1Ua fesili ane Tavita, Pe ai se tasi ua toe o le aiga o Saulo, ina ia ou alofa ia te ia ona o Ionatana?
2Sa i le aiga o Saulo le auauna e igoa ia Sipa, ua latou aami ia te ia e sau ia Tavita. Ona fai atu lea o le tupu ia te ia, O oe ea o Sipa? Ua fai mai o ia, O au lava o lau auauna.
3Ua fai atu le tupu, E le o toe ea se tagata o le aiga o Saulo, ou te faia le alofa o le Atua ia te ia? Ona fai mai lea o Sipa i le tupu, Ua toe se atalii o Ionatana, o loo pipili ona vae.
4Ona fai atu lea o le tupu, O fea o i ai o ia? Ua fai mai Sipa i le tupu, Faauta, o loo i ai o ia i le aiga o Makiro le atalii o Amueli i Lotapara.
5Ua feau atu e le tupu o Tavita, ona latou aumaia lea o ia mai le fale o Makiro le atalii o Amueli mai Lotapara.
6Ua sau Mefiposeta le atalii o Ionatana, le atalii ia e Saulo ia Tavita, ona faapaū faō ai lea o ia, ua ifo. Ua fai atu Tavita, Mefiposeta e! Ua fai mai o ia, Faauta, o au lava lau auauna.
7Ona fai ane lea o Tavita ia te ia, Aua le fefe, auā ou te agalelei lava ia te oe, ona o Ionatana lou tamā; ou te toe tuu atu lava ia te oe le fanua uma o Saulo lou tamā; a o oe, ta te aai faatasi ma a‘u i la‘u laoai e le aunoa.
8Ona ifo lea o ia, ma fai mai, O ai ea lau auauna, ina ua e silasila i le ulī mate, e pei o a‘u nei?
9Ua valaau le tupu ia Sipa le auauna a Saulo; ona fai atu ai lea o ia ia te ia, O mea uma sa ia Saulo ma lona aiga uma, ua ou avatua i le atalii o lou alii.
10Ia e fai galuega i le fanua mo ia, o oe, ma ou atalii, ma au auauna; e te aumaia foi mea e ‘ai mā le atalii o lou alii, ina ia ‘ai ai o ia; a o Mefiposeta le atalii o lou alii e le aunoa ona ‘ai o ia i la‘u laoai. Sa ia Sipa o atalii e toasefulu ma le toalima, ma auauna e toaluafulu.
11Ona fai mai lea o Sipa i le tupu, E pei o mea uma ua fetalai mai ai lo‘u alii le tupu i lana auauna, e faapea lava ona faia e lau auauna. Ua faapea atu le tupu, E ‘ai Mefiposeta e le aunoa i la‘u laoai, pei o so le fanau a le tupu.
12Sa ia Mefiposeta si ona atalii itiiti, o Mika lona igoa; o i latou uma sa mau i le aiga o Sipa, sa auauna i latou ia Mefiposeta.
13Sa nofo Mefiposeta i Ierusalema, auā sa ‘ai o ia e le aunoa i le laoai a le tupu; sa pipili foi ona vae e lua.
Who We AreWhat We EelieveWhat We Do
2025 by iamachristian.org,Inc All rights reserved.
