1Ona aami lea e Iakopo ona atalii, ma na faapea atu, Faapotopoto mai ia outou, a a‘u faaali atu ia te outou o mea e oo ia te outou i aso amuli.
2Faapotopoto mai ia, ma faalogologo mai outou atalii o Iakopo; ina faalogologo mai ia i lo outou tamā o Isaraelu.
3O Reupena, o la‘u ulumatua lava oe, o lo‘u malosi, ma le na amata mai ai lo‘u mamalu, o le ua silisili ona mamalu, ua silisili ona malosi.
4Ua e oso vale pei o le vai, e le faasili lava oe; auā na e alu ae i le moega o lou tamā, i le ua leaga ia te oe; na alu ae ia i lo‘u moega.
5O Simeona ma Levi, o le uso i laua; ua fai a laua pelu ma auupega e faasaua ai.
6Aua ne‘i usitai lo‘u loto i la laua taupulepulega nanā; aua ne‘i faatasi lo‘u mamalu i lo laua potopotoga; auā na la fasioti le tagata i lo laua ita, o lo laua finau vale foi na la faapipili ai o vae o le povi.
7Ia fetuuina lo la ita ina ua silisili, mo lo la ita tele lava ina ua la finau vale ai; ou te vavaeina i laua i le nuu o Iakopo, ou te faataapeapeina i laua i Isaraelu.
8Oe na Iuta, e viia oe e ou uso; e oo lou lima i ua o e ita ia te oe; e ifo ia te oe le fanau a lou tamā.
9O le tamai leona Iuta; lo‘u atalii e, na e alu ae nai le mea na saeia; na ia taoto, na ia faapuga pei o le leona, e pei o se leona fafine; o ai se na te faalili ia te ia?
10E le avea le tootoo ia Iuta, po o le faipule ai ona vae seia maliu mai Sailo, e usiusitai foi atu nuu ia te ia.
11O loo nonoa lana asini i le vine, ma lana tamai asini i le vine lelei; o loo ta ona ofu i le uaina, ma lona ie pulupulu i le toto o le fua o le vine;
12e mūmū ona mata i le uaina, e sisina ona nifo i le suasusu.
13O Sepulona e tu matafaga le mea e mau ai o ia; e i ai foi o ia i le mea e tau ai vaa; e oo foi lona tuaoi i Saitonu.
14O Isakara e pei o le asini malosi o ia, o loo taoto i le va o avega e lua;
15ua iloa atu e ia le malologa ua lelei, ma le fanua ua matagofie, ona tuuina atu lea o lona ua i le amoga, ua fai foi ma pologa e fai taulaga.
16E faamasino e Tanu lona nuu, pei o le tasi itu aiga o Isaraelu;
17e fai Tanu ma gata i le ala o le malo, o le gata feai i le ala, e utia ai mulivae o le solofanua, e paū ai i tua lē tietie ai.
18Ieova e, ua ou faamoemoe i le olataga mai ia te oe.
19O Kato, e malo se ‘au ia te ia; a o ia, e iu ina malo lava ia.
20Mai ia Asera o mea lololo, o lana mea e ‘ai lea; o ia foi na te avatua o mea e faafiafia a‘i tupu.
21O Nafatali o le aila ua tatalaina atu ia, o le na te talatalaina atu i upu lelei.
22O Iosefa o le la laau o ia e fua o le la laau e fua i tafatafa o le vaipuna; e sosolo ona la i luga i le pa.
23Na faatigaina o ia e i latou o e fanafana u; na latou fanafana atu ia te ia, ma ita ia te ia.
24A ua tumau pea le malosi o lana aufana, o ona lima foi ua faamalosia ia e aao o lē Malosi o Iakopo; o loo tupu mai ai foi le leoleo mamoe, o le maa lea o Isaraelu;
25e a le Atua o lou tamā o le fesoasoani ia te oe, o Lē e ona le malosi uma lava na te faamanuia oe i manuia mai le lagi i lugā, ma manuia mai le mea loloto o loo i lalō, o manuia o susu ma le manava;
26o manuia o lou tamā ua sili lava ia i manuia o o‘u tupuga, ua oo i le tuaoi lava o mauga o le vavau; e oo pea lava ia i luga o le ulu o Iosefa, ma le tumuai o le na sili i ona uso.
27O Peniamina o le luko na te saeia; o le taeao e ‘ai ai e ia le mea ua maua; o le afiafi e vavaeina ai e ia o mea ua faoa.
28O i latou atoa nei, o itu aiga e sefulu ma le lua o Isaraelu; o upu foi ia a lo latou tamā ia i latou, ua ia faamanuia ai foi i latou, e taitoatasi ma lona manuia ua ia faamanuia ai i latou.
29Ua fai atu foi o ia ia te i latou, o loo faapea atu ia te i latou, O le a faaopoopoina atu a‘u i lo‘u nuu; ia outou tanu lava a‘u faatasi ma o‘u tamā i le ana o loo i le fanua o Eferona o le sa Hetī;
30o le ana lea o loo i le fanua o Makapelu, o loo i luma o Mamere, i le nuu o Kanana, sa faatauina lea fanua e Aperaamo mai ia Eferona o le sa Hetī e fai ma tuugamau.
31O le mea lea na latou tanumia ai Aperaamo ma lana avā o Sara, o le mea foi lea na latou tanumia ai Isaako ma lana avā o Repeka, o le mea foi lea na ou tanumia ai Lea.
32O le faatauga o le la fanua atoa ma le ana o loo i ai, mai le fanauga a Heti lea.
33Ua uma atu foi le mavaega a Iakopo i ona atalii, ona faapupuu ae lea ona vae i lona moega, ona to lea o lana mānava, ua faaopoopoina o ia i lona nuu.
Who We AreWhat We EelieveWhat We Do
2025 by iamachristian.org,Inc All rights reserved.
