1Ua faapotopotoina e Tavita o alii uma o Isaraelu i Ierusalema; o alii o itu aiga, ma alii o vasega na auauna i le tupu, ma alii o taitoaafe, ma alii o taitoaselau, ma alii e leoleo i oloa uma ma lafu o le tupu, ma ona atalii, ma auauna sili, ma tagata malolosi, atoa ma toa malolosi uma.
2Ona tulai atu ai lea o le tupu o Tavita, ma ua faapea atu, O o‘u uso e, ma lo‘u nuu, faalogologo mai ia ia te au; sa i lo‘u loto e faia se fale e tumau ai le atolaau o le feagaiga a Ieova, o le mea e tu ai aao o lo tatou Atua, na uma foi ona ou sauni e fai ai;
3a ua fetalai mai le Atua ia te au, E te le faia se fale mo lo‘u igoa, auā o oe o le tagata fai taua, ma ua e faamaligiina toto.
4Na filifilia a‘u e Ieova le Atua o Isaraelu ai le aiga uma o lo‘u tamā e fai ma tupu o Isaraelu e faavavau; auā ua filifilia Iuta e fai ma alii; ua filifilia le aiga o lo‘u tamā i le aiga o Iuta; ma ua finagalo mai ia te au i atalii o lo‘u tamā e fai ma tupu o Isaraelu uma.
5Ua filifilia foi Solomona lo‘u atalii ai o‘u atalii uma, (auā ua foaiina mai ia te au e Ieova o atalii e toatele,) e nofo ai i le nofoālii o le malo o Ieova e pule ia Isaraelu.
6Ua fetalai mai foi o ia ia te au, O Solomona lou atalii, e faia e ia lo‘u fale ma o‘u lotoā; auā ua filifilia o ia e a‘u e fai mo‘u atalii, o a‘u foi e fai mona tamā.
7Ou te faatumauina foi lona malo e faavavau, pe afai na te faamalosi e fai a‘u poloaiga ma a‘u faamasinoga, e pei ona fai i le aso nei.
8O lenei, ou te fai atu ia te outou i luma o Isaraelu uma, o le faapotopotoga a Ieova, o faafofoga mai foi lo tatou Atua, ia outou tausi ma sailiili i poloaiga uma a Ieova lo outou Atua; ina ia fai pea mo outou lenei nuu lelei, ma tuu atu ma tofi o a outou fanau e faavavau pe a mavae atu outou.
9O oe foi Solomona e, lo‘u atalii, ia iloa e oe le Atua o lou tamā, ma auauna ia te ia ma le loto atoa, ma le loto fiafia; auā e suesue e Ieova o loto uma, ma ua silafia o mafaufau uma o manatu; afai e te saili atu ia te ia, ona e maua ai lea o ia; a e afai e te tuua o ia, ona tuulafoaiina lea o oe e ia e faavavau.
10O lenei, ia oe, auā ua filifilia oe e Ieova e te faia le fale e fai ma malumalu; ia faamalosi, ma ia e faia.
11Ona avatu ai lea e Tavita ia Solomona lona atalii o le faatusa o le faapaologa, ma ona fale, ma ana mea e tuu ai oa, ma ona potu i luga, ma ona potu i totonu, ma le fale o le nofoa o le alofa;
12o le faatusa foi o mea uma na maua e ia i le Agaga, o lotoā o le fale o Ieova, ma potu uma e faataaliolio ai e tuu ai oloa o le fale o le Atua, ma oloa ua faasaina;
13atoa foi ma vasega o le au faitaulaga ma sa Levī, ma le faiga o le galuega uma i le fale o Ieova, ma ipu uma e auauna a‘i i le fale o Ieova;
14na avatua e ia o auro ua fuatia, o auro e fai a‘i mea uma i galuega eseese; ma mea ario uma ua fuatia, e fai a‘i mea uma i galuega eseese.
15Ua fuatia foi le auro mo tuugālamepa, ma o latou lamepa auro, ua fuatia tuugālamepa taitasi atoa ma ona lamepa; o tuugālamepa ario ua fuatia mo le tuugālamepa ma ona lamepa, e pei o mea e faia i tuugālamepa taitasi.
16Ua fuatia le auro o laulau o le areto e laulauina i luma e fai a‘i laulau taitasi; o ario e fai a‘i laulau ario;
17o auro lelei e fai a‘i tui, ma tanoa, ma ipu e asu a‘i; o ipu auro foi ua fuatia e fai a‘i ipu taitasi; o ario foi ua fuatia e fai a‘i ipu taitasi.
18O auro ua faamamāina ua fuatia e fai a‘i le fata e mu ai mea manogi; o le faatusa foi o le nofoa faataavalevale o kerupi auro, e fālō o la apaau, ma faamalumalu a‘i le atolaau o le feagaiga a Ieova.
19Ua faapea atu Tavita, O mea uma ia na faaalia mai i le tusi mai le aao o Ieova na ia te au, o galuega uma o i lenei faatusa.
20Ua fai atu foi Tavita ia Solomona lona atalii, Ia faamalosi ma loto tele, ma ia faia lenei mea; aua le fefe, aua le mata‘u; auā o Ieova le Atua, o lo‘u Atua e ia te oe o ia, na te le tuua oe, ua te le lafoai foi ia te oe, seia faaiuina le faiga o le galuega uma o le fale o Ieova.
21Faauta foi, o vasega o le au faitaulaga ma sa Levī, latou te faia galuega uma i le fale o le Atua; e ia te oe foi mo galuega uma lava o tagata uma e loto i ai, ma ua popoto e fai le galuega uma; o alii foi ma le nuu uma e usiusitai i au upu uma.
Who We AreWhat We EelieveWhat We Do
2025 by iamachristian.org,Inc All rights reserved.
