1Sa i le amataga, le Lokou, sa i le Atua le Lokou, o le Atua foi le Lokou.
2O ia lava sa i le Atua i le amataga.
3Na ia faia mea uma lava; e leai foi se mea e tasi na faia e lei faia e ia.
4Sa ia te ia le ola; o le ola foi o le malamalama lea o tagata.
5Ua pupula mai foi le malamalama i le pouliuli, a e lei talia e le pouliuli.
6Na auina mai le tagata mai le Atua, o Ioane lona igoa.
7Na sau o ia o le molimau, ina ia molimau i le malamalama, ina ia talitonu i ai o tagata uma lava ia te ia.
8E le o le malamalama ia, a ua sau o ia ina ia molimau i le lava malamalama.
9O le malamalama moni lea, na te faamalamalamaina tagata uma lava i lona maliu mai i le lalolagi.
10Sa i le lalolagi o ia, na ia faia foi le lalolagi; a e lei iloa lava ia e le lalolagi.
11Ua maliu mai o ia i lona lava nuu, a e lei talia o ia e ona lava tagata.
12A o i latou uma e na talia o ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua.
13O i latou, e le o le toto na fanau ai, e le o le manao foi o le tino e le o le loto foi o le tagata, a o le Atua lava.
14Ua liu tino tagata le Lokou, sa mau foi o ia ma i tatou, (na matou matamata i lona mamalu; o le mamalu lava lea o le Alo e toatasi o le Tamā,) ua tumu o ia i le alofa tunoa ma le faamaoni.
15Ua molimau Ioane ia te ia, ma alaga atu, ua faapea, O ia lenei sa a‘u fai atu ai, O lē mulimuli mai, e sili o ia ia te au, auā o ia na muamua ia te au.
16O lona tumu ua maua ai e i tatou uma lava le alofa tunoa, e faaopoopo i le alofa tunoa.
17Auā na tuuina mai e Mose le tulafono, a o le alofa tunoa ma le mea moni, mai ia Iesu Keriso ia.
18E lei vaaia lava le Atua e se tasi; o le Alo e toatasi o loo i le fatafata o le Tamā, o ia ua na faailoa mai o ia.
19O le molimau lenei a Ioane, ina ua aauina mai e tagata Iutaia o ositaulaga ma o sa Levī mai Ierusalema, ina ia latou fesili mai ia te ia, O ai ea oe?
20Ona ta‘utino lea o ia, e lei faafiti, a ua ta‘utino atu, E le o le Keriso a‘u.
21Ua fesili mai foi i latou ia te ia, A o ai foi? O Elia ea oe? Ua fai atu ia, E le o lea. O le perofeta ea oe? Ua tali atu o ia, E leai.
22Ona latou fai mai ai lea ia te ia, O ai ea oe? ina ia matou ave le tali i e na aauina mai i matou; se a ea sau upu ia te oe?
23Ona faapea atu ai lea o ia, O a‘u o le leo o lē alaga i le vao, Ina faalaulelei ia le ala o le Alii, faapei ona fai mai ai o le perofeta o Isaia.
24O i latou foi na aauina mai, o isi o le au faresaio i latou.
25Ona latou fesili lea ia te ia, ua faapea mai ia te ia, Se a foi le mea e te papatiso ai, pe afai e le o le Keriso oe, e le o Elia, e le o lea perofeta?
26Ua tali atu Ioane, ua faapea atu, Ou te papatiso i le vai; a o loo tu mai i totonu ia te outou le tasi, tou te le iloa o ia.
27O ia lea o loo mulimuli mai, e sili lava o ia ia te au; ou te le aoga ona ou tatalaina le nonoa o lona seevae.
28O mea ia na faia i Petapara, i tala atu o Ioritana, sa papatiso ai Ioane.
29O le taeao ua vaai atu ai Ioane ia Iesu o maliu mai ia te ia ona fai ane lea, Faauta i le Tamai mamoe a le Atua, na te aveesea le agasala a le lalolagi.
30O ia lea na ou fai atu ai, O loo mulimuli mai le tagata, e sili o ia ia te au, auā o ia na muamua ia te au.
31Ou te lei iloa foi o ia; a e peitai ina ia faaalia o ia ia Isaraelu, o le mea lea na ou sau ai e papatiso i le vai.
32Ua molimau foi Ioane, ua faapea, Na ou iloa le Agaga ua afio ifo mai le lagi, peiseai se lupe, ua nofo i ona luga.
33Ou te lei iloa o ia, peitai o ia na auina mai a‘u e papatiso i le vai, na fetalai mai o ia ia te au, O le e te iloa le Agaga ua afio ifo i ai, ma nofo i luga ia te ia, o ia lava lea na te papatiso i le Agaga Paia.
34Ua ou vaaia foi ma ou molimau o ia lava le Alo o le Atua.
35O le taeao sa toe tu ai Ioane ma nisi ona soo e toalua;
36ua ia vaai foi ia Iesu o savali ane, ona faapea atu lea o ia, Faauta i le Tamai mamoe a le Atua.
37Ua faalogologo foi ona soo e toalua i lana upu, ona la mulimuli mai ai lea ia Iesu.
38Ua fāliu Iesu, ua silafia i laua ua mulimuli mai, ona fetalai atu lea o ia ia te i laua, Se a ea la oulua feau? Ua fai mai i laua ia te ia, Rapi e, (o lona uiga pe a faamatalaina, le a‘oa‘o e,) o fea e te mau ai?
39Ua fetalai atu ia ia te i laua, O mai ia, ina matamata. Ua la o ane, ma matamata atu i le mea ua mau ai o ia; ona latou nonofo lea ma ia i le aso, auā o le itu aso po ua oo i le sefulu.
40O Aneterea, o lea uso o Simona Peteru, o le tasi lea o i laua na faalogologo ia Ioane, ma mulimuli mai ia Iesu.
41Ua ia uluai maua lona lava uso o Simona, ona fai atu lea ia te ia, Ua ma maua le Mesia, (o lona uiga o le Keriso.)
42Ua ia aumaia foi o ia ia Iesu; ua silasila atu Iesu ia te ia, ona fetalai atu lea, O Simona oe, o le atalii o Iona, o le a igoa oe ia Kefa, (o lona uiga o Peteru).
43O le taeao ua finagalo ai Iesu e maliu atu i Kalilaia ua na silafia Filipo, ona fetalai atu lea o ia ia te ia, Mulimuli mai ia ia te au.
44O le Petesaita foi Filipo; o le aai lea a Aneterea ma Peteru.
45Ua maua Natanielu e Filipo, ona fai atu lea ia te ia, Ua matou maua o ia le ua tusia e Mose i le tulafono, atoa ma le au perofeta, o Iesu lea, o le atalii o Iosefa, o le Nasareta.
46Ua fai mai Natanielu ia te ia, E mafai ea ona tupu o se mea lelei mai Nasareta? Ua fai atu Filipo ia te ia, Ina sau ia, ina matamata.
47Ua silafia Iesu o Natanielu o lo sau ia te ia, ona fetalai ane lea ia te ia, Faauta, o le Isaraelu moni, e leai sona pepelo.
48Ua fai mai Natanielu ia te ia, Na e silafia a‘u ifea? Ua tali atu Iesu, ua faapea atu ia te ia, Na ou iloa oe i lalo o le mati, a o lei valaau atu lava Filipo ia te oe.
49Ona tali mai lea o Natanielu, ua faapea mai ia te ia, Rapi e, o oe lava o le Alo o le Atua, o oe lava le Tupu o Isaraelu.
50Ua tali atu Iesu, ua faapea atu ia te ia, Ua e talitonu ea auā na ou fai atu ia te oe, na ou iloa oe i lalo o le mati? e te vaaia mea e silisili i nei mea.
51Ua fetalai atu foi o ia ia te ia, E moni, e moni, ou te fai atu ia te outou, e mulimuli ane e vaaia e outou le lagi ua avanoa; o agelu foi a le Atua e o ae ma ifoifo i luga o le Atalii o le tagata.
Who We AreWhat We EelieveWhat We Do
2025 by iamachristian.org,Inc All rights reserved.
