1Ua nofo Tavita i lona fale, ona fai atu ai lea o Tavita ia Natano le perofeta, Faauta, ua ou nofo i le fale arasi, a o le atolaau o le feagaiga a Ieova, ua i lalo o ie puipui.
2Ona fai mai ai lea o Natano ia Tavita, O mea uma ua e finagalo i ai ia e faia, auā o ia te oe le Atua.
3O lea lava po na tūlei mai ai le afioga a le Atua ia Natano, ua faapea mai,
4Alu ia, ma fai atu i la‘u auauna o Tavita, Ua faapea ona fetalai mai o Ieova, e te le faia se fale mo a‘u ou te nofo ai;
5auā ua ou le nofo i se fale talu mai le aso na ou aveina ae ai Isaraelu ua oo mai i le aso nei, a ua ou i ai i lea fale ie ma lea fale ie, o lea malumalu ma lea malumalu.
6O mea uma na ou fealuai ai ma Isaraelu uma, pe na ou fai atu ai ea se upu i se tasi faamasino o Isaraelu, na ou poloai e leoleo i lo‘u nuu, e faapea, Se a le mea tou te le fai ai se fale arasi mo a‘u?
7O lenei foi, ia faapea ona e fai atu i la‘u auauna o Tavita, O loo faapea ona fai mai o Ieova o ‘au, O a‘u na ou aumaia oe ai le lotoā mamoe, na e mulimuli i mamoe, ina ia faia oe ma ta‘ita‘i i lo‘u nuu o Isaraelu.
8Na ou i ai foi ia te oe i mea uma na e alu i ai, ma ou faaumatia nai ou luma e na ita ia te oe uma lava; na ou faia foi mo oe le igoa pei o igoa o alii tetele i le lalolagi.
9Ou te tuu atu foi se mea e nofo ai lo‘u nuu o Isaraelu, ma ou totōina i latou, e mau ai i latou i o latou lava nuu, e le toe faagaeetia i latou; e le toe faatigaina foi i latou e tagata amio leaga, e pei o anamua;
10talu foi ia ona po na ou poloai ai i faamasino e pule i lo‘u nuu o Isaraelu. Ou te faatoilaloina foi i latou uma o e ita mai ia te oe. Ou te ta‘u atu foi ia te oe, e faia e Ieova se aiga mo oe.
11A oo ina faaatoaina ou aso e faatasiina atu ai oe ma ou tamā, ona ou faatuina lea o so lau fanau pe a mavae atu oe, o sou atalii foi, ou te faatumauina lona malo.
12E faia e ia se fale mo a‘u ou te faatumauina foi lona nofoālii e faavavau.
13E fai a‘u mona tamā, e fai o ia mo‘u atalii; ou te le aveeseina lo‘u alofa ia te ia, e pei ona ou aveeseina i le na muamua ia te oe;
14a ou te faatumauina o ia i lo‘u fale ma lo‘u malo e faavavau; e faatumauina foi lona nofoalii e faavavau lava.
15E tusa ma nei upu uma, e tusa ma nei mea uma foi e faaalia mai, sa faapea ona tautala atu ai o Natano ia Tavita.
16Ona alu atu lea o le tupu o Tavita, ma nofo atu i luma o Ieova; ona fai atu ai lea o ia, Ieova e, le Atua, o ai ea a‘u nei? O ai foi lo‘u aiga, ina ua e faaoo mai ia te au i lenei aso?
17A o le mea itiiti lena i ou luma, le Atua e, a ua e fetalai mai i le aiga o lau auauna i aso e tele o lumanai; Ieova le Atua e, ua e silasila mai foi ia te au e peiseai o se tagata silisili.
18Se a se toe mea e fai atu ai Tavita ia te oe i le faamamaluina o lau auauna? Auā ua e silafia lau auauna.
19Ieova e, ua faia e oe o lenei mea tele uma, i lou faaali mai ia mea tetele uma, ona o lau auauna, e tusa foi ma lou lava finagalo.
20Ieova e, e leai se tusa ma oe, e leai se Atua na o oe lava, e tusa ma mea uma ua faalogologo i ai o matou taliga.
21O ai ea se tasi nuu i le lalolagi e tusa ma lou nuu o Isaraelu, o le na afio atu ai le Atua e laveai e fai mona lava nuu, e fai mo oe le suafa tele ma le matautia, ina ua tulia o nuu ese i luma o lou nuu na laveaiina e oe nai Aikupito?
22Na faia e oe o lou nuu o Isaraelu mou lava nuu e faavavau; o oe foi, Ieova e, ua fai oe mo latou Atua.
23O lenei, Ieova e, ia e faataunuuina e faavavau le mea ua e fetalai mai i lau auauna ma lona aiga, ma ia e faia e tusa ma lau afioga.
24Ia faataunuuina lava, ina ia faamamaluina lou suafa e faavavau, e faapea, O Ieova o ‘au o le Atua o Isaraelu, o le Atua lava ia Isaraelu; ma ia faatumauina le aiga o Tavita lau auauna i ou luma.
25Auā o oe, lo‘u Atua e, ua e faaali mai i lau auauna e te faia se aiga mo ia; o le mea lea ua manatu ai a‘u lau auauna e tatalo atu i ou luma.
26O lenei, Ieova e, o oe lava le Atua, na e fetalaia mai lea mea lelei i lau auauna.
27O lenei foi, ia e finagalo e faamanuia le aiga o lau auauna, ina ia i ai i ou luma e faavavau; auā, Ieova e, a faamanuia e oe, ona manuia ai lea e faavavau.
Who We AreWhat We EelieveWhat We Do
2025 by iamachristian.org,Inc All rights reserved.
