1Ua fetalai mai le Atua ia Iakopo, Tulai ia, ina e alu ae i Peteli ma nofo ai; ma e fai ai le fata faitaulaga i le Atua na faaali ia te oe ina ua e sola ese ia Esau lou uso.
2Ona fai ane lea o Iakopo i lona aiga ma i latou uma sa ia te ia, Tuu ese ia o atua ese o loo i ai ia te outou, ma ia outou faamamā ia te outou, ma fesui i o outou ofu;
3ina tatou tulai ia, ma tatou o ae i Peteli, ou te fai ai le fata faitaulaga i le Atua na tali mai ia te au i le aso na ou puapuaga ai, sa ia te au foi i le ala na ou ui ai.
4Ona latou avane lea ia Iakopo o latou atua ese uma lava sa ia te i latou, ma a latou mama sa i o latou taliga, ua nana ai e Iakopo i lalo o le aluna e lata ane i Sekema.
5Ua latou o ese ai, sa i ai le mata‘u mai le Atua i aai uma na vagavagai ia te i latou, ua latou le tulituliloa i le fanau a Iakopo.
6Ua oo Iakopo i Lusa i le nuu o Kanana, (o Peteli foi lea,) o ia atoa ma tagata uma sa ia te ia.
7Ua ia fai ai le fata faitaulaga, ma na faaigoa lea mea o Elipeteli, auā na faaali mai ai le Atua ia te ia ina ua sola ese i lona uso.
8Ona oti lea o Tepora le na tausi ia Repeka, na tanu ai o ia i lalo ifo o Peteli, i lalo o le aluna, ua faaigoa ai o Aluna-pakata.
9Ua toe faaali mai le Atua ia Iakopo ina ua sau nai Patanarama, ua faamanuia foi ia te ia.
10Ua fetalai mai le Atua ia te ia, O Iakopo lou igoa; e te le toe igoa a‘i ia Iakopo, a o Isaraelu e te igoa ai; ua na faaigoa ia te ia o Isaraelu.
11Ua fetalai mai le Atua ia te ia, O a‘u le Atua e o‘u le malosi uma lava; ia faatoateleina oe, ma ia uluola; o le nuu ma le vao nuu e tutupu mai ai ia te oe; e fanaua foi e oe o tupu.
12O le laueleele na ou foaiina atu ia Aperaamo ma Isaako, ou te foai atu ai ia te oe, o lau fanau foi pe a mavae atu oe ou te foai atu ai le laueleele.
13Ua afio ae le Atua nai ia te ia ai le mea sa fetalai mai ai ia te ia.
14Ona faatu lea e Iakopo le faailoga i le mea na fetalai mai ai o ia ia te ia, o le faailoga maa; na ia liligi ifo i ona luga le taulaga i mea e inu, ma liligi i ai le suāuu.
15Ua faaigoa e Iakopo le mea na fetalai ai le Atua ia te ia, o Peteli.
16Ua alu ese o ia nai Peteli, ua tāli oo atu i Efarata, ona faatiga lea o Rasela, ua faigata lona fanauga.
17Ua oo ina faigata lona fanauga, ona fai mai lea ia te ia o le na faatosaga le fanauga, Aua le fefe, auā e ia te oe foi lenei tama.
18Ua oo ina a mavae atu lona agaga, (auā ua oti ai o ia,) ua ia faaigoa ia te ia o Penani; a o lona tamā na ia faaigoa ia te ia o Peniamina.
19Ua oti Rasela, ua tanu i le ala i Efarata, o Peteleema foi lea.
20Ua faatu e Iakopo le faailoga i lona tuugamau; o le faailoga lea o le tuugamau o Rasela ua oo i le aso nei.
21Ona alu ai lea o Isaraelu ua to lona fale ie i tala atu o le ‘olo o Eteru.
22Sa nofo Isaraelu i lea nuu, ona alu ai lea o Reupena ua momoe ma Pila le palake o lona tamā; ua lagona ai e Isaraelu le tala. O atalii o Iakopo ua toatinoagafulu ma le toalua i latou.
23O tama a Lea; o le ulumatua a Iakopo, o Reupena, ma Simeona, ma Levi, ma Iuta, ma Isakara, ma Sepulona.
24O tama a Rasela; o Iosefa ma Peniamina.
25O tama a Pila le auauna fafine a Rasela; o Tanu ma Nafatali.
26O Tama a Selepa le auauna fafine a Lea; o Kato ma Asera; o atalii ia o Iakopo na fanaua ia te ia i Patanarama.
27Ua oo atu Iakopo ia Isaako lona tamā i Mamere i Kiriatarapa, (o Heperona lea,) sa āumau ai Aperaamo ma Isaako.
28O aso na ola ai Isaako, ua selau tausaga ma le valugafulu.
29Ona to lea o le mānava a Isaako, ua oti o ia, ma ua faatasi atu i lona nuu, ua toeaina, ua tuu tulu‘i lona ola; na tanu foi o ia e Esau ma Iakopo ona atalii.
Who We AreWhat We EelieveWhat We Do
2025 by iamachristian.org,Inc All rights reserved.
