1Ua faapea ona faaalia mai ia te au e le Alii o Ieova; faauta mai, o le ato fua otatā.
2Ona faapea mai lea o ia, Amosa e, pe se a ea se mea ua e iloa? I le ua ou tali atu, O le ato fua otatā. Ona faapea mai ai lea o Ieova ia te au, Ua oo mai le iuga i lo‘u nuu o Isaraelu, ou te le toe sopoia lava.
3E fai ma uio pese o le maota i lea aso, o loo fetalai mai ai le Alii o Ieova; e i ai i mea uma tino o tagata oti e tele, e lafoaiina ma le le feganavai.
4Ia outou faalogologo i lenei mea, o outou o e faasaua i e matitiva, ina ia faaumatia lava le au matitiva o le nuu,
5o loo faapea mai, Pe mavae atu afea le masina faatoa vaaia ia tatou faatau ai saito? pe mavae afea foi le sapati ia tatou tatalaina atu ai saito? o loo faaitiitiina foi le efa, ma faateleina le sekeli, o loo fai fua faaletatau e pepelo ai.
6Tatou te faatau foi tagata matitiva i ario, ma le tagata vaivai i seevae e lua; tatou te faatau atu foi saito leaga.
7Ua tauto Ieova i le mamalu o Iakopo, E le galo lava ia te au e faavavau a latou galuega uma.
8E le gatete ea le laueleele ona o lenei mea, ma faanoanoa ai i latou uma o e nonofo ai? e le matuā alu ae ea e pei o se vaitafe? e le lafoaiina ea ia ma lofia, e pei o le vaitafe o Aikupito?
9O loo fetalai mai le Alii o Ieova, O lea aso ou te faagotoina ai le la i le aoauli, ou te faapouliuligia foi le lalolagi i le ao malamalama.
10Ou te liu i faanoanoaga a outou tausamiga, ou te liliu foi o outou pese uma i auega; ou te faalavalava foi sulugatiti uma i le ie talatala, o ulu foi o tagata uma e selemamaina ia; ou te faia lea mea ia pei o le pese e aualofa a‘i ona o le atalii e toatasi, o lona iuga foi, o le aso vale lava lea.
11O loo faapea mai le Alii o Ieova, Faauta, e oo mai aso ou te tuuina atu ai le oge i le nuu; e le se oge i mea e ‘ai, po o se gālala i le fia inu vai, a o le oge i le faalogologo i afioga a Ieova.
12Latou te feoai e pau mai i le tasi vasa e oo atu i le isi vasa, e pau mai i le itu i matu e oo atu i le itu i sasae latou te feoai ai e sailiili atu ai le afioga a Ieova, a e le maua.
13E vaivai i le fia inu i lea aso o taupou lalelei atoa ma taulelea.
14O i latou o e tauto i le agasala a Samaria, ma faapea atu, Tanu e, ua soifua lou atua; i le ma lea, Ua ola le ala o Peresepa; e pauu lava i latou, latou te le toe tutulai.
Who We AreWhat We EelieveWhat We Do
2025 by iamachristian.org,Inc All rights reserved.
