1Ona fai atu ai lea o Elisaia, Faalogologo mai ia outou i le afioga a Ieova, O loo faapea ona fetalai mai o Ieova, O le itu aso faapenei a taeao, e faataulia i le faitotoa o Samaria le sea o falaoa lelei i le sekeli, e lua foi sea o karite i le sekeli.
2Ona tali mai ai lea o le tasi alii, sa totoo ai le tupu i lona lima, i le tagata o le Atua, ua faapea mai, Faauta mai, afai e faia e Ieova ni faitotoa i le lagi e iloga ea e oo lena mea? Ona fai atu ai lea o ia, Faauta mai, e te iloa ai i ou fofoga, a e te le ‘ai ai.
3Na i ai foi i le mea e ui atu ai i le faitotoa tagata lepela e toafa, ua fetautalatala‘i i latou, Se a le mea tatou te nonofo ai pea iinei seia oti? Afai tatou te faapea,
4Tatou te o i le aai, o loo i ai le oge, ona tatou oti ai lea i lea mea; afai foi tatou te nonofo ai pea iinei, tatou te oti ai foi. Ina o mai ia, ina tatou sosola i le itu taua a Suria; afai latou te faaola ia te i tatou, tatou te ola; a e afai latou te fasioti ia te i tatou, na ona tatou oti lava.
5Ona latou tulai ai lea i le po, o le a o atu i le toagālauapi a Suria; ua oo foi i latou i le toagālauapi pito mai a Suria, faauta foi, e lei i ai se tagata.
6Auā na faafaalogoina e le Alii i le togālauapi a Suria le taalili o kariota, ma le taalili o solofanua, o le taalili o ‘au e tele. Ona latou fetautalatala‘i ai lea, Faauta, ua faaoloātauaina e le tupu o Isaraelu o tupu o sa Hetī, ma tupu o Aikupito e o mai e tau, ma i tatou.
7Ona latou tulai ai lea, ua sosola i le po, ua tuulafoai foi o latou fale ie, ma a latou solofanua, ma a latou asini, ma le toagālauapi pei ona i ai, ua sosola lava i le fia ola.
8Ua oo atu ia lepela i le toagālauapi pito mai, ona latou ulu atu lea i le tasi fale ie, ua aai ma feinu ua latou avea ai foi ario, ma auro, atoa ma ofu, ona o ai lea ua nanā ai; ona toe foi lea, ua ulu atu i le tasi fale ie, ua latou avea ai foi mea, ona o ai lea ua nanā.
9Ona latou fetautalatala‘i ai lea, E le tatau le mea o tatou o faia nei, o le aso manuia lenei aso, a ua tatou faalologo; pe afai tatou te faatali seia malama ae le taeao, ona oo mai ai lea o le sala ia te i tatou; ina o mai ia, ina tatou o e ta‘u atu i le aiga o le tupu.
10Ona latou o mai ai lea, ua valaau i le leoleo faitotoa o le aai, ua tala mai ia te i latou, ua faapea mai, Na matou o atu i le toagālauapi a Suria; faauta foi, ua leai se tagata o i ai, po o se leo o se tagata; ua na o solofanua o noatia, ma asini o noatia, ma fale ie pei ona i ai.
11Ona valaau lea o ia i leoleo faitotoa, ona latou ta‘u atu ai lea i falē i le aiga o le tupu.
12Ona tulai ai lea o le tupu i le po, ua faapea ane i ana auauna, So‘u faaali atu nei ia te outou le mea ua faia e Suria ia te i tatou. Ua iloa e i latou ua tatou mātelaina, o le mea lea ua latou o ai i tua o le toagālauapi e lalafi i le vao, ua faapea i latou, Pe a latou o atu i tua o le aai, ona tatou pupue ola lea ia te i latou, ma tatou o mai i le aai.
13Ona tali mai ai lea o le tasi ana auauna, ua faapea mai, Se‘i ave nisi solofanua e lima o totoe, ua i ai pea i le aai, (faauta, ua latou pei o le vao tagata o Isaraelu o e totoe ai, faauta, pei o le vao tagata o Isaraelu lava, pei o le vao tagata o Isaraelu lava, ua faaumatia,) tatou te aauina atu seia iloa.
14Ona latou ave lea o solofanua o kariota e lua, ua aauina atu e le tupu i le toagālauapi a Suria, ua faapea atu, Ina o ia, ia outou vaavaai.
15Ona latou mulimuli lea ia te i latou, ua oo i Ioritana; faauta foi, ua fola solo i le ala uma o ofu ma ipu, na lafoai e Suria i lo latou sosola faaatuatuvale. Ona foi mai ai lea o e na aauina, ua ta‘u mai i le tupu.
16Ona o atu ai lea o le nuu, ua vete le toagālauapi a Suria. Ona faataulia lea o le sea o falaoa lelei i le sekeli, ma le lua o sea o karite i le sekeli, e pei o le afioga a Ieova.
17Ona tofia lea e le tupu lena alii sa totoo ai o ia i lona lima, ia leoleo e ia le faitotoa. Ona galuvaea lava lea o ia e le nuu i le faitotoa, ona oti ai lea, e pei o le upu a le tagata o le Atua, na ia fai atu ai ina ua alu ifo le tupu ia te ia.
18Ona taunuu ai lea o le mea na fai atu ai le tagata o le Atua i le tupu, ua faapea, E lua sea o karite i le sekeli, ma le sea o falaoa lelei i le sekeli, e faia lea i le itu aso faapenei a taeao i le faitotoa o Samaria.
19A ua tali mai lena alii i le tagata o le Atua, ua faapea mai, Faauta ea, afai e faia e Ieova ni faitotoa i le lagi ailoga ea e oo lena mea? Ona tali atu ai lea o ia, Faauta mai, e te iloa ai lava i ou fofoga, a e te le ‘ai ai.
20Ua taunuu foi ia te ia, auā na galuvaea o ia e le nuu i le faitotoa, ua oti ai.
Who We AreWhat We EelieveWhat We Do
2025 by iamachristian.org,Inc All rights reserved.
