1Ua lagona e tupu uma sa i le itu mai o Ioritana, i mauga, ma nuu maulalo, ma itu uma o le sami tele e feagai ma Lepanona, o sa Hetī, ma sa Amorī, o sa Kananā, o sa Perisē, o sa Hivī, ma sa Iepusē;
2ona faapotopoto faatasi ai lea o i latou e tau ai le taua ma Iosua ma Isaraelu; ua loto gatasi.
3Ua faalogo e na nonofo i Kipeona i mea ua faia e Iosua i Ieriko ma Ai;
4ona latou fai togafiti faa‘ole‘ole lea, ua latou o, ma faataga tausavali; ua latou faaee taga pala i luga o a latou asini, ma fagu uaina ua pala, ma masaesae, ma fusifusi;
5o seevae pala foi ua fonofono i o latou vae, ma ofu pala na latou oofu ai; o le areto uma foi o lo latou oso ua māgumāgu, ma momomo.
6Ona latou o atu lea ia Iosua i le toagālauapi i Kilikala, ma latou fai atu ia te ia ma tagata o Isaraelu, Ua matou o mai nei mai le nuu mamao; o lenei, ia tatou faia se feagaiga ma outou.
7Ona fai mai ai lea o tagata o Isaraelu i sa Hivī, Atonu ua outou nonofo faatasi ma i matou; pe faapefea ea ona tatou faia se feagaiga ma outou?
8Ona latou fai atu ai lea ia Iosua, O au auauna i matou. Ona fai mai ai lea o Iosua ia te i latou, O ai ea outou? Pe na outou o mai i fea?
9Ona latou fai atu ai lea ia te ia, O le nuu matuā mamao lava ua o mai ai au auauna, ona o le suafa o Ieova lou Atua; auā na matou faalogo i le tala ia te ia, ma mea uma ua faia e ia i Aikupito;
10o mea uma foi ua faia e ia i tupu e toalua o sa Amorī, o e na i le la itu o Ioritana; o Sekono le tupu o Hesepona, ma Oko le tupu o Vasana sa i Aserota.
11O le mea lea na fai mai ai ia te i matou o matou toeaina, ma e o nonofo uma i lo matou nuu, ua faapea mai, Ina ave ia o oso mo outou i le ala, ma ia outou o e faafetaiai ia te i latou, ma fai atu ia te i latou, O a outou auauna i matou; o lenei, ia tatou faia se feagaiga ma i matou.
12O a matou areto nei na sauni mo matou oso, sa vevela i le aso na matou o mai ai i o matou fale e o mai ia te outou; o lenei foi, faauta, ua māgumāgu ma momomo.
13O nei fagu uaina foi na matou utufia sa fou, faauta foi, ua masaesae; o matou nei ofu foi ma o matou seevae ua pala, ina ua matuā mamao lava le ala.
14Ona tago lea o ia tagata i a latou mea e ‘ai, a ua latou le fesili atu i le afioga a Ieova.
15Ona faia lea e Iosua le mavaega ma i latou, na faia foi e ia le feagaiga ma i latou e ola ai i latou; ua tauto foi alii sili o le faapotopotoga ia te i latou.
16Ua mavae atu aso e tolu talu ona latou faia le feagaiga ma i latou, ona latou faalogo ai lea ua latou felatai ma i latou, ma nofo tuaoi ma i latou.
17Ona o atu lea o le fanauga a Isaraelu, ma oo atu i a latou aai i le aso tolu; o a latou aai ia o Kipeona, ma Kafira, ma Perota, ma Kiriataiarima.
18Ua le fasia i latou e le fanauga a Isaraelu, auā na tauto ia te i latou o alii sili o le faapotopotoga, ia Ieova le Atua o Isaraelu. Ona muimui lea o le faapotopotoga uma i alii sili.
19A ua fai atu alii sili uma i le faapotopotoga uma, Ua matou tauto ia te i latou ia Ieova le Atua o Isaraelu; o le mea lea e le mafai ai ona tatou tagofia i latou.
20O le mea lenei tatou te faia ia te i latou; tatou te faaola ia te i latou, ne‘i i luga ia te i tatou le toasa, ona o le tautoga na tatou tauto ai ia te i latou.
21Ua fai atu foi alii sili ia te i latou, Ia ola i latou, e pei ona fai atu o alii sili ia te i latou; a ia fai i latou ma e fāi fafie, ma e utu vai mo le faapotopotoga uma.
22Ona valaau lea o Iosua ia te i latou, ma na fai atu ia te i latou, ua faapea atu, Se a ea le mea ua outou faa‘ole‘ole mai ai ia te i matou, ua faapea mai, E matuā mamao lava i matou ma outou; a ua outou nonofo felatai ma i matou.
23O le mea lea e malaia ai outou; e le toe te‘a ese outou ma le nofo pologa, ma e fāi fafie, ma e utu vai mo le fale o lo‘u Atua.
24Ona latou tali mai ai lea ia Iosua, ua faapea mai, Auā sa matuā ta‘utino mai i au auauna na poloai mai Ieova lou Atua i lana auauna o Mose, e foaiina le laueleele uma ia te outou, ma faaumatia i latou o e nonofo uma i le nuu ai o outou luma; o le mea lea sa matuā fefefe ai i matou ina ne‘i matou oti ia te outou, ua matou fai ai foi lenei mea.
25O lenei, faauta mai, o i matou nei o i lau pule; o le mea lelei ma le tonu i ou luma e fai ia te i matou ia e faia.
26Ua faapea foi ona faia e ia ia te i latou, ua laveaiina e ia o i latou ai lima o le fanauga a Isaraelu, ma ua le fasiotia i latou.
27Ua tuuina i latou e Iosua i lea aso e fāi fafie, ma utu vai mo le faapotopotoga, ma le fata faitaulaga o Ieova ua oo mai i le aso nei, i le mea e filifilia e ia.
Who We AreWhat We EelieveWhat We Do
2025 by iamachristian.org,Inc All rights reserved.
