1Ua mavae ia mea, ona o mai ai lea o le fanauga a Moapi, ma le fanauga a Amoni, e faatasi ma i latou foi nisi o sa Amonī, e tau ma Iosefatu.
2Ona o mai lea o isi, ma fai mai ia Iosefatu, ua faapea mai, O loo o mai le vao tagata e matuā toatele e tau ma oe, mai le la itu o le sami, mai Suria; faauta foi, o i Haseso Tamara i latou, o Enokati lea.
3Ona mata‘u ai lea o Iosefatu, ua ia faamalosi ai e sailiili ia Ieova, ma ua tala‘iina e ia le anapogi ia Iuta uma.
4Ona faapotopoto ai lea o Iuta e sailiili ia Ieova; ua latou o mai foi mai aai uma o Iuta e sailiili ia Ieova.
5Ona tulai lea o Iosefatu i le faapotopotoga o Iuta ma Ierusalema, i le fale o Ieova, i luma o le lotoā fou, ua faapea atu, Ieova e,
6le Atua o matou tamā, e le o le Atua ea oe i le lagi? E te le pule ea oe i malo uma o nuu ese? E le o i lou aao ea le mana ma le malosi, e le mafaia e se tasi ona tetee atu ia te oe?
7E le o lo matou Atua ea oe, na e tulia i latou sa nonofo i lenei nuu i luma o lou nuu o Isaraelu, ma ua foaiina mai ai i le fanau a Aperaamo lau uo e faavavau?
8Ua latou nonofo ai, ma fai ai mo oe le malumalu mo lou suafa, sa faapea atu,
9Afai e oo mai mea leaga ia te i matou, o le pelu, po o le sala, po o le faamai, po o le oge, ma matou tutū i luma o lenei fale, atoa ma ou luma, auā o i ai lou suafa i lenei fale, ma matou valaau atu ia te oe i lo matou puapuaga, ona e faafofoga mai ai lea, ma faaola mai.
10O lenei foi, ia e sisila mai, o le fanauga a Amoni, ma Moapi, ma le mauga o Seira, o i latou na e le mafai ona tuu mai ia Isaraelu ia osofia i latou, ina ua latou o mai mai le nuu o Aikupito, a ua latou ‘alo ese ia te i latou, ma ua le faaumatia i latou;
11silasila ia i latou, ua faapea ona latou taui mai ia te i matou, ua o mai e tutuli ia te i matou ai lou tofi na e foai mai mo i matou.
12Lo matou Atua e, e te le faamasino ea ia te i latou? Auā e leai so matou malosi e tetee i lenei vao tagata e toatele, ua o mai e tau ma i matou; ua matou le iloa foi se mea e fai; a ua faasaga atu i matou ia te oe.
13Ua tutū Iuta uma i luma o Ieova, ma o latou tama iti, o a latou avā, ma a latou fanau.
14Ona oo mai lea o le Agaga o Ieova i luga o Iaaseelu i totonu o le faapotopotoga, o ia o le atalii o Sakaria, o le atalii ia o Penaia, o le atalii ia o Ieielu, o le atalii ia o Matania, o lo sa Levī, o lo le fanauga a Asafo;
15ua ia faapea atu, O outou Iuta uma, ma e ua nonofo i Ierusalema, ma oe le tupu o Iosefatu, ina faafogafoga mai ia outou, o loo faapea ona fetalai mai o Ieova ia te outou, Aua ne‘i fefefe, aua foi ne‘i matatau outou, ona o lenei vao tagata e toatele; auā e le o lo outou taua lenei, a o lo le Atua.
16Ia outou o ifo taeao ia te i latou; faauta, ua o ae i latou i le aega i Sesa; tou te maua foi i latou i le mea e taunuu ai le alia e feagai ma le vao o Ieruelu.
17E le tau outou i lenei taua; tutū ia outou, ma ia outou tumau, ma outou vaai atu i le olataga mai ia Ieova o loo ia te outou; Iuta ma Ierusalema e, aua le fefefe, aua foi le matatau; ia o atu taeao ia te i latou; e ia te outou foi o Ieova.
18Ona punou lea o Iosefatu i lalo i le eleele; ua faapaū foi Iuta uma ma e ua nonofo i Ierusalema i luma o Ieova, ua ifo atu ia Ieova.
19O sa Levī, o le fanauga a sa Koatō, ma le fanauga a sa Korū, ua tutū i latou e vivii ia Ieova le Atua o Isaraelu i le leo tele ma le maualuga.
20Ua latou ala tulai i le taeao, ma o atu i le vao o Tikoa; o loo o atu i latou, ona tu atu lea o Iosefatu, ua faapea atu, Iuta e, ma outou e nonofo i Ierusalema, faalogologo mai ia ia te au. Ina faatuatua ia ia Ieova lo outou Atua, ona faatumauina lea o outou; ia outou faatuatua i ana perofeta, ona outou manuia ai lea.
21Ua ia filifili ma le nuu, ona tofia lea e ia o e pepese ia Ieova, ma ē vivii atu ua ia i latou teuga paia, i lo latou o atu i luma o ‘au, ma latou fai atu, Ia faamanū atu ia Ieova, auā e faavavau lona alofa.
22Ua latou amata ona pepese ma vivii atu, ona tuu atu lea e Ieova o ‘au ua tanu e tau ma le fanauga a Amoni, ma Moapi, ma le mauga o Seira, na o mai e tau ma Iuta; ua fāsia i latou.
23Auā na tulai le fanauga a Amoni ma Moapi e tau ma e nonofo i le mauga o Seira, e matuā fasioti ma faaumatia ai i latou; ua uma ona latou fāsia o e nonofo i Seira, ona fefasiai ai lea o i latou.
24Ua oo atu Iuta i le ‘olo e leoleo ai ua i le vao, ona latou vaavaai atu ai lea i le vao tagata, faauta, o i latou o tagata oti, ua taatitia i latou i le eleele, ua leai se sao.
25Ua o mai Iosefatu ma lona nuu e vete mai a latou mea, ona latou maua lea ia te i latou o oloa e tele i tino o tagata oti, atoa ma teuga matagofie, ua latou to ese mo i latou, ua le mafai ona la‘u; o aso e tolu o vete ai le oloa ina ua matuā tele ia.
26O le aso fa na latou faapotopoto ai i le vanu o Peraka; auā na latou faamanū ia Ieova i lea mea; o le mea lea ua faaigoa ai lea lava mea, o le vanu o Peraka ua oo mai i le aso nei.
27Ona foi mai lea o i latou, o tagata uma o Iuta ma Ierusalema, ma Iosefatu na muamua i o latou luma e toe foi i Ierusalema ma le fiafia, auā ua faafiafiaina i latou e Ieova i e na ita mai ia i latou.
28Ua latou o mai i Ierusalema ma napeli, ma kitara, ma pu, i le fale o Ieova.
29Sa i ai le mata‘u i le Atua i malo uma o ia nuu, ina ua latou faalogologo na tau Ieova ma i latou e ua ita mai ia Isaraelu.
30Sa toalemu le malo o Iosefatu; auā na tuuina mai le filemu ia te ia e lona Atua i itu uma.
31Ua fai Iosefatu ma tupu ia Iuta. E tolu sefulu ma le lima ona tausaga ina o fai o ia ma tupu; na fai foi o ia ma tupu i Ierusalema i tausaga e lua sefulu ma le lima. O Asopa le igoa o lona tinā, o le afafine o Seleki.
32Na savali o ia i le ala o Asa lona tamā, na le alu ese ai o ia; na faia e ia o mea tonu i luma o Ieova.
33A ua le aveeseina o mea maualuluga; auā o ona po ia ua le saunia ai e le nuu o latou loto i le Atua o latou tamā.
34O toe o mea na faia e Iosefatu, o mea muamua ma mea mulimuli, faauta, ua tusia i le tala a Ieu le atalii o Hanani, ua ta‘ua i le tusi i tupu o Isaraelu.
35Ua mavae ia mea, ona faatasi lea o Iosefatu le tupu o Iuta ma Aasaia le tupu o Isaraelu o le na fai amio matuā leaga.
36Na ia faatasi ma ia e fai vaa ai, e ō i Tasesa; na latou fai vaa i Esiokape.
37Ona vavalo lea o Elisara, le atalii o Totava o le Maresa, ia Iosefatu, ua faapea atu, Ua faamalepeina e Ieova au galuega, ina ua e faatasi ma Aasaia. Ona lepetia lea o vaa, ua le mafai ai ona ō i Tasesa.
Who We AreWhat We EelieveWhat We Do
2025 by iamachristian.org,Inc All rights reserved.
