1Ua matuā puipuia Ieriko e le fanauga a Isaraelu, e leai se alu atu, e leai se sau ai.
2Ona fetalai mai ai lea o Ieova ia Iosua, Faauta mai ea, ua ou tuuina atu i lou lima o Ieriko, ma lona tupu, ma ona toa malolosi.
3Ia outou faataamilo i le aai, o ‘au uma o le taua, ia tasi le faataamilosaga o le aai. Ia faapea ona e faia i aso e ono.
4E ave e faitaulaga e toafitu o pu e fitu o le iupeli i luma o le atolaau; o le aso fitu tou te faataamilo faafitu ai i le aai; e ilia foi pu e le au faitaulaga.
5A faalevaleva ona ili o le pu o le iupeli, pe a outou faalogo i le leo o le pu, ona alalaga lea o le nuu uma ma le leo tele; ona solo ai lea i lalo o le pa o le aai; ona o ae ai lea o le nuu uma taitasi i o latou luma.
6Ona valaauina lea o faitaulaga e Iosua le atalii o Nuno, ma na fai atu ia te i latou, Ina ave ia le atolaau o le feagaiga, ma ia ave e faitaulaga e toafitu o pu e fitu o le iupeli, i luma o le atolaau a Ieova,
7Ua ia fai atu foi i le nuu, O atu ia, ma faataamilo i le aai, o e ua sauni i le taua ia o atu ia i luma o le atolaau a Ieova.
8Ua mavae atu le upu a Iosua i le nuu, ona o atu ai lea o faitaulaga e toafitu, o ave e i latou pu e fitu o le iupeli i luma o Ieova, ma latou ilia pu; ua mulimuli atu ia te i latou le atolaau o le feagaiga a Ieova.
9Ua o atu foi e ua sauni i le taua i luma o faitaulaga o e ili pu; ua mulimuli atu muli‘au i le atolaau, o savavali faitaulaga ma ili pu.
10Ua fai atu foi Iosua i le nuu, ua faapea atu, Aua ne‘i outou alalaga; aua foi ne‘i lagona o outou leo; aua foi ne‘i tautala lava, seia oo i le aso ou te fai atu ai ia te outou ia alalaga, ona outou alalaga ai lea.
11Ua faataamilo le atolaau a Ieova i le aai, o le faataamilosaga e tasi; ona latou o mai ai lea i le toagālauapi, i le latou momoe ai i le toagālauapi.
12Ona tulai lea o Iosua i le taeao lava, ua avae foi e faitaulaga le atolaau a Ieova.
13O faitaulaga e toafitu o e ave pu e fitu o le iupeli i luma o le atolaau a Ieova, ua savavali lava i latou ma ili pu; ua o atu foi i o latou luma e ua sauni i le taua; a ua mulimuli atu muli‘au i le atolaau a Ieova; o savavali faitaulaga ma ili pu.
14O le aso lua foi ua latou faataamilo faatasi ai i le aai, ona latou toe foi mai ai lea i le toagālauapi; sa faapea lava ona latou faia i aso e ono.
15A o le aso fitu ua latou tulai ai i le malama ae o le taeao, ma latou faataamilo faapena i le aai e atu fitu; na o le aso lea ua latou faataamilo faafitu ai le aai.
16Ua oo i le atu fitu, ua ili pu e faitaulaga; ona fai atu ai lea o Iosua i le nuu, Ina alalaga ia, auā ua foaiina mai e Ieova le aai ia te outou.
17E faatoina le aai, o le aai lava, ma mea uma ua i ai mo Ieova; na o Raava le fafine talitane e ola ia; o ia, ma i latou uma o i le fale ma ia; auā sa natia e ia e na aauina na tatou aauina atu.
18A o outou, ia outou ma le mea ua faatoina; ne‘i faatoina outou pe a outou ave se mea ua faatoina; ona outou faia lea o le toagālauapi o Isaraelu ma mea ua faatoina; ma outou faatigaina ai.
19A o le ario uma, ma le auro, ma ipu ‘apa memea, ma uamea, e faasaina lava mo Ieova, e avatua i le mea e teu ai oa a Ieova.
20Ua ili pu e faitaulaga, ona alalaga ai lea o le nuu; ua faalogo le nuu i le leo o le pu, ona alalaga lea o le nuu i le leo tele, ona solo ai lea i lalo o le pa, ona o ae ai lea o le nuu i le aai taitasi i o latou luma, ua latou aea foi le aai.
21Ona matuā faaumatia ai lea e i latou i le pelu o i latou uma sa i le aai, o tane ma fafine, o tama ma toeaina, atoa ma povi, ma mamoe, ma asini;
22a ua fai atu Iosua i tagata e toalua na asiasi le nuu, Ina o ia o oulua i le fale o le fafine talitane, ma au mai ai le fafine, ma i latou uma ua ia te ia, e pei ona oulua tauto ia te ia.
23Ona o ai lea o taulelea o e na asiasi le nuu, ma latou au mai ia Raava, ma lona tamā, ma lona tinā, ma ona tuagane, ma i latou uma na ia te ia; ua aumaia e i laua ona aiga uma, ma tuu ai i tua o le toagālauapi o Isaraelu.
24A o le aai ma mea uma na i ai, ua faamuina e i latou i le afi; na o ario, ma auro, ma ipu ‘apa memea, ma uamea, ua latou tuu ai i le mea e teu ai oa i le fale o Ieova.
25Ua faaolaina e Iosua o Raava le fafine talitane, ma le aiga o lona tamā, ma i latou uma na ia te ia; o loo nofo foi o ia i Isaraelu ua oo lava i nei ona po; auā sa natia e ia e na aauina e Iosua e asiasi Ieriko.
26Ua fai atu foi Iosua ia te i latou ia tauto i lea aso, ua faapea atu, Ia malaia i luma o Ieova le tagata e tulai, ma toe faatu lenei aai o Ieriko; e faavaeina i lana ulumatua, e faatuina foi puipui i lana uii.
27Na ia Iosua Ieova; ua oo foi lona logo i le nuu uma.
Who We AreWhat We EelieveWhat We Do
2025 by iamachristian.org,Inc All rights reserved.
