1Ua ou osia le feagaiga ma o‘u mata, se a foi le mea ou te manatu ai i se taupou?
2Se a foi le tofi mai le Atua o i lugā? Ma le tofi mai Le e ona le malosi uma lava o i mea maualuluga?
3E le ua tuu ea le malaia mo le ua amio leaga, ma le puapuaga mo e ua fai mea leaga?
4Ua le silasila ea o ia i o‘u ala, ma faitaulia o‘u laasaga uma?
5Afai ua ou savali ma le pepelo, po ua tele vavave o‘u vae i le faa‘ole‘ole,
6ia fuatia a‘u e ia i le fua faatautau tusa, ia silafia ai e le Atua ua sao la‘u amio.
7Afai ua o ese o‘u vae i le ala, ma mulimuli atu lo‘u loto i o‘u mata, ma pipii mai se mea leaga i o‘u lima;
8ia ou luluina atu saito, a ia ‘aina e se tasi; ia liaiina foi a‘u mea e tutupu.
9Afai ua olegia lo‘u loto i se fafine, po ua ou lamalama i le faitotoa o lē ma te tuaoi;
10ia olo ai saito e la‘u avā mā se tasi, ia taooto foi ma ia isi tane.
11Auā o le agasala tele lea, o le pagota foi lea e faasalaina e faamasino.
12Auā o le afi lava lea e susunuina ai seia oo ina faaumatia; e liaiina ai foi a‘u mea uma ua tutupu.
13Afai ana ou le mafai ona faamasinoina mea a la‘u auauna tane ma la‘u auauna fafine, ina ua la finau mai ia te au;
14se a foi se mea ou te faia pe a tulai mai le Atua? Se a foi sa‘u e tali atu ai ia te ia pe a faamasino mai o ia?
15O lē na faia a‘u i le manava, e le o ia foi lea na faia o ia? E le o le toatasi ea foi na ia faia i maua i le manava?
16Afai ua ou taofi se mea na mananao i ai o e matitiva, po ua fole talu a‘u mata o le fafine ua oti lana tane;
17po ua ou ‘ai toatasi na o a‘u i la‘u mea e ‘ai, a e lei ‘ai ai foi le ua aumatuā.
18Auā na ma tutupu talu ina ou itiiti e peiseai o lona tamā a‘u; talu foi ina fanaua mai a‘u e lo‘u tinā, ua ou tausi i le fafine ua oti lana tane.
19Afai ua ou iloa se tasi a fano ina ua leai sona ofu, ma se ua mativa ua leai sona lavalava;
20afai ua le faamanu mai ia te au lona sulugatiti, afai foi ua le mafanafana o ia i fulufulu o a‘u mamoe;
21afai ua ou sii atu lo‘u lima i le ua aumatuā, ina ua ou iloa i le faitotoa e fesoasoani ia te au;
22ia paū ese ai lo‘u tau‘au i le ivisa, ia fa‘ia foi lo‘u lima ai le tulilima.
23Auā ua ia te au le mata‘u i le malaia mai le Atua; ua ou le mafaia foi ona o lona silisili.
24Afai ua ou fai auro ma mea ou te faalagolago i ai, po ua ou fai atu i auro, O lo‘u faatuatuaga oe;
25afai ua ou olioli ina ua tele lo‘u oloa, ina ua maua foi e o‘u lima mea e tele,
26afai ua ou vaai i le la ina ua pupula mai; ma le masina ina ua alualu ae, ma susulu mai;
27ma ua olegia faalilolilo lo‘u loto, ma ua miti ai lo‘u gutu i lo‘u lima;
28o le agasala lava lea e faasalaina e faamasino; auā o le tuua lea e a‘u o le Atua o i lugā.
29Afai ua ou olioli i le malaia o le ua ‘ino‘ino mai ia te au, ma ou faatuumana ina ua maua o ia i le leaga;
30ua ou le mafaia foi ona agasala lo‘u gutu i le ole atu ia faafanoina o ia.
31Ua le fai ane ea o lo‘u au aiga, O ai ea ua le ma‘ona i ana manu?
32E lei moe i fafo le tagata ese; ua ou faaavanoa lo‘u faitotoa ma malaga.
33Afai ua ou ufiufi lo‘u solitulafono e pei o Atamu, i lo‘u natia o la‘u agasala i lo‘u loto,
34ia ou fefe lava i le vao tagata e toatele; ia faaatuatuvaleina a‘u i le ‘ino‘ino mai o aiga; ia ou faalologo foi, ia ou le toe ulufafo i le faitotoa
35E! Fia faafofogaina mai a‘u e ia. Faauta, o lo‘u faailoga; ia tali mai Le e ona le malosi uma lava ia te au, ma ia tusia se tusi e le tagata ua finau mai ia te au.
36Ou te faafuataina lava; ou te nonoaina lava e fai mo‘u pale.
37Ou te faaali atu ia te ia le faitau o o‘u laasaga; ou te faalatalata atu ia te ia e pei o se alii sili.
38Afai e alaga atu lo‘u fanua ona o a‘u, ma fetagisi faatasi ona atu pue;
39afai ua ou ‘aina ona fua ma le le tauia, ma ou faasaunoa i e pule i ai,
40ia tupu mai ai le laau talatala e sui a‘i le saito, ma le vao leaga e sui a‘i le karite!
Ona gata lea o upu a Iopu.
Who We AreWhat We EelieveWhat We Do
2025 by iamachristian.org,Inc All rights reserved.
