1Ua fai upu Miriama ma Arona ia Mose ona o le fafine Kuso na ia fai avā ai; auā na fai avā o ia i le fafine Kuso.
2Ua la fai ane, Ua na o Mose ea ua fetalai mai ai Ieova? E le o i maua foi ea ua fetalai mai ai o ia? Ua faafofoga mai foi Ieova.
3(Na matuā agamalu lava le tagata nei o Mose, e sili lava i tagata uma o i le lalolagi.)
4Ona fetalai faafuasei mai ai lea o Ieova ia Mose, ma Arona, ma Miriama, Ina o mai ia outou e toatolu i le fale fetafai o le faapotopotoga. Ona o mai ai lea o i latou e toatolu.
5Ona afio ifo ai lea o Ieova i le ao faaniutu, ma ua tu o ia i le faitotoa o le fale fetafai, ua ia valaau foi ia Arona ma Miriama; ona o mai ai lea o i laua.
6Ona fetalai mai ai lea o ia, Ina faalogologo mai ia i a‘u upu, Afai e i ai se perofeta a Ieova o ia te outou, ou te faailoa a‘u e a‘u ia te ia i le faaaliga, ou te tautala atu ia te ia i le miti.
7A e le faapea la‘u auauna o Mose, o le faamaoni i lo‘u aiga uma lava.
8Ma te faafesaga‘i ona ma tautala ma ia, e faaali lava, a e le o upu lilo; o le faatusa foi o Ieova na te vaavaai i ai; na oulua le fefefe ea i se a e fai upu i la‘u auauna o Mose?
9Ona tupu ai lea o le toasa o Ieova ia te i laua, ua afio ese foi o ia.
10Ua mavae atu foi le ao ai luma o le fale fetafai; faauta foi, ua lepela Miriama e pei o le kiona lava; ua vaai atu Arona ia Miriama, faauta, ua lepela lava o ia.
11Ona fai atu ai lea o Arona ia Mose, Aue! Le alii e, ou te aioi atu ia te oe, aua e te tuu ia te i maua le agasala ua ma faia ma le faavalea, ma ua ma agasala ai.
12Aua ne‘i avea o ia e pei o se ua oti, o le ua palagia le tasi itu o lona tino ina o fanau mai i le manava o lona tinā.
13Ona alaga atu ai lea o Mose ia Ieova, ua faapea atu, Le Atua e, ou te aioi atu ia te oe ia e faamalolo ia te ia.
14Ona fetalai mai ai lea o Ieova ia Mose, Afai ana feanu lona tamā i ona luma, po ua le ma ea o ia i po e fitu? Ia punitia o ia i tua o le toagālauapi i po e fitu, e mulimuli ane ona toe talia mai ai lea o ia.
15Ona punitia atu ai lea o Miriama i tua o le toagālauapi i po e fitu; e lei o malaga foi le nuu ina seia toe talia mai o Miriama.
16E mulimuli ane ona tuua lea o Haserota e le nuu, ma latou to lauapi i le vao o Parana.
Who We AreWhat We EelieveWhat We Do
2025 by iamachristian.org,Inc All rights reserved.
