1E tasi le tausaga o le nofoaiga a Saulo, a o le tausaga e lua na fai ai o ia ma tupu ia Isaraelu,
2ona filifilia lea e Saulo tagata o Isaraelu e tolu afe; sa ia Saulo afe e lua i Mekemase ma le mauga o Peteli; sa ia Ionatana le afe e tasi i Kipea o Peniamina; a o le nuu ua totoe ua ia aauina atu i latou ia taitasi ma alu i lona fale ie.
3Ua fasia e Ionatana le leoleoga a Filisitia sa i Kipea; ua faalogo i ai Filisitia. Ona ili ai lea o le pu e Saulo i le nuu uma, ua faapea ane o ia, Ia faalogo ai sa Eperū.
4Ua faalogo ai Isaraelu uma, ua faapea, Ua fasia e Saulo le leoleoga a Filisitia; ua inosia ai foi Isaraelu e Filisitia. Ona faapotopoto ai lea o le nuu ia Saulo i Kilikala.
5Ua faapotopoto Filisitia e tau ma Isaraelu, e tolu sefulu afe o kariota, e ono afe o e tietie i solofanua, ma tagata pei o le oneone i le matafaga ona toatele; ua latou o ae, ma to lauapi i Mekemase i gagae o Petavene.
6Ua iloa e tagata o Isaraelu ua pagatia i latou, (auā ua atuatuvale le nuu,) ona lalafi ai lea o le nuu i ana, ma le vao talatala, ma gaōa, ma ‘olo maualuga, ma lua.
7Ua sopoia atu foi Ioritana e Eperu, ua oo i le nuu o Kato ma Kiliata; a e nofo pea Saulo i Kilikala, o loo mulimuli ia te ia le nuu uma ma le tetemu.
8Ua faatali o ia i aso e fitu, o aso ia na atofa atu ai e Samuelu; a e lei alu atu Samuelu i Kilikala, ua taape foi le nuu sa ia te ia.
9Ona fai ane lea o Saulo, Au mai ia te au se taulaga mu ma se taulaga faafetai; ona fai ai lea e ia o le taulaga mu.
10Ua oo ina a uma ona faia e ia o le taulaga mu, faauta ia Samuelu, ua alu atu; ona alu ane lea o Saulo e faafetaiai, ma ofo atu ia te ia.
11Ua fai mai Samuelu, Se a lau mea ua fai na? Ua tali atu Saulo, Na ou vaai, ua taape le nuu sa ia te au, ma oe foi ua e le sau i aso na atofaina mai, ma ua faapotopoto Filisitia i Mekemase,
12o le mea lea na ou faapea ai, Anei e faaifo mai Filisitia ia te au i Kilikala, a ua ou le faatoga atu ia Ieova; ona ou faamalosi lea, ma ou faia le taulaga mu.
13Ona fai atu lea o Samuelu ia Saulo, Ua e valea i le mea ua e fai na, ua e le tausia le poloaiga a Ieova lou Atua na ia poloai atu ai ia te oe; auā na fai a faatumauina nei e Ieova o lou malo ia Isaraelu e faavavau.
14A o lenei, e le tumau lou malo; ua sailia e Ieova se tagata mona e tatau ma lona finagalo, ua poloai Ioeva ia te ia e fai ma alii o lona nuu, auā ua e le tausia le mea na poloai mai ai Ieova ia te oe.
15Ua tulai Samuelu, ua alu ae nai Kilikala i Kipea o Peniamina; ona faitau lea e Saulo o le nuu, o e na i ai ia te ia, pe atoa se ono galau o tagata.
16O Saulo foi, ma Ionatana lona atalii, ma le nuu sa ia te i laua, ua latou nonofo i Kipea o Peniamina; a ua to lauapi Filisitia i Mekemase.
17Ua o ane o ē faatafuna nai le togālauapi o Filisitia i ‘au e tolu; ua faasaga atu le tasi ‘au i le ala o Ofira i le nuu o Suala;
18ua faasaga atu le tasi ‘au i le ala o Peteorana, ua faasaga atu le tasi ‘au i le ala o le fanua e feagai ma le vanu o Sepoima i tala ane le vao.
19Ua leai foi se tufuga fai uamea i le nuu uma o Isaraelu, auā na faapea ane Filisitia, ne‘i gaosi e Eperu se pelu po o se tao.
20Na alu ifo Isaraelu uma ia Filisitia e taitasi ma faamata ai lona oso uamea, ma le uamea o lana suotosina, ma lona to‘i, ma lana selesaito.
21A ua ia te i latou le ‘ili mo selesaito, ma uamea suotoso, ma tui mata tolu, ma to‘i, e faamata a‘i foi tui povi.
22O le mea lea na leai ai se pelu po o se tao i lima o le nuu uma sa ia Saulo ma Ionatana i le aso na tau ai le taua; ua na o Saulo ma Ionatana lona atalii sa i ai.
23Ua alu atu le leoleoga a Filisitia i le ala o Mekemase.
Who We AreWhat We EelieveWhat We Do
2025 by iamachristian.org,Inc All rights reserved.
