1Ona aumaia lea o a‘u e ia i le malumalu, ma ia fuatia pou, e ono kupita o lona lautele i le tasi itu, e ono foi kupita o lona lautele i le isi itu, o le lautele lea o le fale fetafai.
2O le lautele foi o le faitotoa e sefulu ona kupita; o ona itu foi o le faitotoa e lima kupita i le tasi itu, e lima foi kupita i le isi itu; ua ia fuatia foi le umi o le malumalu, e fagafulu o kupita, ma lona lautele e lua sefulu o kupita.
3Ona alu ane lea o ia i totonu, ua ia fuatia le pou o le faitotoa, e lua ona kupita; ma le faitotoa foi e ono ona kupita, ma le lautele o le faitotoa e fitu ona kupita.
4Ua ia fuatia foi lona umi e lua sefulu ona kupita, ma le lautele e lua sefulu ona kupita, i luma o le malumalu; ua ia fai mai foi ia te au, O le mea e sili ona paia lenei.
5Ona ia fuatia lea o le pa o le fale, e ono ona kupita; ma le lautele o potu i itu, e fa ona kupita, ua soo ai le fale i itu uma.
6O potu i itu, e atu tolu ia, taitasi i luga o le tasi, e taitolugafulu i itu; na latou sosoo ane i le pa o le fale mo potu i itu, na soo ai, ina ia faamauina ai, a ua le faamauina i le pa o le fale.
7Na i ai foi le ala faataamilomilo i potu i itu, ua āu ina lautele i lona alu ae; auā ua alu ae pea le ala faataamilomilo i le fale e faataamilomilo ai i le fale; o le mea lea na āu ai ina lautele o le fale i lona alu ae i luga, e afua i le fogāfale aupitoalalo, e oo i le aupitoaluga e ui ai i le ogaloto.
8Na ou iloa foi le maualuga o le fale i ona itu uma; o faavae o potu i itu, o le u atoa lea, e i ai kupita tetele e ono.
9O le mafiafia o le pa sa i le potu o itu i tuāfafo, e lima ona kupita; sa i ai i totonu le mea na toe i potu o itu sa i le fale.
10O le va foi o potu, e lua sefulu o kupita ia, ua soo ai lava le fale i itu uma.
11O faitotoa foi o potu o itu na faasaga ia i le mea na toe, o le tasi faitotoa na faasaga i le itu i matu, a o le tasi faitotoa na faasaga i le itu i toga, o le lautele foi o le mea na toe, e lima ona kupita i itu uma.
12A o le fale na i luma o le mea na vavaeeseina i le itu i sisifo, e fitu sefulu o kupita lona lautele; o le pa foi o le fale e lima kupita lona mafiafia i itu uma, o lona umi foi e ivagafulu o ona kupita.
13Ua ia fuatia lava le fale, e selau kupita, o lona umi lea; o le mea na vavaeeseina foi, ma le fale atoa, ma ona pa, e selau kupita, o lona umi lea.
14O le lautele foi o lona lumāfale, ma le mea na vavaeina i le itu i sasae, e selau ona kupita.
15Ua ia fuatia foi le umi o le fale i luma o le mea na vavaeina, o lē i ona tua, ma fogāfale i le tasi itu ma le tasi itu, e selau ona kupita, o le malumalu tuloto foi ma faapaologa o le lotoā.
16O faitotoa foi, ma faamalama puipuia; ma fogāfale e soo ai o latou pae fale e tolu, o feagai ma le faitotoa, na tapapa i laupapa, na soo ai, na afua mai i lalo e oo ae i faamalama, na tapapa foi faamalama.
17O ona luga ae foi o le faitotoa, e oo i totonu o le fale tuloto, atoa ma fafo, o le pa uma foi e soo ai i totonu ma fafo na fuatia lava.
18Na fai foi kerupi ma pama, na i ai foi pama taitasi i va o kerupi; taitasi foi kerupi ma ona mata e lua;
19ua feagai foi mata o le tagata ma le pama i le tasi itu, ua feagai foi mata o le leona taanoa ma le pama i le isi itu; ua faia i le fale uma i ona itu uma.
20E afua mai i lalo e oo i ona luga ae o le faitotoa, atoa ma le pa o le malumalu, sa fai ai kerupi ma pama.
21Sa faatafafa foi o pou o le faitotoa o le malumalu; o lona lumāfale foi o le mea paia, ua tino mai e pei ona tino mai anamua.
22O le fata laau e fai ai taulaga e tolu kupita lona maualuga, o lona umi foi e lua kupita lea; o ona tulimanu foi, ma lona umi, ma ona itu, o laau ia; ua ia faapea mai foi ia te au, O le laulau lenei o loo i luma o Ieova.
23Sa i ai puipui e lua i le malumalu ma le mea paia.
24Sa tailua foi puipui i faitotoa, o puipui feafeai; e lua puipui mo le tasi faitotoa, e lua foi mo le isi.
25Na fai foi i puipui o le malumalu o kerupi ma pama, e pei ona faia i pa; na i ai foi laupapa mafiafia i luma o le faapaologa i fafo.
26Na i ai foi faamalama puipuia, ma pama i le tasi itu ma le isi itu, i itu o le faapaologa, ma potu i itu o le fale, ma laupapa mafiafia.
Who We AreWhat We EelieveWhat We Do
2025 by iamachristian.org,Inc All rights reserved.
