1O le avega a Turo. Ina uio ia outou vaa o Tasesa, auā ua faatafunaina o ia; e leai se fale, e leai foi se mea e ui atu ai; ua faaali atu ai ia te i latou ai le nuu o Kitimo.
2Ina faalologo ia outou o e nonofo i le nuu tuloto, o tagata faatauoa o Saitonu, e ua ui atu i le sami, na latou faatumuina oe.
3Sa i ai saito o Seora i vai tetele, o le seleselegāsaito mai le vaitafe na mau oloa ai o ia; na fai o ia ma mea e faatau ai oa i nuu ese.
4Saitonu e, ia masiasi oe, auā ua tautala mai le sami, o le ‘olo lava o le sami, o loo faapea mai, Ua le faatiga a‘u, ua ou le fanau mai, ua ou le tausia ni taulelea, ua ou le tausia foi ni taupou.
5E pei ona tiga o i latou i le tala ia Aikupito, e faapea ona tiga tele o i latou i le tala ia Turo.
6Ina o atu ia i Tasesa, ina uio ia outou o e nonofo i le nuu tuloto.
7O la outou aai olioli ea lenei, o lona amataga mai ona po anamua lava ia? O ona lava vae e avea mamao ai o ia ina ia aunuua ai.
8O ai ea ua na pule lenei mea ia Turo le ua tufatufa palealii? o ona tagata faatauoa o alii sili i latou, o ona tagata faatau o alii mamalu o le lalolagi i latou.
9O Ieova o ‘au ua ia pule ai, ina ia faaiu vale le faalialia o mea matagofie uma, ma ia faaleaogaina alii mamalu uma o le lalolagi.
10Ia e ui atu i lou nuu e pei o le vaitafe, le tama fafine a Tasesa e, ua le toe ai se pupuni.
11Ua faaloaloa lona aao i luga o le sami, ua na faagateteina malo; ua fetalai Ieova i Kanana ia faaumatia ona ‘olo.
12Ua fetalai mai o ia, E te le toe mitamita oe le taupou, le tama fafine a Saitonu le ua faaleagaina; ina tu ia i luga, ina o atu ia i Kitimo; a e leai se filemu ia te oe i lea mea.
13Faauta i le nuu o Kaletaia, o le nuu lea sa leai, na faatuina e Asuria mo e sa nonofo i le vao; ua latou faatuina o latou ‘olo, ua latou faaumatia ona maota; ua latou faia o ia ma faupuegafale ua pauu.
14Ina uio ia outou vaa o Tasesa, auā ua faatafunaina lo outou ‘olo.
15O lea aso foi e galo ai Turo i tausaga e fitugafulu, e tusa ma aso o le tupu e tasi; a mavae tausaga e fitugafulu, ona faia ai lea ia Turo e peiseai o le pese i le fafine talitane.
16Tago ia i le kitara, ina fealuai solo ia i le aai, o oe le fafine talitane ua faagaloina; ia e ta malie; ia tele ni pese e lagi, ina ia manatua oe.
17A mavae foi tausaga e fitugafulu e asiasi Ieova ia Turo; ona toe foi atu ai lea o ia i lona taui, ona faitaaga ai lea o ia ma malo uma o le lalolagi, o e o i le fogāeleele.
18A o ana mea e maua atoa ma lona taui e faasaina ia mo Ieova; e le faaputuina i mea e teu ai oloa, e le teua foi; auā o ana mea e maua e fai ia mā latou o e nonofo i luma o Ieova, ina ia aai ai ia maoona, ia fai ai foi ofu matagofie.
Who We AreWhat We EelieveWhat We Do
2025 by iamachristian.org,Inc All rights reserved.
