1A e le pouliuli pea i le nuu ua puapuagatia; faapei ona ia faaleaogaina anamua o le nuu o Sepulona ma le nuu o Nafatali; e faapea ona ia faamamaluina ai i ona po amuli; o le ala i le vai, o le mea i tala ane o Ioritana, o Kalilaia o nuu ese.
2O le nuu sa savavali i le pouliuli, ua latou iloa le malamalama tele; o e sa nonofo i le nuu o le ata o le oti, ua pupula mai ia te i latou le malamalama.
3Ua e faatoateleina le nuu, ua e faateleina lo latou fiafia, latou te fiafia i ou luma, e pei ona fiafia i le seleselegāsaito, e pei ona olioli o i latou o e tufatufa vete.
4Auā ua e gauia le amo o lana avega, ma le sasa na i lona ua, o le tootoo o le na saua ia te ia, pei ona fai i le aso o Mitiana.
5Auā o seevae uma o e ua faaseeina, ua taalili i le taua, ma le ofu ua liloia i le toto, e susunuina ia mea, e fai foi ma fafie o le afi.
6Auā ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu.
7E leai se mea e gata mai ai ona tele o lona malo ma le filemu o lona malo i le nofoālii o Tavita ma lona malo, e faatumauina, ma faamausali i le faamasinoga ma le amiotonu, e afua mai i ia ona po e oo i le faavavau; e faia lea mea i le maelega o Ieova o ‘au.
8Na tuuina mai e le Alii lana afioga ia Iakopo, ua paū mai foi ia Isaraelu.
9E iloa ai foi e le nuu uma, o Efaraima ma e o nonofo i Samaria, o loo faapea mai i le faamaualuga ma le faafefeteina o latou loto.
10Ua solo maaomea, a e matou te ati ae i maa talai; ua tatuuina sukamoru, a e matou te sui i arasi.
11O le mea lea e faaosoina atu ai ia te i latou e Ieova o e ua ita ia Resina, na te avatua foi auupega i e ua ita ia te i latou;
12o Suria i luma, ma Filisitia i tua, latou te ‘aina lava Isaraelu ma le gutu ua faamaga. E ui lava i ia mea uma, e lei liliu ese lona toasa, a e faaloaloa pea lona aao.
13Auā ua le foi mai le nuu i le na te taia i latou; o Ieova o ‘au foi ua latou le saili ia te ia.
14O le mea lea e vavaeeseina ai e Ieova le ulu ma le iu o Isaraelu, o le lau pama atoa ma le fiso i le aso lava e tasi.
15O le toeaina ma le alii mamalu o le ulu lea; o le perofeta ua a‘oa‘o i le pepelo o le iu lea.
16Auā o e ua fai ma ta‘ita‘i o lenei nuu, latou te faaseseina i latou; o e ua ta‘ita‘iina foi e i latou, ua faaumatia i latou.
17O le mea lea e le fiafia ai le Alii i o latou taulelea, le alofa foi o ia i a latou tama ua aumatuā ma o latou fafine ua oti a latou tane; auā o i latou uma ua faalematau ma fai amio leaga, ua tautala foi gutu uma i mea leaga. E ui lava i ia mea uma, e lei liliu ese lona toasa, a e faaloaloa pea lona aao.
18Auā e mu le amio leaga e pei o le afi, e susunuina ai laau tuitui ma laau talatala; e faamuina foi le vao filifili, ua o ae ai i latou peiseai se asu faaniutu.
19O le toasa o Ieova o ‘au e susunu ai le laueleele, e faia foi le nuu e pei o fafie o le afi; latou te le alofa le tasi i le tasi.
20E saei le tasi i le itu taumatau a e fia ‘ai pea; e ‘ai foi i le itu tauagavale, a e le ma‘ona lava; e taitasi ma ‘ai le aano o lona lava lima.
21E ‘aina Efaraima e Manase, e ‘aina foi Manase e Efaraima, e faatasi i laua e faasaga tau ia Iuta. E ui lava i ia mea uma, e lei liliu ese lona toasa, a e faaloaloa pea lona aao.
Who We AreWhat We EelieveWhat We Do
2025 by iamachristian.org,Inc All rights reserved.
