1Ua alu atu Tina le tama teine a Lea, sa fanau mai e ia ia Iakopo, e maimoa i fafine o le nuu.
2Ua iloa foi o ia e Sekema le atalii o Hamoro, o lo sa Hivī, o le tamaalii o le nuu, ua ia ta‘ita‘i foi ia te ia, ua la momoe, ua ia faaleaga ia te ia.
3Ua matuā manao o ia ia Tina le afafine o Iakopo, ua loto lava i le teine, ua tautala foi ma le alofa lava i le teine.
4Ua fai atu foi Sekema i lona tamā o Hamoro, ua faapea atu, Ia e maua mai lenei teine e fai ma‘u avā.
5Ua lagona foi e Iakopo, ua faaleagaina e ia Tina lona afafine; o ona atalii foi sa i le vao i latou ma ana manu, ona faalologo ai lea o Iakopo seia latou o mai.
6Ua sau foi Hamoro le tamā o Sekema ia Iakopo e tautala ma ia.
7Ua o mai foi atalii o Iakopo mai le vao ina ua latou faalogo i ai; ua tiga foi i latou, ua matuā ita lava, ina ua faia e ia le mea leaga ia Isaraelu, ina ua la momoe ma le afafine o Iakopo; auā o le mea lea e le tatau lava ona fai.
8Ua tautala mai foi Hamoro ia te i latou, ua faapea mai, O lo‘u atalii o Sekema, o loo ua manao tele lava o ia i lo outou teine; se‘i outou tuu mai ia o ia ia te ia e fai mana avā.
9Ia fetaiai o tatou gafa, ma au mai o outou afafine mā matou, a e avatu o matou afafine mā outou.
10Tatou te mau foi ma i matou; faitalia outou i le laueleele; tou te mau ai, ma fefaatauai ia, ma ia outou mau fanua i ai.
11Ua faapea mai foi Sekema i lona tamā ma ona tuagane, Ia alofagia mai a‘u nei e outou; o mea foi tou te fai mai ai ia te au, ou te avatu lava.
12Ta‘u mai ia ni oloa ia tele lava ma ni mea alofa, ou te avatu lava mea tou te fai mai ai ia te au; a ia tuu mai lava le teine ia te au e fai ma‘u avā.
13Ona tali atu lea o atalii o Iakopo ia Sekema ma Hamoro lona tamā ma le pepelo, ua tautala atu ai, ina ua faaleagaina e ia o Tina lo latou tuafafine;
14ua faapea atu ia te i laua, Matou te le mafaia lena mea ona avatua o lo matou tuafafine i se tagata ua le peritomeina; auā e fai ma luma lea mea ia i matou;
15e tasi lava le mea matou te usiusitai ai ia te outou; pe afai tou te faapei o i matou, ia peritomeina o outou tane uma;
16ona matou avatua lea o matou afafine ia te outou, o outou afafine foi matou te au mai ai mā matou, tatou te mau foi ma outou, e avea foi i tatou ma nuu e tasi.
17A e afai tou te le usiusitai mai ia te i matou, ia peritomeina outou, ona matou au mai ai lea o lo matou teine, ma matou o.
18Ua lelei foi a latou upu i le manatu o Hamoro ma Sekema le atalii o Hamoro.
19Ua le faatuai foi le taulealea ona faia o lea mea, auā na fiafia o ia i le afafine o Iakopo; sa sili foi lona agafaatamaalii i tagata uma o le aiga o lona tamā.
20Ona o ai lea o Hamoro ma Sekema lona atalii i le faitotoa o la la aai, ua tautala atu i tagata o la la aai, ua faapea atu,
21O tagata ia ua filemu i latou ia te i tatou; o lenei, ia latou mau i le nuu, ma fefaatauai ai; auā o le laueleele, faauta, ua lautele lava ia, e mafai ona latou mau ai; ia tatou au mai o latou afafine e fai ma a tatou avā, ia tatou avatu foi o tatou afafine e fai ma a latou avā.
22E tasi le mea e mafai ai ia tagata ona usiusitai mai ia te i tatou ia mau ai ma i tatou, ia fai ma nuu e tasi, ia peritomeina o tane uma o ia i tatou, e pei ona peritomeina o i latou.
23O a latou mea, ma a latou oloa, ma a latou manu uma, e le fai ea ma a tatou ia? Tau ina tatou usiusitai ia te i latou, ona mau lea o i latou ma i tatou.
24Ua usiusitai foi ia Hamoro ma lona atalii o Sekema o i latou uma e na o atu i le faitotoa o lana aai; na peritomeina foi o tane uma, o i latou uma e na o atu i le faitotoa o lana aai.
25Ua oo foi i le aso tolu, ina ua malosi i latou, ona tago lea e atalii e toalua o Iakopo, o Simeona ma Levi, o tuagane o Tina, taitasi i lana pelu, ona ulu atu lea i le aai ma le le mata‘u, ma fasioti i tane uma.
26Ua la fafasi foi ia Hamoro ma lona atalii o Sekema i le pelu, ua ave foi ia Tina ai le fale o Sekema, ma latou o.
27Ua o atu foi atalii o Iakopo i e na fasia, ma latou vete le aai, auā na latou faaleagaina lo latou tuafafine.
28Ua latou avea foi a latou mamoe, ma a latou povi, ma a latou asini, ma mea sa i le aai, ma mea sa i le fanua, ma a latou oloa uma,
29o latou tama iti uma foi, ma o latou fafine ua latou avea faatagataotaua, ua latou vetea foi mea uma lava sa i fale.
30A ua fai atu Iakopo ia Simeona ma Levi, Ua oulua faatiga mai ia te au, e inosia ai a‘u e i latou o e mau i le nuu, o sa Kananā ma sa Perisē; o i tatou nei foi ua toaitiiti, e faapotopoto faatasi i latou e laga mai ia te au, ma fasioti ia te au, e faaumatia foi a‘u, o a‘u atoa ma lo‘u aiga.
31Ona faapea lea o i laua, E faapea ea ona fai o ia i lo matou tuafafine e peiseai o se fafine talitane?
Who We AreWhat We EelieveWhat We Do
2025 by iamachristian.org,Inc All rights reserved.
