AUEGA, 3 - Samoan Old Version Bible

O LE MATAUPU III.O le faanoanoa ma le tatalo i le Atua.

1O a‘u le tagata ua iloa le puapuaga i le sasa o lona toasa.

2Ua ia ta‘ita‘i ma au mai ia te au i le pouliuli, a e le o le malamalama.

3E moni, ua ia toe liliu mai lona aao e aoai ia te au i le aso atoa.

4O ia ua agosi ai o‘u aano ma o‘u pa‘u; ua gauia e ia o‘u ivi.

5Ua ia ati ae ‘olo e tau ma a‘u, ua ia siomia a‘u i le mea oona ma le tiga.

6Ua ia faanofoina a‘u i mea pogisa, e pei o e ua oti anamua.

7Ua ia puipuia a‘u i itu uma, ou te le mafai ona alu atu ai; ua faamamafaina e ia o‘u noanoaga ‘apa memea.

8A ou alaga atu foi ma uio, ua ia pupuni mai i la‘u tatalo.

9Ua ia punitia o‘u ala i maa talai, ua ia faapiopioina o‘u magaala.

10O le urosa lamalama o ia ia te au, o le leona foi i mea lilo.

11Ua ia faaliliu ese o‘u ala, ua ia saeia a‘u; ua ia faanofotoatasiina o a‘u.

12Ua lolo‘u e ia lana aufana, ua ia faatuina a‘u e pei o se manulauti e fana i ai.

13Ua lavea ia te ia o‘u fatuga‘o i ana u fanafana.

14Ua fai a‘u ma tauemuga i lo‘u nuu uma, o la latou pese i le aso atoa.

15Ua ia fagaina a‘u ia ma‘ona i mea oona, ua ia faainu ia te au ia onā i le laena.

16Ua ia faamomomo o‘u nifo i iliili, ua ia ufitia a‘u i le lefulefu.

17Ua e teena a‘u ia mā tetea ma le filemu; ua galo ia te au le manuia.

18Ona ou faapea ifo lea, Ua faaumatia lo‘u faatuatuaga ma lo‘u faamoemoega mai ia Ieova.

19Ia e manatu i lo‘u puapuaga ma lo‘u agaleagaina, o le laena ma le rosa.

20Ia e manatua lava, ua faano‘uno‘u lo‘u loto i totonu ia te au.

21O le mea lenei ua toe manatu i ai lo‘u loto, o le mea lea e faamoemoe ai a‘u.

22O le alofa o Ieova ua le faaumatia ai i tatou, ona ua le mavae o lona alofa mutimutivale;

23e fou mai ia i taeao uma; e tele lou faamaoni.

24Ua faapea ifo lo‘u loto, O lo‘u tofi o Ieova lea; o le mea lea ou te faamoemoe ai ia te ia.

25O loo agalelei Ieova i e faatalitali ia te ia, o le tagata e saili ia te ia.

26E lelei ona faamoemoe ma le faalologo i le olataga mai ia Ieova.

27E lelei i le tagata ina ia tauave e ia le amo ina o taulealea.

28E nofo toatasi o ia ma faalologo, ina ua faaeetia i luga ia te ia.

29E tuu e ia lona gutu i le efuefu, pe na te maua se faamoemoe.

30E tuu atu e ia o lona alafau i lē tu‘i mai, e faatumuina o ia i le faalumaina.

31Auā e le tuulafoaiina e faavavau e le Alii;

32auā e ui lava ina faatiga mai o ia, e toe alofa mutimuti vale mai o ia e tusa ma le tele o lona alofa.

33Auā e le fiafia o ia ona faapuapuagaina pe faatigaina tagata.

34O le soli i lalo o ona vae o e noatia uma o le nuu,

35o le faapiopioina o le faamasinoga o le tagata i luma o le Silisili ese,

36o le faaseseina o le tagata i lana finauga; o mea ia e le fia silasila i ai le Alii.

37Po o ai o ia e fai atu, ona oo ai lea, a e lei fetalai mai ai le Alii?

38E le tŭlei ifo ea i le fofoga o le Silisili ese o mea leaga atoa ma le lelei?

39Pe se a le mea ua muimui ai le tagata ola, o le tagata ona o lana sala?

40Se‘i tatou suesue i o tatou ala ma filifili, ma ia tatou toe foi atu ia Ieova.

41Se‘i tatou sii atu o tatou loto faatasi ma o tatou lima i le Atua o i le lagi.

42Ua solitulafono i matou, ma ua fouvale i matou; ua e le faamagalo mai.

43Ua e ufitia i matou i le toasa, ma e tuliloa ia i matou; ua e fasiotia, ua le alofa mai.

44Ua e ufitia oe i le ao, ina ia le sao atu ai le tatalo.

45Ua e faia i matou ma otaota, ma mea e inosia i luma o nuu.

46O i latou uma o e ita mai ia te i matou ua faamamaga o latou gutu ia te i matou.

47Ua ia te i matou le fefe ma le lua, o le faatafunaina ma le lepetia o mea.

48Ua tafe ifo vaitafe i o‘u mata ona ua tu‘imomomo le tama fafine a lo‘u nuu.

49Ua tafe ifo loimata i o‘u mata, ua le mapu, ua le aunoa lava,

50seia silasila ifo Ieova, ma ia silafia mai mai le lagi;

51o o‘u mata e tiga ai lo‘u loto, ona o tama fafine uma a la‘u aai.

52O e ita fua mai ia te au, ua latou matuā tuli mai ia te au, e pei se manu lele.

53Ua latou faaumatia lo‘u ola i le lua; ua lafo mai le maa i luga ia te au.

54Na lofia lo‘u ulu i le vai, na ou faapea ifo, Ua ou fano.

55Ieova e, na ou valaau atu i lou suafa ai le lua e maulalo.

56Na e faafofogaina lo‘u leo; aua ne‘i ‘alo ou fofoga i lo‘u mapuitiga ma la‘u alaga.

57Na e faalatalata mai ia te au i le aso na ou valaau atu ai ia te oe; na e fetalai mai, Aua le fefe.

58Le Alii e, ua e faia la‘u finauga; ua e togiolaina a‘u.

59Ieova e, ua e silafia le agaleagaina o a‘u; ia e faia lo‘u faamasinoga.

60Ua e silafia uma lava lo latou fia taui mai, ma o latou mafaufauga uma ia te au.

61Ieova e, ua e faafofogaina lo latou faaluma mai, ma o latou mafaufauga uma ia te au;

62o upu a e laga mai ia te au, ma le mea ua latou mafaufau i ai ia te au i le aso atoa.

63A latou nonofo i lalo pe tutū i luga, ia e silasila, ua fai la latou pese ia te au.

64Ieova e, ia e taui atu ia te i latou, e tusa ma mea ua faia e o latou lima.

65Ia e tuuina atu ia te i latou o le loto faalogogata, ia e faafano ia te i latou.

66Ia e tuliloa ia te i latou i lou toasa, ia e faaumatia i latou ai lalo o le lagi o Ieova.