1Ieova e, aua e te aoai mai ia te au i lou toasa; aua foi e te sasa ia te au i lou toasa tele.
2Auā ua o au u fanafana i totonu ia te au, ua mamafa foi lou aao i luga ia te au.
3E leai se itu o lo‘u tino ua sao ona o lo‘u toatamai; e leai se filemu i o‘u ivi ona o a‘u agasala.
4Auā ua oo lava a‘u agasala i luga o lo‘u ulu; e pei o se avega mamafa, ua mafatia ai lava a‘u.
5Ua elosia o‘u manua; ua alu ae le alou ona o lo‘u valea.
6Ua faano‘uno‘uina a‘u; ua ou matuā punou lava i lalo; ou te fealuai ma le eleelea i le aso atoa.
7Auā ua tigaina lo‘u manava i le ma‘i vevela; e leai se itu o lo‘u tino ua sao.
8Ua ou matuā vaivai, ua ou momomo lava; ou te faataio ona o le oi o lo‘u loto.
9Le Alii e, o loo i ou luma lo‘u manao uma; e le lilo foi ia te oe lo‘u mapuitiga.
10Ua sapotuvale lo‘u fatu manava, ua te‘a lo‘u malosi; o le malamalama foi sa i o‘u mata, ua le ia te au lea.
11Ua tutū mamao a‘u uo ma a‘u aumea mamae i lo‘u malaia; ua tutū mamao foi o i latou matou te tuaoi.
12Ua fai mailei o e saili ia ou oti; o i latou foi o e sailiili ia leaga ai a‘u o loo tautala i mea leaga, ma mafaufau i mea faa‘ole‘ole i le aso atoa.
13Peitai a‘u nei, ua faapei o se tagata tutuli, ua ou le lagona; po o sē gūgū, ua le tautala lona gutu.
14O a‘u foi e pei se tagata ua le lagona, e leai foi se upu finau i lona gutu.
15Auā Ieova e, ou te faamoemoe ia te oe; o oe le Alii e, lo‘u Atua, e te tali mai ai.
16Auā na ou faapea, ne‘i latou mitamita mai ia te au; pe a mapeva lo‘u vae latou te faasausili mai ia te au.
17Auā o a‘u nei, e toe ina ou paū; ua lumanai pea ia te au lo‘u tiga.
18Auā ou te ta‘uta‘uina atu la‘u amio leaga; ou te atuatuvale ona o la‘u agasala.
19A ua tagata ola i latou o e ita mai ia te au, ua malolosi i latou; ua faatoateleina o e ‘ino‘ino fua mai ia te au.
20O i latou foi o e taui atu le lelei i le leaga, ua latou fai a‘u mo latou fili, auā ou te tausisi i mea lelei.
21Ieova e, aua ne‘i e tuuna mai a‘u; lo‘u Atua e, aua e te vavamamao ma a‘u.
22Le Alii e, lo‘u faaolataga, ia e faataalise mai e fesoasoani mai ia te au.
Who We AreWhat We EelieveWhat We Do
2025 by iamachristian.org,Inc All rights reserved.
