1Ua fai atu Samuelu ia Saulo, Na auina mai a‘u e Ieova, e faauu ia te oe ia fai ma tupu o lona nuu o Isaraelu; o lenei, ia e faafofoga i le afioga a Ieova;
2o loo faapea ona fetalai mai Ieova o ‘au, Ou te taui atu i le mea na faia e Amaleka ia Isaraelu, ina ua tu mai o ia ia te ia i le ala i lona alu ae nai Aikupito.
3O lenei, ina alu ia, ma e fasi ia Amaleka, ma outou faaumatia atoa uma ana mea, aua e te faasaoina o ia, a ia fasioti i tane atoa ma fafine, o tama matua atoa ma tama meamea, o povi atoa ma mamoe, o kamela atoa ma asini.
4Ona alu lea o le faalaei ‘au a Saulo i le nuu, ma na faitauina i latou i Tilaima, e lua selau afe o ‘au e savavali, ma afe e sefulu o tagata Iuta.
5Ua oo atu Saulo i le tasi aai o Amaleka, ona tanu ‘au ai lea i le alia.
6Ua fai atu Saulo i sa Kenī, O mai ia outou, ina o ese, ma o ifo nai ia Amaleka, ne‘i ou fasia oe faatasi ma ia, auā na e alofa i le fanauga a Isaraelu uma ina ua latou o ae nai Aikupito; ona alu ese ai lea o sa Kenī nai ia Amaleka.
7Ua fasi e Saulo ia Amaleka, e pau mai i Havila e oo i Sura, o loo feagai ia ma Aikupito.
8Ua ia pue ola ia Akako le tupu a Amaleka, a o le nuu uma ua ia fasioti ia te i latou i le pelu.
9Ua faasao e Saulo ma le nuu ia Akako, ma e aupito lelei o mamoe ma povi, atoa ma e aupito i ai, ma tamai mamoe, ma mea lelei uma ua latou le mafafai ona faaumatia; a o manu uma ua leaga ma mamai, ua matuā faaumatia ia.
10Ona oo mai ai lea o le afioga a Ieova ia Samuelu, ua faapea mai,
11Ua ou salamo ina ua ou tofia Saulo e fai ma tupu, auā ua ia liliu ese ia te au, ua na le faaiuina a‘u upu. Ua tiga ai Samuelu, ua aoina le po o valaau o ia ia Ieova.
12Ua ala usu Samuelu i le taeao e faafetaiai ia Saulo, ona ta‘ua mai lea ia Samuelu, ua faapea, Na sau Saulo i Karamelu, faauta foi, ua faatu le faailoga mona, i le ua faataamilo ma alu loa, ua alu ifo i Kilikala.
13Ua oo atu Samuelu ia Saulo, ona fai mai lea o Saulo ia te ia, Ia faamanuia oe e Ieova; ua ou faaiuina le afioga a Ieova.
14Ona fai atu lea o Samuelu, O le a foi lenei tagi o mamoe i o‘u taliga, ma le tagi o povi ou te faalogo ia ai?
15Ona fai mai lea o Saulo, Ua latou aumaia nai Amaleka; ua faasaoina e le nuu o mamoe ma povi e aupito lelei, ina ia fai ai taulaga ia Ieova lou Atua; a o mea na totoe ua latou faaumatia lava.
16Ua fai atu Samuelu ia Saulo, Sa‘ua, se‘i ou ta‘u atu ia te oe le mea ua fetalai mai ai Ieova ia te au anapo. Ua fai mai o ia ia te ia, Ina fai mai ia.
17Ua fai atu Samuelu, Sa le faia ea oe ma alii o itu aiga o Isaraelu ina o faatauvaa oe i lou lava manatu; sa faauuina foi oe e Ieova e fai ma tupu o Isaraelu.
18Na auina atu oe e Ieova i le malaga, na ia fetalai atu, Alu ia oe, ma e faaumatia o ia tagata agasala, o Amaleka, ma e tau ma i latou seia faaumatia i latou;
19o le a le mea ua e le faafofoga ai i le siufofoga o Ieova, a ua e oso i mea a le itu taua, ma ua e fai le mea leaga i luma e Ieova?
20Ona fai mai lea o Saulo ia Samuelu, Auā! ua ou faalogo lava i le siufofoga o Ieova; na ou alu foi i le malaga na auina ai a‘u e Ieova; ua ou aumaia foi Akako le tupu a Amaleka, ma a‘u faaumatia Amaleka.
21A ua au mai e le nuu mea a le itu taua, o mamoe ma povi, (o mea sili lava ia i mea na faafanoina,) e fai a‘i taulaga ia Ieova lou Atua i Kilikala.
22Ua fai atu Samuelu, E tusa ea ona fiafia o Ieova i taulaga mu ma taulaga, i lona fiafia i le faalogo i le siufofoga o Ieova? Faauta, o le faalogo e sili lea i le taulaga, ma le usiusitai e sili lea i le ga‘o o mamoe poa.
23Auā o le fouvale, e tusa ia ma le agasala o le faataulāitu; o le finau vale, e tusa ia ma le leaga o le tapuai i tupua. Ua e lafoai le afioga a Ieova, o lea ua lafoai ai o ia ia te oe ia le fai ma tupu.
24Ona fai mai lea o Saulo ia Samuelu, Ua ou agasala, auā ua ou tuumavaega i le afioga a Ieova atoa ma lau upu; auā sa a‘u fefe i le nuu, ma ou faalogo i a latou upu.
25A o lenei, ou te aioi ia te oe, ia e faamagalo i la‘u agasala, ma ia ta foi ma a‘u, ia ou ifo ai ia Ieova.
26Ona fai atu lea o Samuelu ia Saulo, Ta te le foi ma oe, auā ua e lafoai le afioga a Ieova, ua lafoai foi Ieova ia te oe, ina ia le fai oe ma tupu ia Isaraelu.
27Ua liliu Samuelu o le a alu, ona tago atu ai lea o ia i lona pito ofu, ona masae lea.
28Ona fai atu lea o Samuelu ia te ia, Ua saeia e Ieova le malo o Isaraelu nai ia te oe i lenei aso, ma ua foai atu ai i le tasi e sili lona lelei i lou.
29E le pepelo lava le Mamalu o Isaraelu, e le salamo foi ia; auā e le se tagata ia e salamo ai.
30Ona fai mai lea o ia, Ua ou agasala, a ou te aioi ia te oe, ia e faamamalu mai ia te au i luma o toeaina o lo‘u nuu, ma luma o Isaraelu, ma ia ta foi ma a‘u, ou te ifo ia Ieova lou Atua.
31Ona foi ai lea o Samuelu, ua mulimuli atu ia Saulo; ona ifo lea o Saulo ia Ieova.
32Ua fai atu Samuelu, Au mai ia Akako le tupu o Amaleka ia te au, Ona sau ai lea o Akako ia te ia ma le fiafia; ua faapea mai Akako, E moni lava ua mavae le tiga o le oti.
33A ua fai atu Samuelu, E pei ona āufanaua o fafine i lau pelu; e faapea foi lou tinā i fafine, e āufanaua o ia. Ona tamotuina lea o Akako e Samuelu i luma o Ieova i Kilikala.
34Ona alu lea o Samuelu i Rama, a e alu ae Saulo i lona fale i Kipea o Saulo.
35Ua le toe asiasi Samuelu ia Saulo, ua oo i le aso o lona oti; a ua faanoanoa Samuelu ia Saulo; ua salamo foi Ieova ina ua ia tofia Saulo e fai ma tupu o Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
