1Ua oo mai foi le afioga a Ieova o ‘au, o loo faapea mai,
2O loo faapea ona fetalai mai o Ieova o ‘au, Na ou maelega ia Siona ma le maelega tele; na ou maelega foi ia te ia ma le ita tele.
3O loo faapea ona fetalai mai o Ieova, Ua ou foi atu i Siona, ou te mau foi i totonu o Ierusalema; e igoa Ierusalema, O le aai e faamaoni; o le mauga foi o Ieova o ‘au, e igoa lea, O le mauga paia.
4O loo faapea ona fetalai mai o Ieova o ‘au, E toe nonofo toeaina ma loomatutua i malae o Ierusalema; o le tagata foi ma lona tootoo i lona lima ona o le tele o latou tausaga.
5E tutumu foi malae o le aai i tamaiti ma teineiti o loo taaalo i ona malae.
6O loo faapea ona fetalai mai o Ieova o ‘au, E ui lava ina faigata i le manatu o e ua totoe o lenei nuu i ia ona aso, pe faigata ea foi i lo‘u manatu? ua fetalai mai ai Ieova o ‘au.
7O loo faapea ona fetalai mai o Ieova o ‘au Faauta, ou te faaola i lo‘u nuu nai le nuu e alu ae ai le la, ma le nuu e alu ifo ai.
8Ou te aumaiina i latou, latou te nonofo ai i totonu o Ierusalema; e fai foi i latou mo‘u nuu, e fai foi a‘u mo latou Atua i le faamaoni ma le amiotonu.
9O loo faapea ona fetalai mai o Ieova o ‘au, Ia malolosi o outou lima o e faalogologo mai i nei ona po i upu nei i fofoga o perofeta, e na i ai i ona aso na faavaeina ai le fale o Ieova o ‘au, o le malumalu, ina ia faia;
10auā a o lei oo i ia ona aso sa leai se taui o le tagata, po o se taui o le manu; e leai foi se filemu i le na fealuai, ona o le na ita mai; na ou faaoso foi i tagata uma ia feteenai i latou.
11A o nei ona po, ou te le pei o aso anamua i e ua totoe i le nuu nei, ua fetalai mai ai Ieova o ‘au.
12Auā e i ai le fua o le toalemu; e fua mai e le vine i ona lava fua, e fua mai foi le laueleele i ona lava fua, o le lagi foi e totō ifo ai lona sau; ou te avatua foi ia mea uma i e ua totoe o lenei nuu e fai mā latou.
13E pei ona fai outou ma fetuu i nuu ese, o oe le aiga o Iuta, ma oe le aiga o Isaraelu, e faapea ona ou faaola ia te outou, e fai ai outou ma faamanuia; aua le fefefe; ia malolosi o outou lima.
14Auā o loo faapea ona fetalai mai o Ieova o ‘au, E pei ona ou manatu e faatiga ia te outou, ina ua faaonoono mai o outou tamā ia te au, ua fetalai mai ai Ieova o ‘au, ma ou lei salamo ai;
15e faapea ona ou toe manatu i nei ona aso e agalelei atu ia Ierusalema ma le aiga o Iuta; aua tou te matatau.
16O mea nei tou te faia, Ia outou tautala i upu moni o le tasi i le tasi, ma ia faamasino i le faamaoni ma le faamasinoga e lelei ai i o outou faitotoa.
17Aua le manatunatu i o outou loto i se mea leaga e fai e le tasi i le tasi; aua foi le fiafia i le tauto pepelo; auā o mea uma ia ou te ‘ino‘ino i ai, ua fetalai mai ai Ieova.
18Ua oo mai foi le afioga a Ieova o ‘au ia te au, o loo faapea mai,
19O loo faapea ona fetalai mai o Ieova o ‘au, O le anapogi i le masina e fa, ma le anapogi i le masina e lima, ma le anapogi i le masina e fitu, ma le anapogi i le masina e sefulu, e fai ma fiafia ia, ma olioli, ma aso o tausamiga lelei i le aiga o Iuta; a ia outou fiafia i le upu moni ma le manuia.
20O loo faapea ona fetalai mai o Ieova o ‘au, E toe o mai nuu ma tagata o aai e tele;
21e o atu tagata o le tasi aai i le tasi aai, o loo faapea, O mai ia, ina tatou o e faalaulelei i le finagalo o Ieova, ma saili ia Ieova o ‘au; ou te alu foi a‘u.
22E o mai foi nuu e tele, ma nuu malolosi e saili ia Ieova o ‘au i Ierusalema, e faalaulelei foi i le finagalo o Ieova.
23O loo faapea ona fetalai mai o Ieova o ‘au, O ia ona aso e tago atu ai tagata e toatinoagafulu ai gagana uma o nuu ese; latou te tago atu lava i le pito ofu o le sa Iutā ma faapea atu, Tatou te o ma outou; auā ua matou faalogo, o loo ia te outou le Atua.
Who We AreWhat We EelieveWhat We Do
2025 by iamachristian.org,Inc All rights reserved.
