1Ieova e, ou te faatuatua lava ia te oe; aua ne‘i faamaina a‘u e oo i le faavavau; ia e laveai mai ia te au i lau amiotonu.
2Ia e liliu mai ou fofoga ia te au; ia e vave laveai ia te au; ia fai oe mo‘u papa malosi, o le ‘olo mauga ou te ola ai.
3Auā o oe lava lo‘u papa, ma lo‘u ‘olo; ia e ta‘ita‘i mai ma tausi ia te au ona o lou suafa.
4Ia e ave ese ia te au i lea lava upega na latou natia ia maua ai a‘u; auā o oe lava lo‘u malosi.
5Ou te tuuina atu lo‘u agaga i lou aao; Ieova e, le Atua faamaoni, ua e togiolaina a‘u.
6Ou te ‘ino‘ino i e ua anaana i mea faatauvaa ma le pepelo; a e ou te faatuatua lava ia Ieova.
7Ou te fiafia ma ou olioli i lou alofa mai; auā ua e silasila i lo‘u tiga; ua e silafia a‘u ina o puapuagatia.
8Ua e le tuuina foi a‘u i le pule a e ita mai ia te au; ua e faatuina o‘u vae i le mea lautele.
9Ieova e, ia e alofa mai ia te au, auā ua ou puapuaga; ua fole o‘u mata, atoa ma lo‘u agaga, ma lo‘u manava, i le tiga.
10Auā ua faauma lo‘u ola i le faanoanoa, ma ou tausaga i le mapuitiga; ua faavaivaiina lo‘u malosi i a‘u agasala, ua gagase foi o‘u ivi.
11Ua faalumaina a‘u e i latou uma o e ita mai ia te au, a e sili lava i latou matou te tuaoi; ua avea a‘u ma faamatau i e sa matou masani; ua sosola ese ia te au o e iloa mai a‘u i fafo.
12Ua faagalogaloina a‘u e pei o le ua oti, ua le manatua lava; peiseai a‘u se ipu ua nutililii.
13Auā ua ou faalogo i le faaleaga mai e le toatele; ua siosiomia a‘u e le mata‘u, ona ua latou taupulepule faatasi ia te au, ua latou manatu i se togafiti ou te oti ai.
14A e peitai a‘u nei, ou te faalagolago ia te oe Ieova e, ou te faapea atu, O oe lava lo‘u Atua.
15O loo i ou aao o‘u aso; ia e laveai mai ia te au ai lima o e ita mai, ma e ua tuliloa mai ia te au.
16Ia malamalama mai ou fofoga i lau auauna; ia e faaola mai ia te au ona o lou alofa.
17Ieova e, aua ne‘i famaina lava a‘u, auā ou te valaau ia te oe; ia faamaina o e fai amio leaga, ia faalologo i latou i seoli.
18Ia faalologo laugutu pepelo; o e tautala faasiasia, ma le faamaualuga, ma le ‘ino‘ino i le tagata amiotonu.
19Ua tele lava lou agalelei ua teua e oe mo e ua matatau ia te oe, ua e faia i luma o le fanau a tagata mo e faatuatua ia te oe.
20E natia i latou e oe i le mea lilo i ou luma, ia le oo ia te i latou taupulepulega a tagata; e te faalilo ia te i latou i lou fale apitaga, ina ia le oo ai le finauga a laulaufaiva.
21Faafetai ia Ieova, auā na ia faasilisili lona alofa ia te au i le aai nofo ‘olo.
22O a‘u foi na ou fai atu i lo‘u polepole vale, Ua faateaina a‘u ai ou luma; a e peitai ua e faafofoga mai i le leo o la‘u aioi atu i lo‘u alaga atu ia te oe.
23O outou na uma lava o ona tagata amio Atua, ia outou alolofa atu ia Ieova; e leoleoina e Ieova o e faamaoni, a e matuā tauia e ia o e amio faamaualuga.
24O outou na uma lava, o e faamoemoe ia Ieova, ina faalototetele ia; e faamalolosia foi e ia o outou loto.
Who We AreWhat We EelieveWhat We Do
2025 by iamachristian.org,Inc All rights reserved.
