafine ua oti a latou tane.
16E ui ina faafaupue e ia o ario e pei o le efuefu, ma sauni ofu e pei o le omea;
17e saunia e ia, a e ofu ai le ua amiotonu, e tufatufa foi ario e le ua sao lana amio.
18Ua ia faia lona fale e pei o se pepe, e pei o se fale apitaga foi ua faia e le leoleo.
19E taoto le mauoa, a e le faaopoopoina atu i ona tamā; e pupula ona mata, ona leai ai lea o ia.
20E oo atu ia te ia mea matautia e pei o vai, e avea o ia e le asiosio i le po.
21E lelea o ia e le matagi mai sasae, ona alu ai lea; e matuā lelea ese ai o ia i le mea sa nofo ai.
22E faaoo e le Atua ia mea ia te ia, a e le faasaoina; e matuā fia sola ese ia i lona aao.
23E pāti lima tagata ia te ia, ma tuliuisa ia te ia ai le mea e nofo ai o ia.
Who We AreWhat We EelieveWhat We Do
2025 by iamachristian.org,Inc All rights reserved.
