KENESE, 38 - Samoan Old Version Bible

O LE MATAUPU XXXVIII.O tala ia Iuta ma ana fanau.

1O ona po lava ia, na alu ifo ai Iuta na i ona uso, ua afe ane i le tagata o Atulama, o Eira lona igoa.

2Ua iloa ai e Iuta le afafine o le tagata Kanana, o Sua lona igoa, na ia ave ia te ia, ua fai mana avā.

3Ua to o ia, ua fanau mai o le tama tane, ua faaigoa ia te ia o Eru.

4Ua toe to, ua fanau mai o le tama tane, ua faaigoa ia te ia o Onani.

5Ua toe fanau ia o le tama tane, ua faaigea ia te ia o Sila; na fanau mai o ia ina o i Kasepa lona tamā.

6Ua saili e Iuta se avā ma Eru lana ulumatua, o lona igoa o Tamara.

7A o Eru le ulumatua a Iuta, sa leaga o ia i le silafaga a Ieova, ona fasioti lea o Ieova ia te ia.

8Ua fai atu Iuta ia Onani, Alu ane ia oe i le avā o lou uso, e fai mau avā, ma faatupu ai se gafa o lou uso.

9Ua iloa Onani e le fai mana le fanau; ua oo ina ua alu atu i le avā a lona uso, ua ia faamaumau i le eleele, ina ne‘i faatupu e ia se gafa o lona uso.

10Ua leaga lava i le silafaga a Ieova le mea na ia faia, ona fasioti foi lea ia te ia.

11Ua fai atu Iuta ia Tamara le avā a lona atalii, Ina nofo fua ia oe i le aiga o lou tamā, seia matua Sila lo‘u atalii; auā sa faapea ia, Ne‘i oti foi o ia, pei o ona uso. Ona alu lea o Tamara, ua nofo i le aiga o lona tamā.

12Ua tele aso, ona oti lea o le afafine o Sua le avā a Iuta; ua faamafanafanaina Iuta, ona alu ae lea o ia i e sele fulufulu o ana mamoe i Timenata, o i laua ma Eira lana uo le Atulama.

13Na ta‘uina atu ai ia Tamara, o loo faapea, Faauta, o le tamā o lau tane ua alu ae ia i Timenata e sele ai fulufulu o ana mamoe.

14Ua ia tuu ese ofu o lona nofo fua sa ofu ai o ia, ua ufiufi ia te ia i le ie ufiufi mata, ua pulupulu ia, ua nofo i le faitotoa o Ainaima o i le ala i Timenata, auā na vaai ia ua matua Sila, a e le tuuina o ia ia te ia e fai mana avā.

15Ua iloa o ia e Iuta, fa te ia o ia le fafine talitane, auā sa na ufiufi ona mata.

16Ua afe ane ia ia te ia i le auala, ua fai atu ai, Ou te alu atu ea ia te oe? Auā na te lei iloa o le avā ia a lona atalii. Ua fai mai o ia, Se a se mea e te aumaia ia te au ina ia e sau ia te au?

17Ua fai atu, Ou te avatu ia te oe se tamai ‘oti ai le lafu. Ua fai mai o ia, E te aumaia ea se mea e fai ma faamaoni seia au mai ai le mea?

18Ua fai atu o ia, Se a se mea ou te avatu ui ia te oe e fai ma faamaoni? Ua fai mai o ia, O lou faamaufaailoga, ma lou asoa, ma lou tootoo o loo i lou lima. Ua avatu ai ia te ia, ona alu ane ai lea o ia ia te ia; ua to foi o ia ia te ia.

19Ua tulai le fafine, ua alu, ua tuu ese le ie sa ufiufi ai ona mata, ua ofu i ofu o lona nofo fua.

20Ua avatu e Iuta le tamai ‘oti i le lima o lana uo le Atulama e au mai ai mea na fai ma faamaoni i le lima o le fafine, a ua le iloa ia.

21Ua fesili o ia i tagata o le nuu, o loo faapea, O fea o i ai le fafine talitane sa i Ainaima i le au ala? Ua fai mai i latou, E leai se fafine talitane i le mea nei.

22Ua foi mai o ia ia Iuta, ua fai mai ai, Ua ou le iloa ia, mona ua fai mai tagata o le nuu, e leai se fafine talitane i lea mea.

23Ua fai ane Iuta, Ave pea ia mana, ne‘i inosia i taua; faauta, na ou avatua lenei tamai ‘oti, a ua e le iloa ia.

24Po ua atoa ea ni masina se tolu, ona ta‘uina atu ai lea ia Iuta, ua faapea, Ua faitaaga Tamara le avā a lou atalii, faauta foi, o loo ua to ia i ana faitaaga. Ona fai atu lea o Iuta, Au mai ia o ia, ina susunu.

25O loo ta‘ita‘iina atu o ia, na ia auina atu i le tamā o lana tane, o loo faapea atu, O le tagata e ana nei mea ua ou to ai; ua faapea foi o ia, Se‘i e iloilo po o ai e ana nei mea, o le faamaufaailoga, ma le asoa, ma le tootoo.

26Ua iloa lava e Iuta, ona fai ane lea, Ua sili ona tonu lana amio i la‘u, ona ua le avatua o ia ia Sila lo‘u atalii; ua la le toe feiloa‘i.

27Ua oo i le aso e fanau ai, faauta, o le masaga ua i lona manava.

28Ua oo i lona fanauga, ua tuu mai le lima, ua tago i ai le na faatosaga le fanauga, ma fusi le mea mūmū i lona lima, o loo faapea, Ua muamua ona alu ifo lenei.

29Ua toe foi atu lona lima, faauta foi, ona alu ifo lea o lona uso; ona fai atu lea o ia, Se a le mea ua e oso mai ai? E ia te oe lenei oso vale; ua faaigoa ai o ia o Faresa.

30E mulimuli ane ua alu ifo lona uso o i lona lima le mea mūmū, ua faaigoa ia te ia o Sera.