1O lona fitu o tausaga, o lona lima foi o masina o le aso e sefulu o le masina, na o mai ai nisi toeaina o Isaraelu e fesili ia Ieova, ua latou nonofo mai i o‘u luma.
2Ona oo mai ai lea o le afioga a Ieova ia te ua, ua faapea mai,
3Le atalii e o le tagata, fai atu ia i toeaina o Isaraelu, ia faapea atu ia te i latou, O loo faapea ona fetalai mai o Ieova, Ua outou o mai ea e fesili mai ia te au? O loo ola a‘u, ou te le mafai ona outou fesili mai ia te au, o loo fetalai mai ai le Alii o Ieova.
4E te le faamasino ea ia te i latou, le atalii e o le tagata, e te le faamasino ea? Faailoa atu ia ia te i latou mea e inosia na faia e o latou tamā;
5ma ia e faapea atu ia te i latou, O loo faapea ona fetalai mai o le Alii o Ieova, O le aso na ou filifili ai ia Isaraelu, ma ou sii ai lo‘u lima i le fanau a le aiga o Iakopo, ma ou faailoaina atu o a‘u ia te i latou i le nuu o Aikupito, ina ua ou sii lo‘u lima ia te i latou, ua faapea atu, O a‘u o Ieova lo outou Atua.
6O lea lava aso na ou sii ai lo‘u lima ia te i latou e aumaia i latou ai le nuu o Aikupito e o atu i le nuu na ou sailia mo i latou, e tafe ai le suāsusu ma le meli, ua sili ona matagofie o lea nuu i nuu uma.
7Na au fai atu foi ia te i latou, Ia taitasi le tagata ma lafoai mea inosia ua i ona luma, aua foi le faaleaga outou ia te outou i tupua o Aikupito; o a‘u o Ieova lo outou Atua.
8A ua latou fouvale ia te au, ua le mafafai foi ona faalogo mai ia te au; ua le taitasi ma lafoaiina e i latou o mea inosia sa i o latou luma, ua le tuua foi tupua o Aikupito. Ona ou fai atu ai lea, Ou te sasaa atu lo‘u ita tele i luga ia te i latou, e faataunuu atu ai lo‘u ita ia te i latou i le nuu o Aikupito.
9A e peitai na ou faia ona o lo‘u igoa, ina ia le faaleagaina ai i luma o nuu ese sa latou i ai, na ou faailoaina atu ai foi a‘u ia te i latou i o latou luma i lo‘u aumaia o i latou ai le nuu o Aikupito.
10Na ou aumaia i latou ai le nuu o Aikupito, ma ou ta‘ita‘iina i latou i le vao.
11Na ou tuuina atu foi ia te i latou a‘u tulafono, ma ou faailoa atu ia te i latou a‘u faamasinoga, o mea ia a faia e le tagata, e ola ai lava ia.
12Na ou avatu foi ia te i latou o‘u sapati, e fai ma faailoga ia te au ma i latou, ia latou iloa ai o a‘u o Ieova lē faapaiaina i latou.
13A ua fouvale le aiga o Isaraelu ia te au i le vao, ua le savavali i latou i a‘u tulafono, a ua latou ‘ino‘ino i a‘u faamasinoga, o mea ia a faia e le tagata, e ola ai lava ia; ua latou matuā solia foi o‘u sapati. Ona ou fai atu ai lea, Ou te sasaa atu lo‘u ita tele i luga ia te i latou i le vao e faaumatia ai i latou.
14A e peitai na ou faia ona o lo‘u igoa, ina ne‘i faaleagaina ai i luma o nuu ese, na ou aumaia i latou i o latou luma.
15O a‘u foi, na ou sii lo‘u lima ia te i latou i le vao, ou te le faaoo ia te i latou i le nuu na ou foaiina atu ai ia te i latou, e tafe ai le suāsusu ma le meli, ua sili ona matagofie o lea nuu i nuu uma;
16auā na latou ‘ino‘ino i a‘u faamasinoga, ma ua le savavali i a‘u tulafono; a ua latou solia o‘u sapati, auā na mulimuli atu o latou loto i a latou tupua.
17A e ui lava i lea na ou faasaoina i latou ia le fano i latou, ma ou le faaumatia i latou i le vao.
18Na ou fai atu foi i a latou fanau i le vao, Aua tou te savavali i tu a o outou tamā, aua foi le usiusitai i a latou masani, aua ne‘i faaleagaina outou i a latou tupua.
19O a‘u o Ieova lo outou Atua, ia outou savavali i a‘u tulafono, ma tausi i a‘u faamasinoga, ma outou faia.
20Ia outou faapaiaina foi o‘u sapati; e fai foi ia ma faailoga ia te au ma outou, ia iloa ai e outou, o a‘u lava o Ieova lo outou Atua.
21A ua fouvale le fanau ia te au; ua latou le savavali i a‘u tulafono, ma ua le tausi i a‘u faamasinoga ia usiusitai i ai, o mea ia a faia e le tagata, e ola ai lava ia; na latou solia o‘u sapati. Ona ou fai atu i lea, Ou te sasaa atu lo‘u ita tele i luga ia te i latou, e faaiuina atu ai lo‘u ita ia te i latou i le vao.
22A e ui lava i lea na ou faafoisia lo‘u lima, ma ou faia ona o lo‘u igoa, ina ne‘i faaleagaina ai i luma o nuu ese na ou aveina atu ai i latou i o latou luma.
23Na ou sii foi lo‘u lima ia te i latou i le vao, ou te faataapeapeaina i latou i nuu ese, ma ou faasalalauina i latou i nuu eseese;
24auā na latou le faia a‘u faamasinoga, ma ua latou ‘ino‘ino i a‘u tulafono, ma latou solia o‘u sapati, na faasaga foi o latou mata i tupua a o latou tamā.
25O le mea lea na ou tuuina atu ai ia te i latou o tulafono e le lelei, ma faamasinoga latou te le ola ai
26na ou faaleaga foi ia te i latou i a latou lava taulaga i lo latou faaui ane i ulumatua uma i le afi, ina ia ou faatafunaina i latou, ina ia latou iloa o a‘u lava o Ieova.
27O le mea lea, le atalii e o le tagata, ia e fai atu ai i le aiga o Isaraelu, ia faapea atu ia te i latou, O loo faapea ona fetalai mai o le Alii o Ieova, Na faifaia lava a‘u e o outou tamā i lenei mea foi, ua latou matuā agasala lava ia te au.
28Na ou aumaia i latou i le nuu na ou sii ai lo‘u lima ou te avatua mo i latou, ona latou vaavaai atu lea i mauga maualuluga uma, ma laau tauuluuluola uma, na latou osi ai a latou taulaga, ma latou avatu ai a latou taulaga e faaonoono ai; na latou tuu atu ai foi a latou mea manogi lelei, ma latou liligi ai a latou taulaga i mea e inu.
29Ona au fai atu ai lea ia te i latou, Se a le mea maualuga tou te o atu i ai? Ua ta‘ua lona igoa o Le mea maualuga, ua oo mai i le aso nei.
30O le mea lea ia e fai atu ai i le aiga o Isaraelu, O loo faapea ona fetalai mai o le Alii o Ieova, Ua leaga ea outou e pei o le tu a outou tamā? Ua mulilulua ea foi outou o mulimuli atu i a latou mea inosia?
31Auā o lo outou avatua o a outou taulaga, ma lo outou faaui ane o a outou fanau i le afi ua outou faaleagaina ai outou i a outou tupua uma, ua oo mai i lenei aso; tou te fesili mai ea ia te au nei, le aiga o Isaraelu e? O loo fetalai mai ai le Alii o Ieova, O loo ola a‘u, ou te le mafai lava ona outou fesili mai ia te au.
32O le mea foi e tupu i o outou manatu, e le oo lava, ua outou faapea ane, E avea i matou e pei o nuu ese, e pei o aiga o nuu eseese e auauna i laau ma maa.
33O loo fetalai mai le Alii o Ieova, O loo ola a‘u, ou te pule lava ia te outou ma le lima malosi, ma le lima faaloaloa, ma le ita tele ua sasaaina atu.
34Ou te aumaia outou ai nuu ese, ma ou faapotopotoina outou ai nuu eseese ua faataapeapeina ai outou, ma le lima malosi, ma le lima faaloaloa, ma le ita tele ua sasaaina atu.
35Ou te aumaia foi outou i le vao o nuu, ma ou faamasino ia te outou i lea mea, o tatou o fesagai ma a‘u.
36E pei ona ou faamasino i o outou tamā i le vao o le nuu o Aikupito, e faapea ona ou faamasinoga ia te outou, o loo fetalai mai ai le Alii o Ieova.
37Ou te faaui ane foi ia te outou i lalo o le tootoo, ma ou faaooina outou i le noataga o le feagaiga;
38ou te faate‘aeseina foi ia te outou o e fouvale, ma ē agasala ia te au; ou te aveina atu i latou ai le nuu o loo latou āumau ai, a e latou te le o mai i le laueleele o Isaraelu; tou te iloa ai o a‘u lava o Ieova.
39O loo faapea ona fetalai mai o le Alii o Ieova, O outou le aiga o Isaraelu; ō ia outou, ina taitasi ma auauna i ana tupua; a e mulimuli ane, afai tou te le faalogo mai ia te au, aua tou te toe faaleagaina lo‘u igoa paia i a outou taulaga ma a outou tupua.
40Aua o lo‘u mauga paia, o le mauga maualuga i Isaraelu, o loo fetalai mai le Alii o Ieova, e auauna mai ai le aiga uma o Isaraelu ia te au, o i latou uma foi i le nuu; ou te talia i latou i lea mea, ma ou fai atu e au mai i lea mea a outou taulaga, ma mea faapolopoloina i a outou taulaga, atoa ma a outou mea paia uma.
41Ou te talia outou ona o la outou mea manogi lelei, pe a ou aumaia outou ai nuu, ma faapotopotoina outou mai nuu eseese na faataapeapeina ai outou; e faapaiaina foi a‘u e outou i luma o nuu ese.
42Tou te iloa o a‘u lava o Ieova, pe a ou aumaia outou i le laueleele o Isaraelu, o le nuu na ou sii ai lo‘u lima, ou te avatua i o outou tamā.
43Tou te manatunatu ai i a outou amio uma, ma a outou mea uma na fai, sa leaga ai outou; ona ‘ino‘ino ai lea o outou ia te outou ona o a outou mea leaga uma ua outou faia.
44E iloa foi e outou, o a‘u lava o Ieova pe a ou faia ia te outou ona o lo‘u igoa, e le tusa ma a outou amio leaga, ma a outou mea leaga ua fai, le aiga o Isaraelu e, o loo fetalai mai ai le Alii o Ieova.
45Ua oo mai foi le afioga e Ieova ia te au, ua faapea mai,
46Le atalii e o le tagata, ia e faasaga atu ou mata i le itu i toga, ma faapaū atu lau upu i le itu i toga, ma vavalo atu i le vao matua i le fanua i le itu i toga;
47ma fai atu i le vao matua i le itu i toga, Faalogo mai ia i le afioga a Ieova, O loo faapea ona fetalai mai o le Alii o Ieova, Faauta, ou te tŭtŭ le afi ia te oe, e susunuina ai laau mata uma ua ia te oe, atoa ma laau mamago uma; e le tineia le afi e mu saesae, e mu ai mata uma i le itu i toga, e oo i le itu i matu.
48E iloa foi e tagata uma o a‘u o Ieova, ua ou tŭtŭina; e le tineia lava.
49Ona ou fai atu ai lea, Aue, le Alii e Ieova e! ua latou fai mai ia te au, E le tautala mai ea o ia i faataoto?
Who We AreWhat We EelieveWhat We Do
2025 by iamachristian.org,Inc All rights reserved.
