1O le mea lea ua e le mautali ai oe le tagata o lē faasalaina atu, auā o lou faasalaina atu i se tasi, ua e faasalaina ai oe e oe; auā o oe lē faasalaina atu, ua e faia ia lava mea.
2Ua tatou iloa foi, e tatau lava ma le upu moni le faasala a le Atua i e fai mea faapena.
3Le tagata e, o lē faasalaina atu i e fai mea faapena, a ua e faia ia lava mea, o lou lea manatu ea e te sao lava oe i le faasala a le Atua?
4po ua faatauvaa ea ia te oe le faulai o lona agamalu, ma lona faapalepale, ma lona onosai, o loo e le iloa e ta‘ita‘iina oe e le agamalu o le Atua i le salamo?
5a e peitai o lou loto maaa ma le le salamo, e te faaputu ai ea mo oe le toasa i le aso o le toasa ma le faaaliga o le faasala tonu a le Atua,
6o le na te tuuina atu le taui taitasi i tagata e tusa ma a latou galuega?
7E tuuina atu foi le ola e faavavau i e tumau pea i galuega lelei, ua latou saili ai le viiga, ma le mamalu, ma le le iu vale;
8a o le toatamai ma le toasa i e finau vale, ma e le gauai i le upu moni, a e gauai i le amio leaga;
9o le puapuaga ma le atuatuvale i tagata uma lava o e fai amio leaga, e muamua le Iutaia, atoa ma le Eleni;
10a o le viiga, ma le mamalu, a le manuia ia te i latou uma o e fai amio lelei; e muamua le Iutaia, atoa ma le Eleni.
11Auā e le faailogaina e le Atua ni tagata;
12auā atoa uma e ua agasala e le o i ai le tulafono, e fano i latou ua le o i ai le tulafono; atoa uma foi e ua agasala ua i ai le tulafono, e faasalaina i latou i le tulafono;
13(auā e le ta‘uamiotonuina i luma o le Atua e ua faalogologo atu i le tulafono, a e peitai o e anaana i le tulafono, e ta‘uamiotonuina i latou.
14Auā pe a fai fua e nuu ese e le o i ai le tulafono o mea e tusa ma le tulafono, e ui ina le o i ai le tulafono, ua avea i latou ma tulafono ia te i latou;
15o i latou ia ua iloa mai ai le galuega o le tulafono ua tusia i o latou loto, e ō faatasi ai foi o latou loto fuatia ifo, o loo fefaaleagai foi, pe fefaatonuai o latou manatu;)
16a e faasalaina i latou i le aso e faamasinoina ai e le Atua e Iesu Keriso mea lilo a tagata, e tusa ma la‘u tala lelei.
17Faauta, ua igoa oe o le Iutaia, o loo e faalagolago foi i le tulafono, ma e mitamita i le Atua,
18ua e iloa foi lona finagalo, ua masino foi ia te oe mea uiga eseese, ina ua a‘oa‘oina oe i le tulafono;
19o loo e taofi foi, o oe o le ta‘ita‘i o tauaso, o le malamalama i e o i le pouliuli,
20o le a‘oa‘o i e valelea, o le a‘oa‘o i tama iti, ina ua e maua o le tino o le poto ma le upu moni i le tulafono.
21Lenei foi, o oe lē a‘oa‘o atu i le tasi tagata, e te le a‘oa‘o ea oe ia te oe? o oe lē lauga atu. Aua le gaoi, e te gaoi ea oe?
22o oe lē fai ane, Aua le mulilua, e te mulilua ea oe? o oe lē matuā ‘ino‘ino i tupua, e te faoa ea mea sa?
23o oe lē mitamita i le tulafono, e te faalemigao ea i le Atua i lou soli i le tulafono?
24auā ua upuleagaina le suafa o le Atua talu outou i nuu ese, faapei ona tusia.
25Auā e aoga le peritome, pe afai e te anaana i le tulafono; a e afai e te soli i le tulafono, ua avea ai lou peritome ma faaleperitomeina.
26O lenei, afai e tausia e le le peritome upu tonu o le tulafono, e le ta‘uperitomeina ea lona le peritome?
27O le ua tupu mai foi ma le le peritomeina, a ua anaana lava i le tulafono, e faasala e ia ia te oe lē soli i le tulafono, ua ia te oe le Tusi ma le peritome.
28Auā e le o le Iutaia le ua vaaia, e le o le peritome foi le ua vaaia i le tino;
29a e peitai o le ua le vaaia, o le Iutaia lava lea; o le peritome foi, ua i le loto lea, o loo i la le agaga lea, e le o i la le tusi; o lona viiga e le mai tagata, a e mai le Atua.
Who We AreWhat We EelieveWhat We Do
2025 by iamachristian.org,Inc All rights reserved.
