II KORINITO, 12 - Samoan Old Version Bible

O LE MATAUPU XII.O le mitamita o Paulo i ona puapuaga.

1A e le tatau ona ou mitamita; a o le a oo atu la‘a upu i mea na vaaia ma faaaliga mai le Alii.

2Ua ou iloa le tasi tagata o Keriso, ua tasi le sefulu ma le fa o tausaga talu ona segia o ia i le lagi tua tolu, (ou te le ilea pe na i le tino, ou te le iloa pe lei i le tino; ua silafia le Atua.)

3Ua ou iloa foi lena tagata, (ou te le iloa pe na i le tino o ia, pe lei i le tino; ua silafia le Atua.)

4Na segia o ia i parataiso, ma na faalogo i upu e le mata‘uta‘ua, e le tatau foi i se tagata ona tautala i ai.

5O lena tagata ou te mitamita ai, a ou te le mitamita ia te au, tau lava o mea ua ou vaivai ai.

6Auā afai ana ou fia mitamita, po ua ou le valea ai; auā o le upu moni ou te fai atu ai; a e soia, ina ne‘i sili le manatu o se tasi ia te au i mea e vaai mai e ia ia te au, po o mea e faalogo mai e ia ia te au.

7Ina ne‘i faamaualuga a‘u i le silisili ese o mea na faaalia mai, sa tuuina mai ia te au le mea matuitui i le tino, ole agelu a Satani, e tu‘i mai ia te au, ina ne‘i ou faamaualuga.

8Na ou aioi faatolu atu i le Alii ona o lea mea, ina ia alu ese ia te au.

9Ona faapea mai ai lea o ia ia te au. O lo‘u nei alofa tunoa e lava lea e fesoasoani ia te oe; auā o le vaivai e faaatoaina ai lo‘u mana. O lea ua tele ai lava lo‘u fiafia i le mitamita i mea ua ou vaivai ai, ina ia tumau i o‘u luga le mana o Keriso.

10O lea ou te fiafia ai i mea e vaivai ai, o le faaleaga mai, o malaia, o le agatele mai, o le atuatuvale ona o Keriso; auā pe a ou vaivai, ona ou malosi ai lea.

11Ua avea a‘u ma vale i lo‘u mitamita; a ua tosina a‘u e outou; auā ana viia a‘u e outou po ua tatau ai; auā e ui lava ina ou faatauvaa lava, e leai se mea ou te itiiti ai i aposetolo silisili.

12Na faia lava faailoga o le aposetolo ia te outou i le onosai uma, i faailoga, ma vavega, ma mea mamana.

13Se a se tasi mea na le tusa ai outou ma nisi ekalesia, na o lea ina ua le tigaina outou ia te au? Ina faamagalo mai ia ia te au i lena agaleaga.

14Faauta, ua atu tolu lo‘u sauni ou te alu atu ia te outou; ou te le faatiga foi ia te outou; auā ou te le saili i a outou mea, a e peitai o outou lava; auā e le tatau ona faaputu oa e le fanau mo mātua, a o mātua mo le fanau.

15Ou te matuā fiafia lava e faauma a‘u mea, ia faaumatia foi a‘u ona o outou agaga; auā e ui lava ina atili ai ona itiiti ona alofagia o a‘u, a e matuā tele pea lo‘u alofa atu ia te outou.

16Ina tuu ia o lea. Na le mafatia outou ia te au; a o la‘u fai togafiti ua maua ai outou e a‘u i le ‘ole‘ole.

17Pe na ou saili mea ia te outou ma le ‘ole‘ole e so latou na ou auina atu ia te outou?

18Na ou aioi ia Tito, na ou auina atu foi i laua ma le tasi uso. Pe na saili mea ea Tito ia te outou ma le ‘ole‘ole? na matou le savavali ea ma le loto e tasi? na matou le tulagāvae faatasi ea.

19O lenei, fa te outou ea matou te faatonu atu la matou amio ia te outou? o loo i luma o le Atua, o matou o tautala atu ai nei o i matou ua ia Keriso; le au pele e, ua faia ia mea uma e faamafanafanaina ai outou.

20Auā ou te fefe ne‘i iloa outou e a‘u, e le faapei ona ou loto i ai, pe a ou alu atu, ne‘i iloa foi a‘u e outou, e le pei ona outou loto i ai; ne‘i ia te outou o misa, o faamatataua, o faalotoa, o finau vale, o upuesega, o tuaupua, o loto faafefeteina, o faaletaupulea;

21ina ne‘i faamaualaloina a‘u e lo‘u Atua ona o outou, i lo‘u toe alu atu ia te outou; ona ou faanoanoa lea i nisi e toatele o e na agasala anamua, ma ua le salamo i le amio leaga, ma le faitaaga, ma le matāitu na latou faia.