1O Hakai le perofeta, ma Sakaria le atalii o Ito, o perofeta ia sa perofeta ane i le suafa o le Atua o Isaraelu i tagata o Iuta, o i latou lava e na i Iuta ma Ierusalema.
2Ona tutu ai lea o Serupapelu le atalii o Salatielu, ma Iosua le atalii o Iosataka, ma amataina ona fai o le fale o le Atua o i Ierusalema; sa ia te i laua foi perofeta a le Atua e lagolago ia te i laua.
3O ona po lava ia na o mai ai ia te i latou o Tatenai le alii e pule i ona tala mai o le vaitafe, ma Setaraosenai, ma e na pule faatasi ma i laua, ua fai mai ia te i latou, ua faapea mai, Po o ai na na poloai atu ia te outou tou te faia lenei fale, ma faaumaina lenei pa?
4Ona matou fai atu lea ia te i latou, ua faapea atu, O igoa lava ia o tagata o faia lenei fale.
5A ua silasila lo latou Atua i toeaina o Iuta, ua latou le mavaoia i latou, seia oo atu le mea ia Tariu; ona latou tali mai lea i lea mea i le tusi.
6O le ata lenei o le tusi a Tatenai le alii e pule i ona tala mai o le vaitafe, ma Setara-posenai, ma e na pule faatasi ma ia, o tagata o Afareseka, o i ona tala mai o le vaitafe, na latou avatua ia Tariu le tupu.
7Ua latou avatua le tusi ia te ia, ua tusia faapea foi i totonu, Ia ia Tariu le tupu le manuia uma.
8Ia silafia e le tupu na matou o atu i le itu malo o Iuta, i le fale o le Atua silisili, o loo faia i maa tetele, ma laau ua tuu i ona pa; o lenei galuega foi na faia ma le faamalosi, ma ua manuia i o latou lima.
9Ona matou fesili atu lea i na toeaina, ua faapea atu ia te i latou, Po o ai na fai atu ia te outou tou te faia lenei fale, ma faaumaina nei pa?
10Na matou fesili atu foi ia te i latou i o latou igoa e faailoa atu ia te oe, ina ia tusi atu ai igoa o tagata e sili ia te i latou.
11Ua faapea foi ona latou tali mai ia te i matou, ua fai mai, O i matou o auauna a le Atua o le lagi ma le lalolagi, ua matou fai foi le fale sa faia i ona tausaga anamua ua tele; o le tupu tele i Isaraelu sa na faia ma faaumaina ai.
12Peitai na faatupuina e o matou tamā le toasa o le Atua o le lagi, ona ia tuuina atu ai lea o i latou i le lima o Nepukanesa le tupu o Papelonia, le Kaletaia, na ia faaumatia foi lenei fale, ma tāfea le nuu i Papelonia.
13A o le tausaga muamua o Kuresa le tupu o Papelonia, na poloai mai ai Kuresa le tupu ia faia lenei fale o le Atua.
14O mea foi o auro ma ario sa i le fale o le Atua, na avea e Nepukanesa ai le malumalu na i Ierusalema, ua ia aveina atu i le malumalu i Papelonia, ua au mai e Kuresa le tupu o ia mea ai le malumalu i Papelonia, ma ia tuuina atu ai ia Sesepasara, o le igoa lea o le alii e pule na tofia e ia;
15ma ua faapea atu ia te ia, Ina ave ia e oe o nei mea, ina alu ia, ma avatu ai i le malumalu o i Ierusalema, ma ia faia le fale o le Atua i lona tulafale.
16Ona sau lea o lena Sesepasara, sa tuu e ia le faavae o le fale o le Atua o i Ierusalema; talu foi ia ona po, ua oo mai i ona po nei, ua fai ai pea le fale, a e lei uma.
17O lenei, afai e lelei i le tupu, ia suesuea i le fale oloa o le tupu o iina i Papelonia, pe moni na poloai Kuresa le tupu ia faia lenei fale o le Atua i Ierusalema; ma ia tusia mai ia te i matou le finagalo o le tupu i lenei mea.
Who We AreWhat We EelieveWhat We Do
2025 by iamachristian.org,Inc All rights reserved.
