1Ua fetalai mai foi Ieova ia Mose ma Arona, ua faapea mai,
2E to lauapi le fanauga a Isaraelu o le tagata i le mea e i ai lona tagavai ma le faailoga o le aiga o lona tamā; latou te to lauapi faafesaga‘i e faataaliolio i le fale fetafai o le faapotopotoga.
3O le itu i sasae, o le mea e alu ae ai le la, e to lauapi ai i latou o i ai le tagavai o le toagālauapi a Iuta i a latou ‘au; o le alii sili o le fanauga a Iuta, o Naasona lea o le atalii o Aminatapu.
4O ana ‘au foi, o i latou na faitaulia, e fitu sefulu o afe ma afe e fa ma le ono o selau.
5O le toagālauapi latou te tuaoi ma ia, o le itu aiga o Isakara lea; o le alii sili foi o le fanauga a Isakara, o Natanielu lea o le atalii o Suaro.
6O ana ‘au foi, o i latou lava na faitaulia, e lima sefulu o afe ma afe e fa ma le fa o selau.
7Ona oo lea i le itu aiga o Sepulona; o le alii sili foi o le fanauga a Sepulona, o Eliapo lea o le atalii o Holona.
8O ana ‘au foi, o i latou na faitaulia, e lima sefulu o afe ma afe e fitu ma le fa o selau.
9O i latou uma lava na faitaulia i le toagālauapi a Iuta e selau o afe ma afe e valu sefulu ma afe e ono ma le fa o selau, i a latou ‘au; o le muā malaga i latou.
10O i le itu i toga le tagavai o le toagālauapi a Reupena i a latou ‘au; o le alii sili foi o le fanauga a Reupena, o Elisura lea o le atalii o Seturo.
11O ana ‘au foi, o i latou na faitaulia, e fa sefulu o afe ma afe e ono ma le lima o selau.
12O le toagālauapi latou te tuaoi ma ia, o le itu aiga o Simeona lea; o le alii sili o le fanauga a Simeona, o Selumielu lea o le atalii o Surisatai.
13O ana ‘au foi, o i latou na faitaulia, e lima sefulu o afe ma afe e iva ma le tolu o selau.
14Ona oo lea i le itu aiga o Kato; o le alii sili o le fanauga a Kato, o Eliasafo lea o le atalii o Ruelu.
15O ana ‘au foi, o i latou na faitaulia, e fa sefulu o afe ma afe e lima ma le ono o selau ma le lima o sefulu.
16O i latou uma lava na faitaulia i le toagālauapi a Reupena e selau o afe ma afe e lima sefulu ma le afe e tasi ma le fa o selau ma le lima o sefulu, i a latou ‘au; e aupito ane i latou ona ō i e ua muamua.
17O le totonugalemu foi o isi toagālauapi e o ai le toagālauapi a sa Levī ma le fale fetafai o le faapotopotoga; e pei ona latou to lauapi e faapea foi ona latou o, o le tagata i le mea ua tofia i ai ma le mea e i ai o latou tagavai.
18O i le itu i sisifo le tagavai o le toagālanapi a Efaraima i a latou ‘au o le alii sili foi o le fanauga a Efaraima, o Elisama lea o le atalii o Ameuta.
19O ana ‘au foi, o i latou na faitaulia, e fa sefulu o afe ma le lima o selau.
20E tuaoi foi ma ia le itu aiga o Manase; o le alii sili foi o le fauauga a Manase, o Kamalielu lea o le atalii o Petasura.
21O ana ‘au foi, o i latou na faitaulia, e tolu sefulu o afe ma afe e lua ma le lua o selau.
22Ona oo lea i le itu aiga o Peniamina; o le alii sili foi o le fanauga a Peniamina, o Apitano lea o le atalii o Kitione.
23O ana ‘au foi, o i latou na faitaulia, e tolu sefulu o afe ma afe e lima ma le fa o selau.
24O i latou uma lava na faitaulia i le toagālauapi e Efaraima e selau o afe ma afe e valu ma le tasi o le selau, i a latou ‘au; o lona tolu o vaega i latou pe a o.
25O i le itu i matu le tagavai o le toagālauapi a Tanu i a latou ‘au; o le alii sili foi o le fanauga a Tanu o Aisera lea e le atalii o Amisatai.
26O ana ‘au foi, o i latou na faitaulia, e ono sefulu o afe ma afe e lua ma le fitu o selau.
27O le toagālauapi foi latou te tuaoi ma ia, o le itu aiga o Asera lea; o le alii sili foi o le fanauga a Asera, o Pagielu lea o le atalii o Okirano.
28O ana ‘au foi, o i latou na faitaulia, e fa sefulu o afe ma le afe e tasi ma le lima o selau.
29Ona oo lea i le itu aiga o Nafatali; o le alii sili foi o le fanauga a Nafatali, o Akira lea o le atalii o Enano.
30O ana ‘au foi, o i latou ua faitaulia, e lima sefulu o afe ma afe e tolu ma le fa o selau.
31O i latou uma lava na faitaulia i le toagālauapi a Tanu e selau o afe ma afe e lima sefulu ma afe e fitu ma le ono o selau; o le muli malaga i latou pe a o, e faatatau i o latou tagavai.
32O i latou lava ia na faitaulia o le fanauga a Isaraelu, i aiga o latou tamā; o i latou uma lava na faitaulia i o latou toagālauapi, i a latou ‘au, e ono selau o afe ma afe e tolu ma le lima o selau ma le lima o sefulu.
33A o sa Levi e lei faitaulia i latou faatasi ma le fanauga a Isaraelu, e pei ona poloai mai ai o Ieova ia Mose.
34Ua faia lava e le fanauga a Isaraelu e tusa ma mea uma na poloai mai ai Ieova ia Mose; e faapea ona latou to lauapi, i o latou tagavai, e faapea foi ona latou o, o le tagata ma lona lava aiga, i le aiga lava o lona tamā.
Who We AreWhat We EelieveWhat We Do
2025 by iamachristian.org,Inc All rights reserved.
