IEREMIA, 6 - Samoan Old Version Bible

O LE MATAUPU VI.O le valoaga i le taua o le a sii atu i Iuta; ma le finau vale o le nuu.

1O outou le fanauga a Peniamina e, ia outou sosola nai totonu o Ierusalema; ia outou ilia le pu i Tikoa, ma faatu le faailoga i luga o Peteakarema; auā o loo faasaga mai le malaia ma le olopalaina e tele mai le itu i matu.

2Ou te faaumatia le tama fafine a Siona, o le ua matagofie ma le faapelepeleina.

3E o mai ia te ia leoleo mamoe ma a latou lafu; latou te faatuina o latou fale ie e faataaliolio ai ia te ia; o mamoe latou te taitasi ma ‘ai i le mea e nofo ai.

4Ina sauniuni ia e sii atu i ai le taua; tulai ia, ina tatou o ae i le aoauli. Oi talofa ia te i tatou! auā ua faliu le la, ua lafoia ata i le afiafi.

5Tulai ia, ina tatou o ae i le po, ma tatou faaumatia ona maota.

6Auā o loo faapea ona fetalai mai o Ieova o ‘au, Ina ta mai ia laau, ma tanu ai le mea mautietie e tau ma Ierusalema; o le aai lea e faasalaina; ua i totonu ia te ia o sauaga uma.

7E pei ona puna mai o le punāvai lona suāvai, e faapea ona faapunaia mai e ia o lona leaga; ua lagona i totonu ia te ia le faasaua ma le faatafunaga; ua i ai pea i o‘u luma le ma‘i ma le manua.

8Ierusalema e, ia e talia le aoaiga, ina ne‘i te‘a ese lo‘u loto ia te oe; ina ne‘i ou faia oe ma faatafunaga, o le nuu e le āina.

9Ua faapea ona fetalai mai o Ieova o ‘au, E faapei ona latou matuā aoao i le vine, e faapea foi i e o totoe i Isaraelu; ina toe tuu mai ia lou lima, e pei o le ua tau vine ona toe tuu mai lona lima i ato.

10Po o ai ea ou te fai atu i ai, ma aoai atu i ai, ina ia latou faalogo mai? Faauta, e lei peritomeina o latou taliga, e le mafaia e i latou ona faalogo mai; faauta, ua fai le afioga a Ieova ma mea e tauemu i ai i latou; ua latou le fiafia i ai.

11O le mea lea ua tumu ai a‘u i le toasa o Ieova; ua ou le lavā faatoatoa; ou te liligi ifo ai i luga o tama iti i fafo, e faatasi foi ma le faapotopotoga o taulelea; e maua foi le tane atoa ma lana avā, o le toeaina atoa ma le ua tuu tulu‘i ona tausaga.

12E avea o latou fale mo nisi, atoa foi ma fanua, ma avā; auā ou te faaloaloa lo‘u lima i luga o e nonofo i le nuu, o loo fetalai mai ai Ieova.

13Auā o latou tagatānuu atoa ma o latou alii ua matapeapea i oloa i latou uma; o perofeta foi atoa ma ositaulaga ua amio pepelo i latou uma.

14Ua latou fofo faatauvaa le manua o le tama fafine a lo‘u nuu, ua faapea ane, E manuia, e manuia; a e leai se manuia.

15Ua latou mamā ea ona o le mea inosia ua latou faia? ua matuā le mamā lava i latou, ua latou le iloa lava le masiasi; o le mea lea e pauu ai i latou faatasi ma e ua pauu; o ona po ou te asiasi ai ia te i latou, latou te tausuai ai, o loo fetalai mai ai Ieova.

16O loo faapea ona fetalai mai o Ieova, Ia outou tutū i ala, ma vaavaai, ma fesili i ala o le vavau, po o i fea le ala lelei, ma ia outou savavali ai, ona maua lea e outou o le malologa mo outou agaga. A ua latou fai mai, Matou te le savavali i ai.

17Ua ou tofia foi tagata vaai mo outou, o e ua faapea mai, Ina faalogo ia i le leo o le pu. A ua latou fai mai, Matou te le faalogo i ai.

18O lenei, ina faalogologo mai ia outou nuu ese, ia outou iloa foi o outou le faapotopotoga, le mea e ia te i latou.

19Le lalolagi e, ina faalogologo mai ia, faauta, o a‘u nei ou te faaooina atu le malaia i lenei nuu, o le fua o latou lava mafaufauga, auā ua latou le faalogo i a‘u upu; o la‘u tulafono foi ua latou lafoaiina lea.

20Se a le mea ua au mai ai ia te au pulu lipano mai Seepa, ma kani manogi mai le nuu mamao? O a outou taulaga mu e le talia ia, ma a outou taulaga ou te le fiafia i ai.

21O le mea lea ua faapea ona fetalai mai ai o Ieova, Faauta, ou te tuuina atu i luma o lenei nuu o mea e tausuai ai, e tausuai ai tamā faatasi ma o latou atalii; e fano foi le tagata atoa ma lana uo.

22Ua faapea ona fetalai mai o Ieova, Faauta, o le a o mai tagata mai le nuu i le itu i matu, o le a lagaina mai le nuu tele mai tuluiga o le lalolagi;

23latou te tagofia le aufana ma le tao; ua saua i latou, ma latou le alolofa; e taalili o latou leo e pei o le sami; ua latou tietie foi i solofanua, ua sauniuni e pei o tagata i le taua, latou te tau ma oe, le tama fafine a Siona e.

24Ua tatou lagona le tala i ai; ua vaivai ai o tatou lima; ua maua i tatou i le puapuaga, o le tiga e pei o le fafine o le a fanau mai.

25Aua tou te o i le fanua, aua foi le ui ane i le ala; auā ua i ai le pelu a le ua ita mai, ma le mata‘u i itu uma.

26Le tama fafine a lo‘u nuu e, ia e fusi ia te oe i le ie talatala, ma ia e taafili i le lefulefu; ia e faanoanoa e pei ona faanoanoa se tasi i lona atalii e toatasi, o le tagitu‘i lotulotu; auā e faafuasei ona oo mai ia te i tatou le na te faatafunaina.

27Ua ou tofia oe o le tofotofo i lo‘u nuu, o le ‘olo, ina ia e iloa, ma tofotofo i lo latou ala.

28Ua matuā vaogatata i latou uma; ua feoai i latou ma feaveaveai; o ‘apa memea ma uamea i latou; o i latou uma ua latou faataumaoi mea.

29Ua mu le tapili, ua faaumatia le pulu i le afi; o lē fai mea uamea na te faateaeseina fua le otaota; auā e le faateaeseina tagata amio leaga.

30E ta‘ua i latou o ario ua lafoaiina, auā ua lafoaiina i latou e Ieova.