1O lana nofoaiga na alu ae ai Nepukanesa le tupu o Papelonia, ona fai toilalo ai lea o Ioakima ia te ia i tausaga e tolu, ona toe foua ai lea e ia o ia.
2Ona aauina lea ia te ia e Ieova o ‘au a Kaletaia, ma ‘au a Suria, ma ‘au a Moapi, atoa ma ‘au a le fanauga a Amoni, na ia aauina i latou i Iuta e faaumatia a‘i, pei o le afioga a Ieova na tŭlei mai i ana auauna le au perofeta.
3O le afioga lava a Ieova na oo ai lea mea ia Iuta, ina ia na ave ese ia te i latou i ona luma ona o agasala a Manase, e tusa ma mea uma na ia faia;
4auā foi le toto o e le sala na ia faamaligiina, auā na ia faatumuina Ierusalema i le toto o e le sala; na le mafai e Ieova ona faamagaloina ai.
5O toe o mea na faia e Ioakima, ma mea uma na ia faia, e lei tusia ea ia mea i le tusi o tala i nofoaiga a tupu o Iuta?
6Ua taoto foi Ioakima faatasi ma ona tamā; ona soloai ane ai lea o Ioakina lona atalii e fai ma tupu.
7E lei toe sau foi le tupu o Aikupito ai lona lava nuu; auā na faoa e le tupu o Papelonia mea uma sa i le tupu o Aikupito, pau mai i le alia o Aikupito pau mai i le vaitafe o Eufirate.
8O le sefulu ma le valu o ona tausaga na fai ai Ioakina ma tupu, e tolu foi masina na tupu ai o ia i Ierusalema. O le igoa o lona tinā o Neuseta le afafine o Elenatana o le Ierusalema.
9Na faia foi e ia le amio leaga i luma o Ieova, pei o mea uma na faia e lona tamā.
10O ona po ia na o ae ai auauna a Nepukanesa le tupu o Papelonia i Ierusalema, ona vagaia lea o le aai.
11Ua sau lava Nepukanesa le tupu o Papelonia i le aai, na vagaia foi e ana auauna.
12Ona alu atu ai lea o Ioakina le tupu o Iuta i le tupu o Papelonia, o ia ma lona tinā, ma ana auauna, ma alii sa ia te ia, ma ana auauna sili, na ave foi o ia e le tupu o Papelonia i le tausaga e valu o lana nofoaiga.
13Ua ia ave ese ai foi oloa uma lava na le fale o Ieova, ma oloa uma na i le fale o le tupu; na ia vavaeeseina foi mea auro uma na faia e Solomona le tupu o Isaraelu i le malumalu o Ieova, pei ona fetalai mai ai o Ieova.
14Ua ia faatāfeaina foi Ierusalema uma, o alii uma foi, atoa ma e totoa uma, ua sefulu afe o e na faatāfeaina; o tufuga uma foi, atoa ma e galulue i uamea, e lei toe se tasi, na o tagata matitiva lava o le nuu.
15Ua ia faatāfeaina foi Ioakina i Papelonia, o le tinā foi o le tupu, ma avā a le tupu, ma ana auauna sili, atoa ma alii sili o le nuu, ua ia faatāfeaina nai Ierusalema i Papelonia.
16O tagata totoa uma e fitu afe, ma tufuga, ma e galulue i uamea e tasi le afe, o i latou uma na malolosi ma lavatia taua, na faatāfeaina i latou e le tupu o Papelonia i Papelonia.
17Ona tofia lea e le tupu o Papelonia o Matania le uso o le tamā o Ioakina e fai ma tupu e sui a‘i o ia; na na sui foi lona igoa ia Setekaia.
18O le luafulu ma le tasi o ona tausaga ua fai ai Setekaia ma tupu, e sefulu ma le tasi tausaga na tupu ai o ia i Ierusalema. O le igoa o lona tinā o Hamutala le afafine o Ieremia le Lipena.
19Na ia faia le amio leaga i luma o Ieova, pei o mea uma na faia e Ioakima.
20Auā o le toasa o Ieova ia Ierusalema ma Iuta, ua oo ina lafoaiina ai i latou ai ona luma; ua foua ai foi le tupu o Papelonia e Setekaia.
Who We AreWhat We EelieveWhat We Do
2025 by iamachristian.org,Inc All rights reserved.
