1O le avega a Aikupito. Faauta, e tietie atu Ieova i le ao tele vave, e afio atu o ia i Aikupito; e gatete foi tupua a Aikupito i ona luma, e faavaivai ai foi loto o Aikupito i totonu ia te i latou.
2Ou te avatua foi auupega ia Aikupito e tau a Aikupito; latou te tau o le tagata ma lona uso, o le tagata ma lē la te tuaoi, o le tasi aai ma le isi aai, o le tasi itu malo ma le isi itu malo.
3E mavae atu foi le atamai o Aikupito nai totonu ia te i latou, ou te faaumatia foi lana pule; ona latou saili ai lea i tupua, ma e ua leo oolo, ma aitu vavalo, ma e ua memu.
4Ou te tuuina atu Aikupito; i le lima o le alii saua, e pule foi le tupu malosi ia te i latou, o loo fetalai mai ai le Alii o Ieova o ‘au.
5E pe foi le suāvai nai le vai e mate foi ma matutu le vaitafe.
6E elo foi vaitafe, e maui ma mamate lava vaita‘i o Aikupito, e mamae le u ma le ‘utu‘utu.
7O le lāolao e lata ane i le vaitafe, o i auvai lava, atoa ma mea uma ua totoina i le vaitafe, e magumagu ia, e faataapeapeina, e le toe i ai lava.
8E feoi o e fai faiva, e faanoanoa o i latou uma o e sāusau i le mātau i le vaitafe, e faavaivai foi i latou o e lafo upega i le fogāvai.
9E masiasi e ua fai lino lelei, atoa ma i latou o e lalaga lino sisina.
10E lepetia ona faavae, o tagata uma foi o e galulue i se taui e tiga o latou loto.
11E matuā valelea lava alii sili o Soana, ua faavalea le pule a le au faipule popoto a Farao; pe faapefea ea ona outou fai atu ia Farao, O a‘u o le atalii o tagata popoto, o le atalii o tupu mai anamuā?
12O ifea lava ou tagata popoto? se‘i latou faaali atu ia te oe, ma ia latou iloa, pe se a le pule a Ieova o ‘au ia Aikupito.
13Ua faavālea alii sili o Soana, ua pelogia alii sili o Nafi, ua faaseseina foi Aikupito e alii o ona itu aiga.
14Ua liligi atu e Ieova i totonu ia te ia, le agaga e faapiopio ai, o lea ua latou faaseseina ai Aikupito i ana mea uma e fai, e faapei ona tautevateva o le tagata onā i lona puaiga.
15E lei i ai foi ia Aikupito se mea e fai, se mea lava e fai e le ulu po o le i‘u, e le lau pama po o le fiso.
16O lea aso e tusa ai Aikupito ma fafine; e gatete ma fefefe i latou ona o le aao o Ieova o ‘au ua siitia, ua siitia e ia i luga ia te i latou.
17E avea foi le nuu o Iuta ma mea e mata‘u ai Aikupito; o i latou uma o e ta‘uta‘u fefefe ai, ona o le pule a Ieova o ‘au ua ia pule i ai.
18O lea aso e tautala ai nuu e lima i le laueleele o Aikupito i le gagana a Kanana, latou te tauto foi ia Ieova o ‘au; e ta‘ua le tasi, O le aai o le malaia.
19O lea aso e i ai le fata faitaulaga ia Ieova i totonu o le nuu o Aikupito, ma le faailoga ia Ieova i tafatafa o lona tuaoi.
20E fai ai foi ma faailoga ma molimau ia Ieova o ‘au i le nuu o Aikupito; auā latou te alalaga ia Ieova ona o e faasaua, ona auina atu ai lea e ia ia te i latou o le faaola, o le ua sili, na te laveaiina i latou.
21E faailoaina Ieova i Aikupito, e iloa foi Ieova e Aikupito i lea aso; latou te auauna ia te ia i taulaga ma mea alofa; latou te tauto foi ia Ieova, ma latou faataunuuina.
22E taia foi Aikupito e Ieova, na te taia, ma toe fofoina; ona latou liliu ai lea ia Ieova, ona faafofoga lea o ia ia te i latou, ma fofo ia te i latou.
23O lea aso e fai ai le ala tele, e fua mai i Aikupito e oo i Asuria, e o atu Asuria i Aikupito, e o mai foi Aikupito i Asuria; e auauna foi Aikupito faatasi ma Asuria.
24O lea aso e fai ai Isaraelu ma tolu o nuu, e faatasi ma Aikupito ma Asuria, e fai ma mea e manuia ai i totonu o le lalolagi.
25E faamanuia Ieova o ‘au ia te i latou, e faapea mai, Ia manuia lo‘u nuu o Aikupito, ma Asuria le galuega a o‘u lima, atoa ma lo‘u tofi o Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
