1Ua fai mai soo o le au perofeta ia Elisaia, Faauta mai, o le mea tatou te mau ai nei ma oe, ua fetinai ai tatou.
2Se‘i matou o ia i Ioritana, ma taitasi le tagata ma ave ai lana laau, matou te fai a‘i i lea mea se fale tatou te mau ai. Ona tali atu ai lea o ia, Ina o ia.
3Ona fai mai lea o le tasi, Se‘i tatou o ma i matou o au auauna. Ona fai atu lea o ia, Tatou te o lava.
4Ona latou o ai lea ma ia. Ua oo foi i latou i Ioritana, ona latou ta laau ai lea.
5Ua ta e le tasi le laau, ona paū ese lea o le matau i le vai; ona alaga lea o ia, ua faapea mai, Aue! Le alii e; auā o le mea nonō.
6Ona fai atu ai lea o le tagata o le Atua, Pe na paū ifea? Ona faasino mai ai lea e ia o le mea. Ona vavae mai ai lea e ia o se laau, ua lafo atu i ai; ona opeopea ai lea o le uamea.
7Ona fai atu ai lea o ia, Ina avae ia. Ona aapa atu ai lea o ia lona lima, ua tago i ai.
8Ua sii mai e le tupu o Suria le taua ia Isaraelu, ua latou filifili, o ia ma ana auauna, ua faapea, O lea mea ma lea mea e fai ai le toagālauapi.
9Ona avatu lea o le feau a le tagata o le Atua i le tupu o Isaraelu, ua faapea atu, Ia oe, ne‘i e ui ane i lea mea, auā ua o ifo i ai Suria.
10Ona aauina lea nisi e le tupu o Isaraelu i le mea na fai atu ai le tagata o le Atua, ma faasino atu ia te ia; ua faaola ai o ia e ia i lea mea, e le na o le atu tasi pe atu lua.
11O le mea lea ua atuatuvale tele ai le loto o le tupu o Suria; ona valaau ai lea o ia i ana auauna, ua faapea atu ia te i latou, Tou te le faaali mai ea ia te au po o ai so tatou e ‘au ma le tupu o Isaraelu.
12Ona fai mai ai lea o le tasi ana auauna, Le alii e, le tupu, e leai lava; a o Elisaia le perofeta o i Isaraelu, o ia na te faaalia i le tupu o Isaraelu mea e te fetalaia i lou tofaga.
13Ona fai atu ai lea o ia, Ina o ia, ia iloilo le mea e i ai o ia, ou te aauina atu nisi e pue ia te ia. Ona ta‘ua mai ai lea ia te ia, ua faapea mai, Faauta, e i Totana ia.
14Ona aauina atu ai lea e ia i lea mea o solofanua, ma kariota, ma ‘au e tele. Ua latou oo po atu, ona latou sio lea o le aai.
15Ua tulai le auauna a le tagata o le Atua i le taeao lava, ua alu i fafo, faauta, o ‘au ua si‘o le aai ma a latou solofanua ma kariota. Ona fai mai ai lea o lana auauna ia te ia, Aue! Le alii e, pe faapefea se mea tatou te fai a‘i?
16Ona tali atu ai lea o ia, Aua e te fefe, auā e toatele ua ia te i tatou i e ua ia te i latou.
17Ona tatalo ai lea o Elisaia, ua faapea atu, Ieova e, ia e faapupula i ona mata ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi, ua latou vagavagai ia Elisaia.
18Ua o ifo ‘au ia te ia, ona tatalo atu ai lea o Elisaia ia Ieova, ua faapea atu, Ia e faatauasoina nei tagata. Ona faatauasoina lea e ia o i latou, e tusa ma le upu a Elisaia.
19Ona fai atu lea o Elisaia ia te i latou, E le o le ala lenei, e le o le aai foi lenei; mulimuli mai ia ia te au, ou te ta‘ita‘i ia te outou i le tagata tou te sailia na. A ua na ta‘ita‘i ia te i latou i Samaria.
20Ua oo atu i latou i Samaria, ona faapea atu ai lea o Elisaia, Ieova e, ia e faapupulaina mata o nei tagata ina ia latou iloa. Ona faapupulaina ai lea e Ieova o latou mata, ona latou iloa ai lea, faauta foi, ua latou i totonu o Samaria.
21Ua iloa mai i latou e le tupu o Isaraelu, ona fai mai ai lea o ia ia Elisaia, Sena e, a a‘u fāsia ea, a a‘u fāsia?
22Ona tali atu ai lea o ia, Aua e te fafasi; e te fasia ea i latou na e faatagataotauaina i lau pelu ma lau aufana? Ina laulau atu ia i o latou luma ni mea e ‘ai ma ni vai, latou te aai ma feinu ai, i le latou o ai i lo latou alii.
23Ona sauni ai lea e ia o mea e ‘ai e tele mā latou; ua latou aai ma feinu, ona tuuina atu lea o i latou e ia, ua latou o i lo latou alii. Ona le toe o mai ai lea o ‘au a Suria i le nuu o Isaraelu.
24Ua mavae nei mea, ona faapotopoto ai lea e Peniata le tupu o Suria o ana ‘au uma, ua alu ae, ua vagaia Samaria.
25Ona tele ai lea o le oge i Samaria; faauta foi, ua latou vagaia, ua iu ina faataulia le ulu o le asini i tupe e valugafulu, ma le vaefagalemu o le kape o kirio i tupe e lima.
26Ua ui ane le tupu o Isaraelu i luga o le pa, ona valaau lea o le tasi fafine ia te ia, ua faapea atu, Le alii e, le tupu, fesoasoani mai ia.
27Ona tali mai ai lea o ia, A le fesoasoani Ieova ia te oe, ou te fesoasoani ia te oe i ni ā? Ai le mea e soli ai saito ea, pe mai le tuugauaina?
28Ua fai mai foi le tupu ia te ia, O le a ea? Ona tali atu ai lea o ia, Na fai mai le fafine nei ia te au, Ia e aumaia lau tama tane, ta te ‘aina i le aso, a e ta ‘aina la‘u tama taeao.
29Ona ma tunu ai lea o la‘u tama, ua ma ‘aina. Ona ou fai atu ai lea ia te ia i le tasi aso, ia e au mai lau tama ta te ‘aina; a ua nanā e ia lana tama.
30Ua faalogo le tupu i upu a le fafine, ona saei lea e ia ona ofu, ona savali ane lea i luga o le pa, ona iloa ai lea e le nuu, faauta, o le ie talatala i totonu, ua aupito i lona tino.
31Ona faapea ane lea o ia, Ia faapea ona faia mai e le Atua ia te au, ma ia faaopoopo i ai, pe afai a e po le asō o tumau le ulu o Elisaia le atalii o Safata ia te ia.
32A ua nofo Elisaia i lona fale, o loo latou o nonofo ai ma toeaina. Ona auina lea e le tupu o le tagata nai ona luma; a o lei oo mai ia te ia le na auina, na ia fai atu i toeaina, Ua outou iloa ea ua auina mai se tasi e lena atalii o le fasioti tagata e tutū i lo‘u ulu? Vaai ia outou, pe a sau le ua auina mai, ia outou pupuni le faitotoa, ma ia outou taofi mau ia te ia i le faitotoa; e le mulimuli mai ea ia te ia le paūū mai o vae o lona alii?
33E lei uma atu ana upu ia te i latou, faauta, ua oo mai ia te ia o le na auina mai. Ona fai ane lea o ia, Faauta, mai ia Ieova lenei mala; se a se mea ou te toe faatali atu ai ia Ieova?
Who We AreWhat We EelieveWhat We Do
2025 by iamachristian.org,Inc All rights reserved.
