1Ua mavae na mea, ona amio leaga lea o le tautu uaina a le tupu o Aikupito atoa ma le na fai ana mea e ‘ai i lo laua alii le tupu o Aikupito.
2Ona ita ai lea o Farao i le toalua o ana auauna, o le ua sili i e tautu uaina ma le ua sili i e fai mea e ‘ai.
3Ua na tuu atu ia te i laua ia leoleoina i le fale o le alii e pule i le ‘au e faafeao, i le fale puipui, o le mea ua noanoatia ai Iosefa.
4Ua tuuina atu i laua e le alii e pule i le ‘au e faafeao ia Iosefa, ua ia auauna atu ai ia te i laua. Na la i ai foi isi aso i le fale puipui.
5Ona fai ai lea o a la miti, o le tagata ma lana miti i le po e tasi, e taitasi e tusa ma le faamatalaga o lana miti, o le tautu uaina atoa ma le fai mea e ‘ai a le tupu o Aikupito, e na noanoatia i le fale puipui.
6Ua ulufale atu Iosefa ia te i laua i le taeao, ua vaai atu i ai, faauta, ua la faanoanoa.
7Ona fesili atu ai lea o ia i auauna a Farao na puipuia ma ia i le fale o lona alii, ua faapea atu ai, Se a le mea e faanoanoa ai oulua i le aso nei?
8Ona la tali mai ai lea ia te ia, Ua fai a ma miti, a e leai se na te faamatalaina mai. Ona fai atu ai lea o Iosefa ia te i laua, E le o i le Atua ea faamatalaga? Ina tala mai ia ia te au.
9Ona tala mai ai lea e le ua sili i e tautu uaina o lana miti ia Iosefa, ua faapea mai ia te ia, O la‘u miti, faauta, sa i o‘u luma le vine.
10Na i ai foi i le vine o la e tolu, e peiseai ua fotu mai foi ia, ua tutupu mai ona fuga, ua fua mai foi ona fuifui o vine otatā.
11Na i lo‘u lima foi le ipu a Farao, na ou tago foi i vine, ma a‘u tāulia i le ipu a Farao, ona ou tuu atu ai lea o le ipu i le aao o Farao.
12Ona fai atu ai lea o Iosefa ia te ia, O lona faamatalaga lenei; o la e tolu e tolu ia aso.
13A o lei mavae aso e tolu ona faaea lea e Farao i lou ulu, ma toe tofia oe i lou faiva, e te tuu atu ai foi le ipu a Farao i lona aao, faapei o anamua ina o e tautu uaina ia te ia.
14A ia e manatua mai a‘u pe a oo le manuia ia te oe, ma ia e alofa mai ia te au, ma ia e ta‘ua a‘u ia Farao, ma ia aveina atu a‘u i lenei fale;
15auā na gaoia mai lava a‘u ai le nuu o Eperu; ou te lei faia foi iinei se mea e tasi e tatau ai ona ia latou tuuina o a‘u i le lua.
16Ua iloa e le ua sili i e fai mea e ‘ai ua lelei le faamatalaga, ona fai mai ai lea o ia ia Iosefa, O a‘u foi na ou iloa i la‘u miti, faauta, na faae‘e ato mea e ‘ai sinasina e tolu i lo‘u ulu,
17na i ai foi i le ato aupitoaluga mea e ‘ai eseese ua tao mā Farao; na aai ai foi manu felelei i le ato na i luga o lo‘u ulu.
18Ona tali atu ai lea o Iosefa, ua faapea atu, O lona faamatalaga lenei; o ato e tolu e tolu ia aso.
19A o lei mavae aso e tolu ona avae ai lea e Farao o lou ulu mai ia te oe, na te faatautau foi ia te oe i luga o se laau; ona aai ai lea o manu felelei i lou tino.
20Ua oo foi i le aso tolu, o le faamanatuga lea o le aso na fanau ai Farao, na ia fai ai le tausamiga ma ana auauna uma; ona faaea ai lea e ia le ulu o le ua sili i e tautu uaina ma le ulu o le ua sili i e fai mea e ‘ai i luma o ana auauna.
21Ona ia toe tuu atu ai lea i le ua sili i e tautu uaina o lona faiva, na na tuuina atu ai le ipu i le aao o Farao.
22Ua na faatautau foi le ua sili i e fai mea e ‘ai, faapei ona faamatala atu ai e Iosefa ia te i laua.
23A ua le manatua Iosefa e le ua sili i e tautu uaina, a ua galo lava ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
