NUMERA 22 - Samoan Old Version Bible

O LE MATAUPU XXII.O le amiga o Palaamo e Palako.

1Ona o atu lea o le fanauga a Isaraelu, ma latou to lauapi i le eleele laugatasi o Moapi, i le itu mai o Ioritana e fesagai ma Ieriko.

2Ua iloa e Palako le atalii o Seporu mea uma na faia e Isaraelu i sa Amorī.

3Ona matuā fefe lea o Moapi ona o le nuu, auā e toatele i latou; ua atuatuvale foi Moapi ona o le fanauga a Isaraelu.

4Ona fai atu ai lea o Moapi i toeaina o Mitiana, Anei e faaumatia e lenei vao tagata o mea uma ua vagavagaia i tatou, e pei ona ‘aina e le povi o le vao o le fanua. O Palako foi le atalii o Seporu, o le tupu ia o Moapi i ia ona po.

5Ona aauina atu ai lea e ia o le sāvali ia Palaamo le atalii o Peoro, i Petoru o loo latalata ane i le vaitafe i le laueleele o lona nuu, e aami ia te ia, ua faapea atu, Faauta, ua o mai le tasi nuu mai Aikupito; faauta, ua ufitia le fogāeleele ia i latou; o loo nonofo foi i latou o feagai ma a‘u.

6O lenei, se‘i e maliu mai, ia e fetuuina lenei nuu mo a‘u, auā e sili lo latou malosi i lo‘u; atonu ou te mafai ai ona fafasi ia te i latou, ma tutuli ia te i latou ai le nuu; auā ua ou iloa o le e te faamanuia ua manuia lea, ma le e te fetuuina ua malaia lea.

7Ona o ai lea o toeaina o Moapi, ma toeaina o Mitiana, sa i o latou lima foi o totogi o togafiti a le taulāitu; ona oo atu lea o i latou ia Palaamo, ma fai atu ia te ia o upu a Palako.

8Ona fai atu ai lea o ia ia te i latou, Ia outou tofafā iina i le po nei, ou te au mai ai se upu ia te outou e fetalaia mai e Ieova ia te au; ona nonofo ai lea o alii o Moapi ma Palaamo.

9Ona afio mai lea o le Atua ia Palaamo, ua faapea mai, O ai ea ia tagata o ia te oe?

10Ona faapea atu ai lea o Palaamo i le Atua, O Palako le atalii o Seporu, o le tupu o Moapi, ua ia feau mai ia te au, ua faapea mai,

11Faauta, ua o mai le tasi nuu mai Aikupito, ua ufitia ai le fogāeleele; o lenei, ina e sau ia, ia e fetuuina i latou mo a‘u; atonu ou te mafai ai ona tau ma i latou, ma tutuli ese ia te i latou.

12Ona fetalai mai ai lea o le Atua ia Palaamo, Aua tou te o ma i latou; aua foi e te fetuu i le nuu; auā ua faamanuia i latou.

13Ona tulai lea o Palaamo i le taeao, ua faapea atu i alii mai ia Palako, Ina maliu atu ia i lo outou nuu, auā e le mafai ia Ieova ona tuu ia te au e o ma outou.

14Ona tulai ai lea o alii o Moapi, ma latou o atu ia Palako, ua faapea atu, E le mafai Palaamo ona matou o mai.

15Ona toe aauina atu ai lea e Palako o alii e sili ona toatele ma le mamalu i e na muamua.

16Ua latou oo ia Palaamo, ma latou faapea atu ia te ia, O loo faapea ona fetalai mai o Palako le atalii o Seporu, Ou te aioi atu ia te oe, aua ne‘i taofia oe, a ia e maliu mai lava ia te au;

17auā ou te matuā faalualiiina oe; o mea uma foi e te fai mai ai ia te au ou te faia lava; o lenei, se‘i e maliu mai lava, ia e fetuuina lenei nuu mo a‘u.

18Ona tali mai ai lea o Palaamo, ua faapea mai i auauna a Palako, Afai e foaiina mai e Palako ia te au o ario ma auro e tumu ai lona fale, ou te le mafaia ona soli le afioga a Ieova lo‘u Atua e fai se mea itiiti, po o se mea tele.

19O lenei, ia nonofo outou iina i lenei po, seia ou iloa pe se a se toe mea e fetalai mai ai Ieova ia te au.

20Ona afio mai lea o le Atua ia Palaamo i le po, ua fetalai mai ia te ia, Afai ua o mai ia tagata e valaau ia te oe, ia e tulai, tou te o ma i latou; a e tau lava o le upu ou te fai atu ai ia te oe, ia e faia lea.

21Ona tulai ai lea o Palaamo i le taeao, ma faanofoa lana asini, ua o faatasi ma alii o Moapi.

22Ona tupu ai lea o le toasa o le Atua ina ua alu o ia; ua tu mai foi le agelu a Ieova i le ala e tetee ia te ia. Ua tietie o ia i lana asini, sa ia te ia foi ana auauna e toalua.

23Ua iloa e le asini le agelu a Ieova ua tu i le ala, sa i lona lima lana pelu ua se‘i, ona ‘alo ese ai lea o le asini i le ala, ua ui i le vao; ona sasa ai lea o le asini e Palaamo e faafoi ia te ia i le ala.

24A ua tu le agelu a Ieova i le ala va apiapi i tovine, sa taitasi itu ala aupa.

25Ua iloa e le asini le agelu a Ieova, ona omia lea e ia o ia i le aupa, na omia foi le vae o Palaamo i le aupa; ona toe sasa lea o ia i ai.

26Ona toe alu atu lea o le agelu a Ieova, ma tu mai i le mea va apiapi, e le o i ai se ala e ‘alo ese ai i le itu taumatau, po o le itu tauagavale.

27Ua iloa e le asini le agelu a Ieova, ona taoto ai lea o ia i lalo o Palaamo; ona tupu ai lea o le ita o Palaamo, ma na sasa le asini i le laau.

28Ona faagaganaina lea e Ieova o le asini, i le ua fai mai o ia ia Palaamo, Se a ea se mea ua ou faia ia te oe, ua e sasa faatolu mai ai ia te au?

29Ona fai atu ai lea o Palaamo i le asini, Auā ua e faaonoono mai ia te au; se anoa ana i lo‘u lima se pelu po o penei ua ou fasimatea nei oe.

30Ona fai mai ai lea o le asini ia Palaamo, E le o lau asini ea a‘u nei, ua e tietie ai talu ona e maua o a‘u ua oo mai i le aso nei? O la‘u masani ea ona fai faapea ia te oe? Ona faapea atu ai lea o ia, E leai lava.

31Ona faapupulaina lea e Ieova o mata o Palaamo, ona iloa ai lea e ia o le agelu a Ieova o loo tu i le ala, ua i lona lima lana pelu ua se‘i; ona ifo ai lea o ia ua faapaūfao.

32Ona fai mai ai lea o le agelu a Ieova ia te ia, Se a ea le mea ua e sasa faatolu ai lau asini? Faauta, o a‘u nei ua ou sau e tetee ia te oe, auā ua leaga lava lou ala i o‘u luma.

33Na iloa mai foi a‘u e le asini, ma ‘alo ese faatolu ia te au; ana le ‘alo ese o ia ia te au, po o penei ua ou fasiotia oe, a e faasao ia te ia.

34Ona fai atu ai lea o Palaamo i le agelu a Ieova, Ua ou agasala, auā ou te lei iloa ua e tu mai oe i le ala e tetee ia te au; o lenei, afai ua leaga ia te oe le mea ua ou faia, ou te toe foi atu lava a‘u.

35Ona fai mai ai lea o le agelu a Ieova ia Palaamo, O pea ia outou ma na tagata, a e peitai tau o upu ou te fai atu ai ia te oe e te tautala a‘i. Ona o ai lea o Palaamo ma alii mai ia Palako.

36Ua faalogo Palako ua sau Palaamo, ona alu ai lea o ia e faafetaiai ia te ia i le tasi aai o Moapi, o le nuu tupito lea, o loo i le tuaoi o Arinona.

37Ona fai mai ai lea o Palako ia Palaamo, Na ou le matuā aauina atu ea nisi ia te oe e aami ia te oe? Se a ea le mea na e le sau ai ia te au? E moni ea ou te le mafaia ona faamalualiiina oe?

38Ona fai atu ai lea o Palaamo ia Palako, Faauta, ua ou sau ia te oe; o lenei, ou te mafaia ea se upu e tasi ona fai atu? O le upu e tuu mai e le Atua i lo‘u gutu, ou te fai atu ai lava.

39Ona o ai lea o Palaamo ma Palako, ua la oo atu i Kiriatausota.

40Ua fasi foi e Palako o povi ma mamoe, ua ia avatu foi le feau ia Palaamo ma alii sa ia te ia.

41Ua oo i le taeao, ona ave ai lea e Palako ia Palaamo, ma la o ae ma ia i mea maualuluga a Paala ina ia iloa atu ai e ia o le nuu ia oo i e aupito mamao.