1Ua fetalai mai foi Ieova ia Mose, Ia e fai atu i faitaulaga o atalii o Arona, ia faapea atu ia i latou, Aua ne‘i leaga so latou i se tagata o lona nuu ua oti.
2A o se tagata o lona aiga to tino, o lona tinā, ma lona tamā, ma lona atalii, ma lona afafine,
3ma lona uso, ma lona tuafafine o le taupou, o lona aiga to tino, ua leai sana tane; e le sa ona leaga o ia ona ia.
4Aua ne‘i leaga o ia ia te ia, o ia le tagata sili i lona nuu, e leaga ai o ia.
5Aua ne‘i latou sele mamā i o latou lau ulu, pe tafi o latou pito ‘ava, pe saei o latou tino.
6Ia paia lava i latou mo lo latou Atua, aua ne‘i latou faaleagaina le igoa o lo latou Atua; auā o taulaga ia Ieova e fai i le afi, ma le areto a lo latou Atua, ua latou fai taulaga ai; o le mea lea ia paia ai i latou.
7Aua ne‘i fai avā so latou i se fafine talitane, po o se fafine faitaaga; aua foi ne‘i fai avā o ia i se fafine ua aleia e lana tane; auā ua paia o ia mo lona Atua.
8E te faapaiaina foi o ia, auā o ia na te avatu le areto a lou Atua; e paia lava o ia ia te oe; auā o a‘u o Ieova, o le faapaiaina outou, e paia lava a‘u.
9O le afafine foi o se faitaulaga, afai na te faaleaga o ia ia te ia i lona talitane, ua faaleaga o ia i lona tamā; e susunuina lava o ia i le afi.
10A o le faitaulaga sili i ona uso, sa liligi i lona ulu le uu e faauuina ai, ma ua tofia o ia e ofu i ofu, na te le toina lona pulou, pe saei ona ofu.
11Aua foi le ulufale atu o ia i se tagata oti, aua ne‘i leaga o ia ia te ia ona o lona tamā, po o lona tinā;
12aua foi le ulufafo atu o ia i le malumalu, pe leaga ia te ia le malumalu o lona Atua; auā ua i luga ia te ia le pale o le uu o lona Atua e faauuina ai; o a‘u o Ieova.
13O se taupou lava e fai avā ai o ia.
14O se fafine ua oti lana tane, po o se fafine ua aleia, po o se fafine faitaaga, po o se fafine talitane, o fafine ia aua le fai avā ai o ia; a o le taupou o lona lava nuu e fai avā ai o ia.
15Aua ne‘i leaga ia te ia lona gafa i lona nuu; auā o a‘u o Ieova, na ou faapaiaina o ia.
16Ua fetalai mai foi Ieova ia Mose, ua faapea mai.
17Ia e fai atu ia Arona, ia faapea atu, Ai se tagata o lau fanau i o latou tupulaga amuli ua i ai se pona, aua ne‘i faalatalata atu o ia e avatu le areto a lona Atua.
18Auā o se tagata ua i ai se pona, aua le faalatalata lava o ia; o le tauaso, po o le pipili, po o le isu papa, po o le ua i ai se mea faalegatusa,
19po o se tagata ua gau le vae, po ua gau le lima,
20po o se ua tua pio, po o se ua faatinotinoa, po o se tagata ua i ai le moālili i lona mata, po o se ua ma‘i pa‘upa‘ua, po o se ua ma‘i mageso poupoua, po o se ua momomo sona fuāmanava.
21Aua ne‘i faalatalata se tagata o le fanau a Arona le faitaulaga ua i ai se pona e avatu taulaga e fai i le afi ia Ieova; ua ia te ia le mea e pona ai, aua ne‘i faalatalata atu o ia e avatu le areto a lona Atua.
22E ‘ai lava e ia le areto a lona Atua, o mea e sili ona paia atoa ma mea paia.
23A e le alu o ia i tala atu o le ie puipui, pe faalatalata i le fata faitaulaga, auā ua ia te ia le mea e pona ai; ina ne‘i leaga ia te ia a‘u mea paia; auā o a‘u o Ieova, ua ou faapaiaina ia mea.
24Ua fai atu ai Mose ia Arona ma ona atalii, atoa ma le fanauga uma a Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
