FAATAOTO, 16 - Samoan Old Version Bible

O LE MATAUPU XVI.

1O loo i le tagata sauniga o le loto; a o loo mai ia Ieova le tali a le laulaufaiva.

2O ala uma o le tagata, e lelei ai i lona lava manatu; a o Ieova, na te fuatia loto.

3Ia e tuuina atu ia Ieova o au galuega; ona faamauina ai lea o ou manatunatuga.

4Ua faia mea uma e Ieova, e iu ai lona lava finagalo; o le ua amio leaga foi mo le aso vale.

5E inosia e Ieova atoa uma e ua loto faamaualuga; e tago lea lima i lea lima, a e le faasaoina i latou.

6Ua togiolaina le amioletonu i le alofa ma le faamaoni; o le mata‘u foi ia Ieova, ua ‘alo ese ai tagata i le leaga.

7A fiafia Ieova i ala o le tagata ona faatupuina lea e ia o le leleiga ma ia o e ita ia te ia.

8E sili ona lelei o se mea itiiti, a o i ai le amiotonu, i mea e tele pe a le o i ai le tonu.

9E filifili i le loto o le tagata lona ala; a o Ieova na te faatonuina le mea e ui ai o ia.

10Ua se upu a lē iite poto le upu ua i laugutu o le tupu; e le tautala faapiopio lona fofoga i le faamasinoga.

11O le fua ma le fua faatautau ua tonu, o a Ieova ia; o lana lava galuega o maa uma e fua a‘i o i le taga.

12O le mea e ‘ino‘ino i ai tupu, e fai amio leaga; auā e faatumauina le nofoālii i le amiotonu.

13O le mea e fiafa ai tupu, o laugutu e tautala i upu tonu; ma le ua tautala i upu sa‘o, e alofagia lea e i latou.

14O le toasa o le tupu, o le sāvali o le oti lea; a o le tagata poto na te faalaulelei i ai.

15O loo i ai le ola i le malamalama o fofoga o le tupu; o lona alofa mai, e tusa lea ma le ao o le uaga mulimuli.

16Ia maua le poto, e sili ona lelei lea i le auro; ia maua foi le atamai, ia sili ona manaomia lea i le ario.

17O le ala tele o e amio sa‘o, o le ‘alo ese lea i le leaga; o le na te leoleo lona ala, na te faasaoina ai lona ola.

18E muamua le faamaualuga i le malaia; e muamua foi le loto faasiasia i le paū.

19E lelei ona maulalo o le loto faatasi ma e ua agamalu; a e leaga ona tufa le vete faatasi ma ē faamaualuga.

20O le ua faautauta i se mea, e maua e ia le mea lelei; o lē faatuatua foi ia Ieova, amuia o ia.

21O le ua poto le loto, e ta‘ua ia o lē mafaufau; o le suamalie foi o laugutu e tupu ai pea lona loto.

22O le puna o le ola le poto i le ua i ai; a o le a‘oa‘o atu o e valelea, o le valea lava lea.

23O le loto o le ua poto, e poto ai lona gutu; e faaopoopoina ai foi le poto i ona laugutu.

24O upu matagofie, o le meli ua sisina ifo ia; e suamalie i le loto, ma le mea e malolo ai ivi.

25O i ai le ala ua tonu i le manatu o le tagata; a o lona taunuuga, o ala ia e oti ai.

26O le tagata e galue, ua galue o ia mo ia lava; auā ua faatauanauina o ia e lona gutu.

27O le tagata ulavale, na te matuā saunia le leaga; o loo i ona laugutu o upu e peiseai o le afi mumū.

28O le tagata faapiopio, e faatupuina e ia le misa; ma lē faatuaupua, na te faateaeseina uo.

29O le tagata faasaua, na te faaoleole i lē la te tuaoi; na te ta‘ita‘iina foi o ia i le ala e le lelei.

30O loo moe ona mata e manatunatu ai i mea faapiopio; o loo memu ona laugutu e faataunuu ai le leaga.

31O le pale matagofie le ulusinā, pe a ua i ai i le ala o le amiotonu.

32E sili ona lelei o le ua gesegese i le ita i le ua malosi; e sili foi le ua pule i lona loto i le na te aea le aai.

33E faia le vili i le fatafata o le ofu; a e mai ia Ieova lona faatonuga uma lava.