1Ua sao atu i latou, ona iloa lea o Melita le igoa o le motu.
2Ua maeu lava le alolofa mai o le nuu ese ia i matou; auā ua latou tafu le afi, ma talia mai i matou uma lava, ona o le uaga ua to ifo, ma le maalili.
3Ua faaputu e Paulo le avegāfafie, ma faaee i le afi, ona sau ai lea o le gata uogo ona o le vevela, ma pipii i lona lima.
4Ua vaai mai le nuu ese i le mea feai o tautau ifo i lona lima, ona fetautalatalai lea o i latou, O le fasioti tagata lava lena, e ui lava ina ua sao o ia mai le sami, a e le mafai i le toasa ona ola o ia.
5A ua lulu atu e ia le mea feai i le afi, ua le lagona se leaga.
6Ua faatali i latou fa‘i e fulafula, pe paū i lalo ma lipiola; a ua leva ona latou faatali, ma ua iloa atu ua le oo se mea leaga ia te ia, ona liliu lea o latou manatu, ua faapea ane, o se atua lava ia.
7Ua latalata i lenei mea fanua o le alii o le motu, o Popilio le igoa; ua na talia i matou, ua matou api i lona fale, ua agalelei mai o ia i aso e tolu.
8Ua taoto foi le tamā o Popilio i le ma‘i vevela ma le sana toto; ua alu atu Paulo ia te ia, ma ua tatalo, ona faaee lea e ia o ona lima i luga ia te ia, ua faamalolo ai ia te ia.
9Ua faia foi lenei mea, ona o mai ai lea o e na mama‘i uma lava i le motu, ma ua faamaloloina.
10Ua latou alolofa mai foi ia i matou i mea lelei e tele; ua oo ina a matou tuuvaa atu, ua faaee e i latou i luga o le vaa o mea e aoga.
11Ua mavae masina e tolu, ona matou tuuvaa atu lea i le vaa Alesania, sa i le motu i le tausaga e afā ai, o lona faailoga o Seukuroi.
12Ua o ae i uta i Surakusa, ona matou nonofo ai lea i aso e tolu.
13Ona folau faatafatafa ane ai lea, ua oo i gatai o Rekiu; ua mavae ai foi le aso e tasi i le agi mai ai le toga, ona oo lea o i matou i le aso lua i Puteoli.
14Ua iloa ai ni o matou uso, ua pulutia ai i matou e nonofo ma i latou i aso e fitu; ona o atu lea o i matou i Roma.
15Ua logona le tala ia i matou e le au uso o i ai, ona latou o mai lea e faafetaiai mai ia i matou, ua oo mai lava i Apio Foro, ma Fale faatau e tolu; ua vaai atu Paulo ia te i latou, ona faafetai lea i le Atua, ma loto tele ai.
16Ua oo i matou i Roma, ona tuu atu lea e le ta‘ita‘i o le toaselau i e ua fusifusia i le alii e pule i ‘au; a ua tuu atu o ia ia Paulo e nofo i lona lava fale ma se tagata tau e leoleo ia te ia.
17Ua mavae aso e tolu, ona faapotopoto mai lea e Paulo alii o Iutaia; ua potopoto mai, ona fai atu lea o ia ia te i latou, Sema e, le au uso e, e ui lava ina ou lei faia se mea faaletatau i le nuu ma le tu o tatou tamā, na tuuina atu a‘u o fusifusia mai Ierusalema i lima o Roma;
18ua faamasino mai i latou ia te au, ona loto lea e tuuina mai a‘u e alu, auā ua leai sa‘u amio e tatau ona ou oti ai.
19A ua faatu‘iese mai Iutaia, ona le mataofia lea o la‘u valaau ia Kaisara; a e le o ia te au se mea e momoli ai lo‘u nuu.
20O le mea lea ua ou aami atu ai ia te outou, se‘i tatou feiloai ma fetautalatalai; auā ona o le faamoemoe o Isaraelu ua fusifusia ai a‘u i lenei maea uamea.
21Ona fai mai lea o i latou ia te ia, Ua matou le maua ni tusi mai Iutaia ia te oe, e lei sau foi se tasi o tatou uso e tala mai pe fai mai se mea leaga o ia te oe.
22A o lo matou manao nei, se‘i faalogo atu ia te oe i lau taofi; auā ua iloa e i matou ua talaeseina lena lotu i nuu uma lava.
23O le aso na tuu e i latou, ua o mai ai tagata e toatele ia te iai lana api; ua faamatala atu e ia, ma molitino atu i le malo o le Atua ia te i latou, ma pulunaunau atu ia te i latou i mea ia Iesu, mai le tulafono a Mose atoa ma le au perofeta, e afua ile taeao e oo i le afiafi.
24Ua talitonu foi nisi i upu ua fai atu, a ua le talia e nisi.
25Ua taofi eseese i latou, ona o ese lea, a ua uma ona fai atu e Paulo le upu e tasi, Ua lelei lava le upu na fetalai mai ai le Agaga Paia e le perofeta o Isaia i o tatou tamā, ua faapea mai,
26Ina alu ia i lena nuu, ma fai atu, O lo outou faalogo e faalogo ai outou, a e le lagona; o lo outou vaai foi e vaai ai outou, a e le iloa.
27Auā ua mafiafia le loto o lena nuu, uma ua faalogo gata o latou taliga i faalogo, ua moeiini o latou mata; ne‘i vaai o latou mata, ma faalogo o latou taliga, ma lagona o latou loto, ma liliuina i latou, ma ou faamaloloina i latou.
28O lenei, ia iloa e outou ua molia le olataga mai le Atua i nuu ese, latou te faalogo ai lava.
29Ua mavae atu ana upu nei, ona o ese lea o tagata Iutaia, ua tele ai lo latou fefinauai.
30Ua nofo foi Paulo i tausaga atoa e lua i lona fale e totogi, ua na talia uma lava e na ulufale ia te ia,
31ua tala‘i le malo o le Atua, ma a‘oa‘o atu i mea a le Alii o Iesu Keriso ma le faamalosi lava, e lei vaoia.
Who We AreWhat We EelieveWhat We Do
2025 by iamachristian.org,Inc All rights reserved.
