1Ua fetalai mai foi Ieova ia Mose ma Arona,
2ua faapea mai, Ina fai atu ia i le fanauga a Isaraelu, ia faapea atu ia te i latou, Ai se tagata ua i ai le gau i lona tino, o lona gau e leaga ai o ia.
3O le uiga foi lenei o lona leaga i lona gau, pe alu le suāvai i lona tino, pe punitia le suāvai ua le alu i lona tino, o lona leaga lava lea.
4O moega uma e taoto ai o ia ua i ai le gau e leaga ia, o mea uma foi na te nofo ai e leaga foi o ia.
5O sē pai atu foi i lona moega na te taia ona ofu, ma taele i le vai, e leaga foi o ia seia oo i le afiafi.
6O se nofo foi i le mea na nofo ai o ia ua i ai le gau, na te taia ona ofu, ma taele i le vai, e leaga foi o ia seia oo i le afiafi.
7O se na te pai atu i le tino o le ua i ai le gau, na te taia ona ofu, ma taele i le vai, e leaga foi o ia seia oo i le afiafi.
8A feanu atu foi o ia ua i ai le gau i le ua mamā, ona ta ai lea e ia ona ofu, ma taele i le vai, e leaga foi ia seia oo i le afiafi.
9O se nofoa solofanua e tietie ai o ia ua i ai le gau, e leaga lea.
10O se na te pai atu i se mea sa i ona lalo, e leaga o ia seia oo i le afiafi, o se na te ave foi se mea o ia mea, na te taia ona ofu, ma taele i le vai, e leaga foi o ia seia oo i le afiafi.
11O se ua pai atu i le ua i ai le gau, a o lei fafano ona lima i le vai, na te taia ona ofu, ma taele i le vai, e leaga foi o ia seia oo i le afiafi.
12O se ipu omea foi e pai atu i ai o le ua i ai le gau, e taeia lea; a o ipu laau uma e fufuluina ia i le vai.
13Pe a faamamāina o ia ua i ai le gau ai lona gau; ona faitau ai lea e ia o aso e fitu mo lona faamamāina, ona ta lea e ia ona ofu, ma taele lona tino i le vaipuna, ona mamā ai lea.
14O le aso valu foi na te au mai ai le uluga manutagi, po o tamai lupe e lua fua, ma alu atu i luma o Ieova i le faitotoa o le fale fetafai o le faapotopotoga, ma avane ai i le faitaulaga.
15E sauni ai foi e le faitaulaga le tasi e fai ma taulaga mo le agasala, a o le taulaga mu le tasi; ona fai ai lea e le faitaulaga le togiola mo ia i luma o Ieova ona o lona gau.
16Ai se tane ua alu le sua o lona tino, na te taelea lona tino uma i le vai, e leaga foi o ia seia oo i le afiafi.
17O ofu uma foi, ma pa‘u uma, ua i ai le sua o le tino, ia ta ia, e leaga foi seia oo i le afiafi.
18O le fafine foi la te momoe ma le tane e i ai le sua o le tino, ia taeele i laua i le vai, e leaga foi i laua seia oo i le afiafi.
19O le fafine foi, pe afai ua alu le ma‘i i lona tino, o le eleele foi lea, ona nofo ese ai lea o ia i aso e fitu; o se pai atu ia te ia e leaga ai o ia seia oo i le afiafi.
20O mea uma foi e taoto ai o ia, ina ua nofo ese, e leaga ia, o mea uma foi e nofo ai o ia e leaga ia.
21Ai se pai atu foi i lona moega, na te taia ona ofu, ma taele i le vai, e leaga o ia seia oo i le afiafi.
22Ai se pai atu foi i se mea na ia nofo ai, na te taia ona ofu, ma taele i le vai, e leaga foi o ia seia oo i le afiafi.
23Ai se mea ua i luga o le moega, po o se mea na ia nofo ai, a pai atu i ai se tasi, e leaga ai o ia seia oo i le afiafi.
24Afai foi la te momoe ma le tane, e oo foi lona leaga ia te ia, e leaga ai o ia i aso e fitu; o moega uma foi e taoto ai o ia e leaga ia.
25Ai se fafine ua alu le eleele i aso e tele a o lei oo i lona nofo ese, pe alu pea e sili i aso o lona nofo ese; o aso uma e alu ai lona ma‘i, e leaga ai o ia, e pei o aso lava o lona nofo ese, e leaga ai o ia.
26O moega uma e taoto ai o ia i aso uma e alu ai lona ma‘i, e fai lea ia te ia e pei o le moega o lona nofo ese; o mea uma foi e nofo ai o ia e leaga ia, e pei ona leaga i lona nofo ese.
27Ai se pai atu foi i ia mea, e leaga ai o ia, na te taia foi ona ofu, ma taele i le vai, e leaga foi o ia seia oo i le afiafi.
28Ae afai ua mamā o ia i lona ma‘i sa alu, ona faitau ai lea e ia o aso e fitu, a mavae atu ia, ona mamā ai lea o ia.
29O le aso valu foi na te aumaia le uluga manutagi, po o tamai lupe e lua fua, ma avatu ai i le faitaulaga i le faitotoa o le fale fetafai o le faapotopotoga.
30Ona sauni ai lea e le faitaulaga o le tasi e fai ma taulaga mo le agasala, ma le tasi e fai ma taulaga mu; ona fai ai lea e le faitaulaga le togiola mo ia i luma o Ieova, ona o lona ma‘i sa alu na leaga ai o ia.
31Ia faapea ona oulua faate‘aeseina le fanauga a Isaraelu i mea e leaga ai i latou; ina ne‘i oti i latou i o latou leaga, pe a leaga ia te i latou lo‘u malumalu ua ia te i latou.
32O lenei le tulafono ia te ia ua i ai le gau, atoa ma ia ua alu lona sua, e leaga ai o ia,
33atoa ma le ua faia le ma‘i o fafine, atoa ma le ua alu le ma‘i, o le tane, po o le fafine, o le tane foi ua la momoe ma le fafine a o i ai lona leaga.
Who We AreWhat We EelieveWhat We Do
2025 by iamachristian.org,Inc All rights reserved.
