1Ua tusia le agasala a Iuta i le peni uamea ma le mata o le samira; ua togitogi i le papatusi o latou loto, ma nifo o outou fata faitaulaga;
2a o manatua e a latou fanau o latou fata faitaulaga, ma o latou tupua o Asaira i laau lauolaola i luga o mauga maualuluga.
3Lo‘u mauga e o i le vao, ou te avatua au mea ma au oloa uma e fai ma vete, atoa ma au mea maualuluga e fai ai agasala i lou nuu uma.
4O oe lava e tuua ai e oe lou tofi na ou foaiina atu ai ia te oe; ou te tuuina atu foi oe e auauna i e ita ia te oe i le nuu ua e le iloa; auā ua tugia e outou le afi i lo‘u ita e mu ai e faavavau.
5O loo faapea ona fetalai mai o Ieova, Ia malaia le tagata e faatuatua i tagata, ma ua fai tagata mona lima a ua liliu ese lona loto ia Ieova.
6E avea o ia pei o le tula i le vao, na te le iloa foi pe a oo mai mea lelei; e mau ai o ia i mea paaa i le vao, o le nuu naumati ma le le āina.
7Amuia le tagata o lē faatuatua ia Ieova, o le ua fai Ieova mona faatuatuaga.
8Auā o ia e faapei o le laau ua totō i tafatafa ane o le vai, ua sosolo atu ona aa i tafatafa ane o le vaitafe, na te le iloa foi pe a oo mai le vevela, a e lauolaola ona lau; e le atuatuvale i le tausaga o le la mala, e fua mai pea lava ona fua.
9E sili le faa‘ole‘ole o le loto i mea uma, ma ua matuā leaga lava; po o ai na te mafaia ona iloa?
10O a‘u o Ieova o lē suesue i le loto, o lē tofotofo i manatu, ina ia tuuina atu i tagata taitasi e tusa ma ona ala, e tusa foi ma le fua o ana amioga.
11Ua moe le koli i fua, a e le ni ona fua; e faapea o ia e maua le oa, a e le maua i le amiotonu, e tuu e ia ana oa i le tautuluaga o ona aso, a e avea o ia ma vale i lona gataaga.
12O le mea o i ai lo tatou malumalu, o le nofoālii mamalu lea ma le maualuga mai le amataga.
13Ieova e, le faamoemoe o Isaraelu, e faamaina i latou uma o e lafoai ia te oe; o i latou e liliu ese ia te au e tusia i latou i le eleele, auā ua lafoaiina e i latou o Ieova le puna o vai ola.
14Ieova e, ia e faamalolo mai ia te au, ona malolo ai lea o a‘u; ia e faaola mai ia te au, ona faaolaina ai lea o a‘u; auā o oe ou te vivii i ai.
15Faauta, ua latou fai mai ia te au, O fea o i ai le afioga a Ieova? Se‘i oo mai lava.
16A o a‘u nei, ua ou le popole ina ia le fai a‘u ma leoleo mamoe e mulimuli atu ia te oe; ua ou le manao foi le aso vale, ua silafia e oe; o le mea ua alu atu i o‘u laugutu; ua i ou luma lea.
17Aua ne‘i fai oe ma faamatau ia te au; o oe lo‘u malu i le aso vale.
18Ia faamaina i latou o e tuliloa mai ia te au, a e aua le faamaina a‘u; ia matatau i latou, a e aua le mata‘u o a‘u; ia faaootia ia te i latou le aso vale, ma ia faaumatia i latou i le malaia e sautualua.
19Ua faapea ona fetalai mai o Ieova ia te au, Alu ia, ina tu i le faitotoa o tagata o le nuu, e ulu mai ai tupu o Iuta ma o atu ai i latou; ia e tu foi i faitotoa uma o Ierusalema;
20ma ia e faapea atu ia te i latou, Ia outou faalogologo mai i le afioga a Ieova, o outou tupu o Iuta, ma Iuta uma atoa ma outou uma o e o nonofo i Ierusalema, o e ulu mai i nei faitotoa;
21o loo faapea ona fetalai mai o Ieova, Ia outou ia te outou, ina ne‘i ave se avega i le aso sapati, aua foi le au mai ai i faitotoa o Ierusalema;
22aua foi ne‘i avatua se avega nai o outou fale i le aso sapati, aua foi tou te fai ai se galuega e tasi, a ia faapaiaina e outou le aso sapati, e pei ona ou fai atu ai i o outou tamā.
23A ua latou le faalogo mai, ma ua le uai mai o latou taliga, a ua latou faamaaa o latou ua, ina ia latou le faalogo mai, ma ia le talia mai le aoaiga.
24Afai foi tou te matuā faalogo mai ia te au, o loo fetalai mai ai Ieova, ma outou le aumaia se avega i faitotoa o lenei aai i le aso sapati, a e faapaiaina e outou le aso sapati, ma outou le fai ai se galuega e tasi;
25ona o mai ai lea i faitotoa o lenei aai o tupu ma alii o nonofo i le nofoālii o Tavita, o tietie i nofoa faataavalevale ma solofanua, o i latou, ma o latou alii, o tagata o Iuta, ma e o nonofo i Ierusalema; e āina foi lenei aai e faavavau.
26E o mai i latou mai aai o Iuta, ma mea ua vagavagai i Ierusalema, ma le nuu o Peniamina, ma le nuu maulalo, ma mauga, ma le itu i toga, latou te aumaia taulaga mu, ma taulaga, ma taulaga i mea e ‘ai, ma pulu lipano, o i latou foi e au mai taulaga faaneenee i le fale o Ieova.
27A e afai tou te le faalogo mai ia te au, ma outou le faapaiaina le aso sapati, a ua ave ai se avega, ma ua ulu mai i faitotoa o Ierusalema i le aso sapati; ona ou tŭtŭina ai lea o le afi i ona faitotoa e susunuina ai maota o Ierusalema, e le tineia lava.
Who We AreWhat We EelieveWhat We Do
2025 by iamachristian.org,Inc All rights reserved.
