1Ona tali atu ai lea o Iopu, ua faapea atu,
2Ua ou faalogo atu i mea faapena e tele; o tagata faamafanafana faasoesa o outou uma.
3E i ai ea se iuga o upu faatauvaa? Pe se a foi se mea ua faaoso ia te oe, ina ua e tali mai?
4O a‘u nei foi, ou te mafaia ona tautala e pei o outou, pe ana fesuiaiina outou ma a‘u; ou te mafaia ona faasosooina atu o upu ia te outou, ma lialiai atu lo‘u ulu ia te outou.
5A ou te faamalosi atu ia te outou i lo‘u gutu, o le tautala foi a o‘u laugutu e faafeoloolo ai o outou tiga.
6Afai ou te tautala atu e le feoloolo ai lo‘u tiga; afai ou te faalologo, se a ea se tiga e te‘a ai ia te au?
7A o lenei, ua ia faavaivaia mai o a‘u; ua e faaumatia lo‘u aiga uma.
8Ua e fusifusia a‘u, ua fai lea ma molimau ia te au; ua tulai mai foi ia te au lo‘u tino vale e molimau i o‘u lava luma.
9Ua ia saeia a‘u i lona toasa, ma ua tuliloa mai ia te au; ua li ona nifo ia te au; ua pulatoa mai ia te au o lē ua fai a‘u mona fili.
10Ua latou faamaga o latou gutu ia te au; ua latou taia mai lo‘u alafau e fai ma luma; ua latou faapotopoto faatasi e agaleaga ia te au.
11Ua tuuina a‘u e le Atua i e ua amioletonu, ua ia tuulafoaiina a‘u i lima o e amio leaga.
12Sa ou filemu, a ua ia tu‘imomomoina a‘u; ua ia pue mai foi i lo‘u ua, ma nutininii ia te au; ua na faatuina foi a‘u e fai ma manulauti ia te ia.
13Ua siosiomia a‘u e ana ‘au e fanafana u; ua ia ati i o‘u fatuga‘o, ua le faasaoina foi e ia; ua ia sasaaina atu lo‘u au oona i le eleele.
14Ua ia fasigaugauina a‘u i lea manua ma lea manua, ua ia osofai mai ia te au e pei o se fitafita.
15Ua ou su‘ia le ie talatala i lo‘u tino, ma ou faaleagaina lo‘u nifo i le eleele.
16Ua fulafula o‘u mata i le tagi, o loo i ai foi i o‘u laumata le ata o le oti.
17E le ona ua i ai o se saua i o‘u lima; ua mamā foi la‘u talosaga.
18Le eleele e, aua e te ufitia lo‘u toto, aua ne‘i i ai foi se mea mo la‘u alaga.
19O lenei foi, faauta, o i le lagi lē molimau ia te au, o i lugā foi lē ua i ai le mau ia te au.
20Ua tauemu mai a‘u uo ia te au; a ua sisina ifo loimata i o‘u mata i luma o le Atua.
21E! A na mafaia ona finau o le tagata ma le Atua, e pei ona finau o le tagata ma lana uo.
22Auā e mavae mai nai tausaga ua faitaulia, ona ou alu atu ai lea i le ala ou te le toe foi mai ai.
Who We AreWhat We EelieveWhat We Do
2025 by iamachristian.org,Inc All rights reserved.
