1Ua ia fai atu foi i le na pule i lona aiga, ua faapea atu, Ia faatutumu taga a ia tagata i mea e ‘ai, ia tuugataina i latou; ia tuu foi tupe a le tagata taitasi i le gutu o lana taga.
2I tuu foi la‘u ipu faaofuofu, le ipu ario, i le gutu o le taga a le aupito itiiti, atoa ma tupe o lana saito. Ona faia lea e ia faapei ona fai atu ai e Iosefa.
3Ua malama ae le taeao, ona aauina atu lea o ia tagata, o i latou atoa ma a latou asini.
4Ua tuanai e i latou le aai, a e lei mamao foi, ona fai atu ai lea o Iosefa i le ua pule i lona aiga, Tu ia i luga, tuliloa atu ia i na tagata; pe a e maua atu foi ia te i latou, ia e fai atu i ai, Se a le mea ua outou taui mai ai le lelei i le leaga?
5E le o le mea ea lena e inu ai lo‘u alii, ma ua iite ai lava? Ua outou agaleaga mai i le mea ua outou faia.
6Na ia maua atu foi ia te i latou, ona fai atu ai lea ia te i latou ia lava upu.
7Ona latou fai mai ai lea ia te ia. Se a ea le mea e faapea mai ai ia upu e le alii? E mamao ma au auauna ona latou fai se mea faapena.
8Faauta ea, o tupe na matou maua i gutu o a matou taga na matou toe au mai ia te oe ai le nuu o Kanana; se a le mea a matou gaoi ai ario po o auro i le maota o lou alii?
9O so matou o au auauna e maua ai le mea, ia oti lava ia; e fai foi i matou ma pologa ia te oe lo matou alii.
10Ona fai atu ai lea o ia, O lena lava, ia faia a outou upu; o le ua i ai le mea ia fai lea mo‘u pologa, a e magalo outou.
11Ona latou taitasi ai lea ma vave tuu i lalo lana taga i le eleele, ua taitasi foi ma tatala lana taga.
12Ona ia suesue ai lea, ua amata i le aupito matua, ua oo i le aupito itiiti, ua maua foi le ipu i le taga a Peniamina.
13Ona latou saei ai lea o latou ofu, ua taitasi ma faaee le avega i lana asini, ma latou foi atu i le aai.
14Ua o ma Iuta ma ona uso i le fale o Iosefa, auā na i ai pea ia; ona latou faapauu fao mai ai lea i ona luma.
15Ona fai atu ai lea o Iosefa ia te i latou, Se a lenei mea ua outou faia? po ua outou le iloa ea e mafai lava e le tagata faapei o a‘u nei ona iite?
16Ona tali mai lea o Iuta, Se a se mea matou te fai atu i lo matou alii? Se a sa matou upu? Pe faapefea ona matou faatonuina atu o i matou? Ua faaalia e le Atua le agasala a au auauna; faauta, o auauna i matou ia te oe lo matou alii, o i matou atoa ma le ua maua ua iai le ipu.
17Ona fai atu ai lea o ia, E mamao ia te au ona ou fai lea mea; o le ua maua ua i ai le ipu, e fai lea ma‘u auauna, a o outou, o pea ia outou ma le manuia i lo outou tamā.
18Ona soso mai ai lea o Iuta ia te ia, ua faapea mai, Le alii e, tuu mai ia i lau auauna se‘i fai atu se upu e faafofoga i ai oe le alii, aua foi ne‘i e toatamai ai i lau auauna; auā o oe e faapei o Farao lava.
19Le alii e, na e fesili mai i au auauna, ua faapea mai, Pe ai so outou tamā, po o so outou uso?
20Ona matou fai atu ai lea ia te oe lo matou alii, O lo matou tamā lava, o le toeaina, ma le tama na fanaua e ia ina ua toeaina, o le tama itiiti; ua oti foi lona uso, o le toe tama foi ia a lona tinā, e faapelepele lava lona tamā ia te ia.
21Ona e fetalai mai lea i au auauna, Ia au mai o ia ia te au, ou te matamata i ai.
22Ona matou fai atu ai lea i lo matou alii, E le mafai ona tuua e le tama lona tamā; auā pe afai na te tuua lona tamā e oti lava lona tamā.
23Ona e fetalai mai ai lea i au auauna, Afai tou te le o mai ma lo outou uso aupito itiiti, tatou te le toe fesilafai.
24Ua o ae i matou i lau auauna o lo matou tama, ona matou ta‘u atu ai lea ia te ia le fetalaiga a lo matou alii.
25Ua fai mai foi lo matou tamā, Toe ō ia e faatau mai sina mea e ‘ai mā tatou.
26Ona matou fai atu ai lea, E le mafai ona matou o ifo; a e afai matou te o ma lo matou uso aupito itiiti, ona matou o ifo ai lea; auā e le mafai ona matou iloa o fofoga o le alii pe afai e le i ai ia te i matou lo matou uso aupito itiiti.
27Ona fai mai ai lea o lau auauna, o lo matou tamā, ia te i matou, Ua outou iloa na fanau mai la‘u avā ia te au o atalii e toalua.
28Na alu ese foi le tasi ia te au, ona ou faapea ane ai lea, Ai lava ua saeia lava ia, ou te lei toe iloa foi ia talu ai.
29Afai tou te aveeseina foi lenei ia te au, a oo atu foi ia te ia se leaga, tou te aveina ifo ai o‘u lauulu sina i le tuugamau ma le faanoanoa.
30O lenei, pe a a‘u alu atu i lau auauna o lo‘u tamā, a e le o ia te i matou le tama, (auā o le ola o le tama e ola ai o ia,)
31pe a iloa e ia e le o i ai le tama, ona oti ai lea; ona aveina ifo ai lea e au anauna o lauulu sinā o lau auauna, o lo matou tamā, i le tuugamau ma le faanoanoa.
32Auā na fai lau auauna ma moni o le tama i lo‘u tamā, ua faapea atu, Afai ou te le toe aumaia o ia ia te oe, ona ou nofo sala ai lea i lo‘u tamā i aso uma.
33O lenei, ou te aioi atu; ia nofo a‘u o lau auauna e fai ma pologa i lo‘u alii e sui a‘i le tama, a ia alu ae le tama faatasi ma ona uso;
34auā ou te mafaia faapefea ona alu ae i lo‘u tamā, a e le o ia te au le tama? Ne‘i ou iloa le leaga e oo i lo‘u tamā.
Who We AreWhat We EelieveWhat We Do
2025 by iamachristian.org,Inc All rights reserved.
