SALAMO, 88 - Samoan Old Version Bible

O LE SALAMO LXXXVIII.O le tatalo a le tagata ua tigaina.O le pese, o le salāmo lea mā le fanauga a Koru; ma le usu pese i le maalata leanota. O le salāmo

e a‘oa‘o ai a Hemana le sa Eserā.

1Ieova e, le Atua o lo‘u olataga, ua ou alaga atu i ou luma i le ao ma le po;

2ia oo atu i ou luma la‘u tatalo; ia liliu mai ou fofoga i la‘u valaau;

3auā ua tumu lava lo‘u agaga i mea e tiga ai; ua toe lava ina ou oo i le tuugamau.

4Ua ta‘ufaatasiina a‘u ma e ua o ifo i le lua; e tusa a‘u ma le tagata e leai sona malosi;

5ua sa‘oloto a‘u faatasi ma e ua oti, e pei o e ua fasia, ua taatitia i le tuugamau, o e ua le toe manatua e oe; o i latou foi ua faateaeseina ma lou aao.

6Ua e tuuina ifo a‘u i le lua e maulalo lava, o mea pogisa, o mea loloto lava.

7Ua mamafa lou toasa i luga ia te au, o au galu uma ua e faatigaina ai a‘u. Selā.

8Ua e ave mamao ia te au o e na matou masani; ua e faainosia a‘u e i latou; ua punitia a‘u, ou te le mafai ona ulufafo.

9Ua totō o‘u mata ona o le puapuaga; Ieova e, ua ou valaau atu ia te oe i aso uma, ua ou faaloaloa atu o‘u lima ia te oe.

10E te faia ea vavega i e ua oti? E tutū mai ea e ua oti e vivii atu ia te oe? Selā.

11E ta‘ua ea lou alofa i le tuugamau? Pe ta‘ua lou faamaoni i le mea e malaia ai?

12E iloa ea lou vavega i le pouliuli, ma lau amiotonu i le nuu e galo ai mea?

13A o a‘u, Ieova e, na ou alaga atu ia te oe; e tomua foi la‘u tatalo ia te oe i le taeao.

14Ieova e, se a le mea ua e lafoai mai ai ia te au? Se a le mea e te liliuese ai ou fofoga ia te au?

15Ua puapuagatia lava a‘u, ma ua toe ina oti talu ina ou taulealea; ua mafatia lava a‘u i āu mea e mata‘u ai, ua ou fememeai.

16Ua oo mai i o‘u luga lou toasa mamafa; ua faaumatia lava a‘u e āu mea e mata‘u ai.

17E pei o le vai ona latou siosio mai ai ia te au i le aso atoa; latou te puipui faatasi mai ia te au.

18O le uo ma le aumea ua e ave mamao ia te au, ua i le pouliuli foi e na matou masani.