1Ieova e, o lo‘u Atua lava oe; ou te faaneenee ia te oe; ou te vivii atu i lou suafa; auā ua e faia mea e ofo ai; o mea na e pule ai talu anamua e faamaoni ia, e moni lava;
2auā ua e faia le aai ma faupuega maa; o le aai nofo ‘olo ua e lepetia; ua e faia le maota o tagata ese ia leai se aai; e le toe faia lava e faavavau;
3o le mea lea e vivii atu ai ia te oe le nuu malosi; e matatau ia te oe le aai o nuu ese e matautia;
4auā o oe e malosi ai le ua vaivai, e malosi ai le ua mativa i lona puapuaga, o le malu i le afā, o le paolo i le vevela, pe a oo mai le ita o e o matautia e pei o se afā i le pa.
5E pei o le vevela i le nuu naumati, e te faamaulaloina le taalili o tagata ese; e pei o le vevela i le paolo o le ao, e faamaulaloina lava le pese a tagata matautia.
6E faia e Ieova o ‘au i lenei mauga mo nuu uma le faigaai o mea lelei, o le tausamiga o uaina ua tuu ai ‘alu; o mea e silisili ona lelei, o uaina ua faamaninoina sa tuu ai ‘alu.
7E faaumatia foi e ia i lenei mauga le ie ufiufi, o loo ufitia a‘i nuu uma, ma le ufiufi ua ufitia a‘i nuu ese uma lava.
8E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.
9O lea aso e faapea ai, Faauta, o lo tatou Atua lenei; sa tatou faatalitali ia te ia, ua ia faaolaina foi i tatou; o Ieova lava lenei, sa tatou faatalitali ia te ia; tatou te fiafia ma olioli i lana faaolataga.
10Auā e tumau le aao o Ieova i lenei mauga; e solia foi Moapi i lona lava nuu, e pei ona solia o ‘au o saito i le faaputuga nasu.
11E faaloloa foi e ia ona aao i totonu ia te i latou, e pei ona faaloloa lima o le tagata e aau ina ua aau; na te faamaulaloina lo latou faamaualuluga, atoa ma togafiti o latou lima.
12Na te lafotuina le ‘olo maualuga o ou pa, na te faamaulaloina, na te faagatasia ma le eleele, e oo lava i le efuefu.
Who We AreWhat We EelieveWhat We Do
2025 by iamachristian.org,Inc All rights reserved.
