1Ona fetalai lea o Ieova ia Mose, o loo faapea mai,
2Ia faasaina mo a‘u o ulumatua uma lava, e taitasi uma lava e muai fanau mai i le fanauga a Isaraelu, o tagata atoa ma manu, e fai lava ia mo a‘u.
3Ua fai atu foi Mose i le nuu, Ia manatua lenei aso, ua outou o mai ai nai Aikupito o le mea sa nofo pologa ai; auā o le aao malosi ua au mai ai outou e Ieova; aua ne‘i ‘aina ai se mea e faafefeteina.
4O le aso nei ua outou o mai ai i le masina o Apipa.
5A uma ona faaootia oe e Ieova i le nuu o sa Kananā, ma sa Hetī, ma sa Amorī, ma sa Hivī, ma sa Iepusē, na ia tauto ai i ou tamā, e avatu ia te oe, o le nuu o loo tafe ai le suāsusu ma le meli, ia e auauna mai lava i lenei sauniga i lenei lava masina.
6O aso e fitu e te ‘ai ai areto e le faafefeteina; o lona aso e fitu foi e te fai ai le tausamiga ia Ieova.
7Ia ‘aina le areto e le faafefeteina i aso e fitu; a e aua ne‘i iloa ia te oe se mea e faafefeteina, aua foi ne‘i iloa ia te oe sina mea e faafefete a‘i i lou nuu uma lava.
8E te faaali atu foi i lou atalii i lea aso, e faapea atu, E fai lenei mea ona o le mea na faia e Ieova ia te au, ina ua ia aumaia a‘u nai Aikupito.
9E fai foi ma faailoga ia te oe i lou lima, ma faamanatuga i le va o ou mata, ina ia i ai i lou gutu le tulafono a Ieova; auā o le aao malosi na ta‘ita‘iina mai ai oe e Ieova nai Aikupito.
10Ia e tausiusi foi i lenei sauniga i ona aso ua tofia i lea tausaga ma lea tausaga.
11A uma ona faaootia oe e Ieova i le nuu o sa Kananā, e tusa ma le mea na ia tauto ai ia te oe ma ou tamā, e avatua ia te oe;
12ona e tuuina atu lea ia Ieova o i latou uma o e muai fanau mai, atoa uma ma le muai fanau mai i au manu; o tane lava e tuuina atu ia Ieova.
13A o le uluai fanauga a asini uma, ia e sui a‘i i se tamai mamoe; afai foi e te le suia, ia e vavae lona ua; o ulumatua uma lava a tagata i lau fanau, ia e avatu ai sona sui.
14A fesili mai lou atalii ai te oe i se aso, e faapea mai, Se a ea lenei? Ona e tali atu lea ia te ia, O le aao malosi na ta‘ita‘iina mai ai i matou e Ieova nai Aikupito, o le mea sa nofo pologa ai.
15Auā na le mafai e Farao ona tuuina mai i matou e o, ona fasiotia lea e Ieova o ulumatua uma lava i le nuu o Aikupito, o le ulumatua a tagata atoa ma ulumatua a manu; o le mea lea ou te fai ai le taulaga ia Ieova i manu poa uma lava e muai fanau mai, a o ulumatua uma lava a la‘u fanau ou te avatu ai se sui.
16E fai foi ma faailoga i lou lima, ma pale i le va o ou mata; auā o le aao malosi na ta‘ita‘iina ai tatou e Ieova nai Aikupito.
17Na tuuina mai e Farao le nuu e o, ona le ta‘ita‘iina lea o i latou e le Atua i le ala o le nuu o Filistia, e ui lava ina latalata lea; auā na fetalai ane le Atua, ne‘i salamo le nuu pe a latou iloa le taua, ona latou toe foi atu lea i Aikupito.
18A ua faataamiloina le nuu e le Atua i le ala e ui ai i le vao i le sami Ulaula; na o ae foi le fanauga a Isaraelu nai le nuu o Aikupito faa‘au o taua.
19Ua ave foi e Mose o ivi o Iosefa, auā na matuā tauto le fanauga a Isaraelu, ina ua fai atu ai o ia, o loo faapea mai, E asiasi mai lava le Atua ia te outou, tou te avae foi o‘u ivi ai le mea nei.
20Ona latou o lea i la latou malaga nai Sukota, ua to lauapi i Etama i le pito vao.
21Ua afio Ieova i o latou luma i le ao faaniutu i le ao, e ta‘ita‘iina ai i latou i le ala, a o le afi faaniutu i le po e faamalamalama a‘i i latou, ina ia savavali i le ao atoa ma le po.
22E lei aveesea e ia le ao faaniutu i le ao, ma le afi faaniutu i le po i luma o le nuu.
Who We AreWhat We EelieveWhat We Do
2025 by iamachristian.org,Inc All rights reserved.
