1Vivii atu ia outou ia Ieova, auā e lelei lava o ia, auā e faavavau lava lona alofa.
2Ia faapea lava o e ua faaolaina e Ieova, o i latou na ia faaolaina nai le lima o lē faasaua,
3ma ua faapotopotoina i latou mai nuu, mai sasae ma sisifo, mai le itu i matu ma le itu i toga.
4Na feseai i latou i le vao, i le ala e lei uia; e lei maua e i latou se aai e nonofo ai.
5Sa matelaina i latou, ma fia inu, na lailoa o latou loto i totonu ia i latou.
6Ona alalaga lea o i latou ia Ieova i lo latou puapuaga; na ia laveai ia te i latou nai o latou tiga.
7Na ia ta‘ita‘iina foi i latou i le ala tonu, ina ia latou o atu ai i se aai e nonofo ai.
8Ia vivii atu i latou ia Ieova ona o lona alofa, ma ona vavega na fai i le fanau a tagata.
9Auā ua na faamălie i le tagata fia inu, o le tagata matelaina foi ua ma‘ona mai ia te ia i le mea lelei.
10O e nonofo i le pouliuli ma le ata o le oti, e ua noanoatia i le tiga ma le uamea;
11auā na latou fouvale i afioga a le Atua, ma latou ‘ino‘ino i le pule a lē Silisili ese;
12o le mea lea na ia faamaulaloina ai o latou loto i le galuega mamafa; na pauu i latou, a e leai se fesoasoani.
13Ona latou alalaga atu lea ia Ieova i lo latou puapuaga; na ia faaolaina i latou nai o latou tiga.
14Na ia aumaia i latou nai le pouliuli ma le ata o le oti, ua na motusia foi o latou noanoaga.
15Ia vivii atu i latou ia Ieova ona o lona alofa, ma ona vavega na fai i le fanau a tagata.
16Auā na ia lepeti i puipui ‘apa memea, ma ua vavaeina faamau uamea.
17O tagata vālea ona o lo latou solitulafono, ma la latou amio leaga, ua faatigaina ai i latou;
18ua ‘ino‘ino i latou i mea e ‘ai uma lava, ua faalatalata foi i latou i faitotoa o le oti.
19Ona alalaga lea o i latou ia Ieova i lo latou puapuaga; na ia faaolaina i latou nai o latou tiga.
20Ua ia auina atu lana afioga, ma faamalolo ia i latou, ma laveaiina ai nai lo latou malaia.
21Ia vivii atu i latou ia Ieova ona o lona alofa, ma ona vavega na fai i le fanau a tagata.
22Ia latou fai taulaga foi i taulaga o le viiga, ma ta‘u atu ma le olioli ana galuega.
23O i latou o e folau i vaa i le sami, o e fai galuega i le vasa tele;
24o i latou ia latou te vaaia galuega a Ieova, ma ona vavega e fai i le moana.
25Auā ua fetalai ane ia, ma faatupuina le afā, ua laga ai ona peau; e o ae i latou i le lagi,
26e toe o ifo i lalo, ua liu suāvai ai o latou loto i le atuatuvale;
27e tautevateva i latou ma tausuai pei o le tagata onā, ua faaumatia foi o latou atamamai uma lava.
28Ona latou alalaga atu lea ia Ieova i lo latou puapuaga; ua ia aumaia i latou nai o latou tiga.
29Ua liua e ia le afā i le malū, ua taoto ia te ia le au peau.
30Ona latou fiafia lea, auā ua malū; ua na ta‘ita‘iina foi i latou i le taulaga na latou loto i ai.
31Ia vivii atu i latou ia Ieova ona o lona alofa, ma ona vavega na fai i le fanau a tagata.
32Ia latou faaneenee ia te ia i le faapotopotoga o le nuu, ma ia vivii atu ia te ia i le saofaiga a toeaina.
33E liua e ia o vaitafe e fai ma vao, o vaipuna foi e fai ma fanua naumati;
34o le fanua lafulemu e fai ma mea lafulafua, ona o le amio leaga a e nonofo ai.
35E liua e ia le vao e fai ma vailepa, o le fanua naumati foi e fai ma vaipuna.
36Na te faanofo ai foi e ua matelaina; e sauniuni ai foi e i latou o le aai e nonofo ai;
37ma latou lulu ai saito i fanua, ma totō ai tovine, e fua mai ai ona fua e tele.
38E faamanuia foi e ia i latou, e matuā faatoateleina foi i latou; e le faaitiitia foi e ia a latou manu.
39Ua faatoaitiitia foi i latou ma faamaulaloina, ona o le faasaua, ma le agaleagaina, ma le faanoanoa.
40E faainosia e ia o alii, ma faaseseina i latou i le mea gaogao, e le o i ai se ala.
41A e faaeaina e ia o le ua mativa nai le puapuaga, ma tuuina atu o aiga mo ia, e pei o se lafu mamoe.
42E iloa atu e ua amiotonu ma latou olioli ai; a o e amio leaga uma lava e mapuni ai o latou gutu.
43O le ua poto na te tausia nei mea; e iloa e i latou o mea alofa a Ieova.
Who We AreWhat We EelieveWhat We Do
2025 by iamachristian.org,Inc All rights reserved.
