1O le ua vavae ese, ua saili o ia i lona manao; e finau o ia i le poto uma lava.
2E le manao le vale i le faautauta; ua na ona ia faaali o lona loto.
3A sau le tagata agasala, ua sau faatasi ai foi le ‘ino‘ino; e sau foi le luma faatasi ma le amio matagā.
4O upu a le gutu o le tagata, o vai loloto ia; o le puna o le poto, o le alia ola lava lea.
5E le lelei ona ‘au ma le tagata agasala, ina ia faiaina i le faamasinoga le ua amiotonu.
6E o atu laugutu o le vale i le misa; ua valaau foi lona gutu i ta.
7O le gutu o le vale e fano ai o ia; o ona laugutu foi, o le mailei lea o lona ola.
8O upu a lē faatuaupua, e tusa ia ma mea suamalie; ua oo ifo i totonu lava o le manava.
9O le ua paie foi i lana galuega, la te uso ma le na te faamāumau mea.
10O le suafa o Ieova, o le ‘olo malosi lea; e sola atu i ai lē amiotonu, ona sao ai lea o ia.
11O le oloa o le mauoa, o lona ‘olo malosi lea; e pei o le pa maualuga foi i lona lava manatu.
12E muamua ona faamaualuga o le loto o le tagata, i le malaia o ia; a e muamua le faamaulalo i le mamalu.
13O le na te tali atu i le upu, a o lei faalogo i ai, e fai lea mona valea, ma mea e faamāina ai o ia.
14O le loto o le tagata, na te faatoatoa ai lona ma‘i; a o le loto faanoanoa, o ai se na te lavā onosai?
15O le loto o le ua mafaufau na te maua le poto; o taliga foi o le ua poto, e saili ia i le poto.
16O le mea alofa a le tagata e faalauteleina ai se ala mona; e ta‘ita‘iina ai foi o ia i luma o alii.
17E tonu le ua muamua i lana finauga, a e sau le tasi tagata, ona suesue ai lea o ia ia te ia.
18O le vili e iu ai misa; e māvae ai foi ē fitafita.
19O le tagata ua agaleagaina e lona uso, e sili o ia ona faigata i le ‘olo; o misa foi o uso e tusa ia ma faamaufaalava o le ‘olo.
20O le fua o le gutu o le tagata e ma‘ona ai lona manava; e ma‘ona o ia i mea e tupu mai i ona laugutu.
21O le oti ma le ola, o loo i le pule a le laulaufaiva ia; o e mananao i ai latou te aai i lona fua.
22O le ua maua le avā, ua maua e ia le mea lelei; ua maua foi e ia le alofa mai ia Ieova.
23E tautala mai ma le aioi le ua mativa, a o le mauoa e tali atu o ia ma le faasiasia.
24O le tagata ua fai ana uo, e iu ina tigaina ai o ia; a o i ai le tagata alofa e sili ona pipii mai i lo le uso.
Who We AreWhat We EelieveWhat We Do
2025 by iamachristian.org,Inc All rights reserved.
