1O le pese silisili a Solomona.
2Ia sogi mai o ia ia te au i sogi o lona fofoga; auā e sili ona lelei o lou faapelepele mai i le uaina.
3O le nanamu o ou uu lelei ua avea ai lou suafa e pei o le uu ua liligiina; o le mea lea ua mananao ai taupou ia te oe.
4Ia e tosina atu o a‘u, matou te taufetuli ma mulimuli atu ia te oe. Ua ta‘ita‘iina o a‘u e le tupu i ona potu; matou te fiafia ma olioli ia te oe, e tele lo matou manatunatu i lou faapelepele mai a e itiiti i le uaina; ua mananao tagata amiotonu ia te oe.
5Tama fafine a Ierusalema e, e uliuli a‘u, a e lalelei, e pei o fale ie o Kitara, e pei o ie puipui o Solomona.
6Aua tou te vaavaai mai ia te au, ina ua uliuli o a‘u; auā ua laina a‘u. Na ita mai ia te au o fanau a lo‘u tinā; na latou tofia a‘u e fai ma leoleo i tovine; a o lo‘u lava tovine ou te lei leoleoina.
7O oe na ua manao i ai lo‘u loto, ina ta‘u mai ia ia te au le mea e te fafaga ai i au mamoe, o le mea e te ave ai lou lafu e taoto ai i le aoauli; auā se a le mea e avea ai a‘u e pei o se ua lailoa i fealualuai i lafu o e ua faatasi ma oe?
8Afai e te le iloa, o oe na le sili ona lalelei i fafine, ina alu atu ia oe i tulagavae o le lafu, ma fafaga i au tamai ‘oti fafine e latalata ane i mea e nonofo ai leoleo mamoe.
9La‘u uo e, ua faatusaina oe i solofanua i kariota o Farao.
10Ua matagofie ou alafau i sei; o lou ua foi i asoa.
11Matou te faia mo oe ni pale auro e ema i ario.
12Ua puaiina le manogi o lo‘u nato ina o afio le tupu i lana tautega.
13O le ofuofu pulu muro lo‘u manamea ia te au; e asoa ia i lo‘u ua i le po atoa.
14O le fuifui kofero lo‘u manamea ia te au i tovine o Enokati.
15Faauta, la‘u uo e, ua e lalelei; faauta, ua lalelei oe, ua ni mata o se lupe ou mata.
16Faauta, lo‘u manamea e, e lalelei oe, e matagofie lava; ua uluuluola lo ta moega.
17O utupoto o lo ta fale o arasi ia, o lo ta falealuga ua faia i perosi.
Who We AreWhat We EelieveWhat We Do
2025 by iamachristian.org,Inc All rights reserved.
