1O ia ona aso ua o mai ai isi tagata, ua tala mai ia te ia i tagata Kalilaia, ina ua fefiloi e Pilato lo latou toto ma le toto o a latou taulaga.
2Ona tali atu lea o Iesu, ua faapea atu ia te i latou, Fa te outou ea, ua sili ona agasala ia Kalilaia i tagata Kalilaia uma, ina ua tigaina i latou i mea faapena?
3Ou te fai atu ia te outou, e leai; a e afai tou te le salamo, e faapena lava ona fano outou uma.
4I le ma le toasefulu ma le toavalu sa paū i o latou luga le ‘olo i Seloa, ua latou oti ai; fa te outou ea, ua sili a latou agasala i tagata uma e na nonofo i Ierusalema?
5Ou te fai atu ia te outou, e leai; a e afai tou te le salamo, e faapena lava ona fano outou uma.
6Ua fetalai atu ia le faataoto nei. Sa i le tasi tagata le mati, na totō i lana tovine; ua alu atu ia e saili ai ni fua, a e lei maua.
7Ona fai atu lea o ia i le galue vine, Faauta, ua ou sau i ia tausaga ua tolu e saili ni fua i lenei mati, a ou te lei maua lava; ina tuu ia i lalo; se a foi le mea e faaleaoga ai le fanua?
8Ua tali mai o ia ia te ia, ua faapea mai, Le alii e, tuu pea ia i lenei tausaga foi, seia ou eli faataaliolio i ai, ma avane i ai otaota.
9Afai foi e fua mai, e lelei; pe afai e leai, e mulimuli ane ona e tuu ai lea i lalo.
10Sa a‘oa‘o ia i le tasi sunako i le sapati.
11Faauta foi, sa i ai le fafine ua ia te ia le agaga e vaivai ai i ona tausaga ua sefulu ma le valu, ua faano‘uno‘u lava ia, e le mafai lava ona tu sa‘o i luga.
12Ua silafia o ia e Iesu, ona valaau atu lea o ia ia te ia, ua faapea atu, Funa e, ua tatalaina lou vaivai.
13Ua faaee atu e ia ona aao ia te ia; ona faasa‘oloaina lea o ia, ua vivii atu foi o ia i le Atua.
14Ona tautala mai ai lea o lē pule i le sunako, ua ita ina ua faamalolo Iesu i le sapati, ua fai ane ia i le motu o tagata, E ono ia aso e tatau ona galulue ai; o aso ia tou te o mai ai ia faamaloloina, a e aua lava i le sapati.
15Ua tali atu le Alii ia te ia, ua faapea atu, O oe na le pepelo; e le ua taitasi ea o outou i le sapati ma tatala i lana povi, po o lana asini i le fale povi, ma ta‘ita‘i e faainu?
16A o le fafine nei, o le afafine o Aperaamo, ua noanoatia e Satani, faauta ona tausaga ia ua sefulu ma le valu, e le tatau ea ona tatalaina o lenei noanoaga ia te ia i le aso sapati?
17Ua fetalai ane ia na upu, ona mamā uma ai lea o e ita mai ia te ia; a ua olioli lava le motu o tagata uma ona o ia mea silisili uma na faia e ia.
18Ua fetalai ane foi o ia, E tusa le malo o le Atua i ni a? ou te faatatau i ai i ni a?
19E tusa ia ma le fua o le sinapi, ua ave e le tasi tagata, ma lafo i lona fanua; ua tupu, ua avea ma laau tele; ua momoe foi manu felelei i ona la.
20Ua toe fetalai atu foi o ia, Ou te faatatau le malo o le Atua i ni a?
21E tusa ia ma le mea faafefete, ua ave e le fafine ma tuu i totonu o le falaoa e tolu tumu, ua oo ina faafefeteina uma ai.
22Ua ui ane foi o ia i aai ma faoa aai, ua a‘oa‘o fano, o alu malaga atu i Ierusalema.
23Ua fai mai le tasi ia te ia, Le Alii e, e toaitiiti ea e faaolaina? Ona fetalai atu lea o ia ia te i latou,
24Ia outou finafinau ina ia ulu atu i le faitotoa va apiapi; auā ou te fai atu ia te outou, e toatele latou te saili ina ia ulu atu, a e le mafai lava.
25A uma ona tulai o le matai o le fale, ma pupuni le faitotoa, ona outou tutū lea i fafo, ma tu‘itu‘i i le faitotoa, e faapea mai, Le Alii e, le Alii e, ia e to mai ia te i matou; a e tali atu ia, e faapea atu ia te outou, Ou te lei iloa outou pe maifea.
26Ona fai mai ai lea outou, Na matou aai ma inu i ou luma; na e a‘oa‘o foi i o matou ala.
27Ona faapea atu lea o ia, Ou te fai atu ia te outou, ou te lei iloa outou pe maifea; ina o ese ia outou ia te au, o outou uma o e fai amio leaga.
28E i ai le taufaitagiaue ma le lilivau o nifo, pe a iloa e outou o Aperaamo, ma Isaako, ma Iakopo, ma le au perofeta uma i le malo o le Atua, a o outou ua tulia i fafo.
29E o atu tagata mai sasae, ma sisifo, ma le itu i matu, atoa ma le itu i toga, e taooto e aai i le malo o le Atua.
30Faauta foi, o e mulimuli e avea ia ma muamua; o e muamua foi e avea ia ma mulimuli.
31O lea lava aso ua o mai ai isi o le au faresaio, na fai mai ia te ia, Alu ia oe, ina alu lava; auā o Herota ua na fia fasioti ia te oe.
32Ona fetalai atu lea o ia ia te i latou, Ina o ia, fai atu i lea alope, Faauta, ou te tuli i fafo temoni, ou te faamalolo foi i e mamai i le asō ma taeao, a oo i e luā ou te faaiuina ai.
33Peitai e tatau ona ou fealualuai i le asō, ma taeao, atoa ma e luā; auā e le mafaia lava ona fano se perofeta i se tasi mea na o Ierusalema lava.
34Ierusalema e, Ierusalema e, o lē fasiotia perofeta, ma fetogi i maa e na aauina atu ia te oe; ua tele lava o‘u manao e faapotopoto i lau fanau, e pei o le moa ona ofaofatai i lana toloai i lalo i ona apaau, a e le mafafai outou.
35Faauta, e tuua lo outou fale, e faatafunaina; a e moni ou te fai atu ia te outou, tou te le iloa mai lava a‘u, seia oo atu i le aso tou te fai ane ai, Ia manuia lē maliu mai i le suafa o le Alii.
Who We AreWhat We EelieveWhat We Do
2025 by iamachristian.org,Inc All rights reserved.
